ក្រសួងការបរទេសកម្ពុជា បានអះអាងថា កម្ពុជាបានត្រៀមខ្លួនជានិច្ចក្នុងការចូលរួមជាមួយរដ្ឋសមាជិកអាស៊ានផ្សេងទៀត ដើម្បីជួយប្រទេសមីយ៉ាន់ម៉ាឱ្យវិលត្រឡប់ទៅរកភាពប្រក្រតីឡើងវិញ ទោះជាតាមរយៈតួនាទីនិងទម្រង់ណាមួយក្តី។
យោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេសកម្ពុជា កាលពីថ្ងៃទី៩ ខែមីនា ឆ្នាំ២០២១ បញ្ជាក់ថា ក្នុងនាមជាមិត្តនិងជាសមាជិកសហគមន៍អាស៊ាន កម្ពុជាក៏ដូចជាគ្រប់រដ្ឋសមាជិកអាស៊ានឯទៀត និងសហគមន៍អាស៊ានទាំងមូល កំពុងតាមដានយ៉ាងជិតដិតនូវស្ថានការណ៍ក្នុងប្រទេសមីយ៉ាន់ម៉ា ហើយមានការសោកសៅដោយបានឃើញនូវការកើនឡើងនៃអំពើហិង្សាដែលបណ្តាលឱ្យមានការបាត់បង់ជីវិតមនុស្ស។
ប៉ុន្តែទន្ទឹមនឹងការគោរពគោលការណ៍ស្នូលនៃការមិនជ្រៀតជ្រែកចូលកិច្ចការផ្ទៃក្នុងរបស់ប្រទេសជាសមាជិកអាស៊ាន សេចក្តីថ្លែងការណ៍បញ្ជាក់ថា កម្ពុជាបានគាំទ្រ «សេចក្តីថ្លែងការណ៍របស់ប្រធានអាស៊ាន ស្តីពីការវិវត្តនៅសាធារណរដ្ឋសហភាពមីយ៉ាន់ម៉ា និងស្តីពីកិច្ចប្រជុំក្រៅផ្លូវការនៃរដ្ឋមន្ត្រីការបរទេសអាស៊ាន» ដែលបានចេញកាលពីដើមខែកុម្ភៈ និងដើមខែមីនា ឆ្នាំ២០២១ ក្នុងគោលបំណងដើម្បីគាំទ្រដំណោះស្រាយដោយសន្តិវិធីចំពោះវិបត្តិនៅក្នុងប្រទេសមីយ៉ាន់ម៉ា។
អ្នកនាំពាក្យក្រសួងការបរទេសកម្ពុជា បានបញ្ជាក់ជំហរជាថ្មីថា តាមរយៈបទអន្តរាគមន៍របស់រដ្ឋមន្ត្រីការបរទេសកម្ពុជា លោក ប្រាក់ សុខុន នៅក្នុងកិច្ចប្រជុំក្រៅផ្លូវការរដ្ឋមន្ត្រីការបរទេសអាស៊ាន គឺកម្ពុជាបានត្រៀមខ្លួនជានិច្ចក្នុងការចូលរួមជាមួយរដ្ឋសមាជិកអាស៊ានផ្សេងទៀត ដើម្បីជួយឱ្យប្រទេសមីយ៉ាន់ម៉ា ដើរវិលទៅរកភាពប្រក្រតីឡើងវិញ ទោះជាតាមរយៈតួនាទីនិងទម្រង់ណាមួយក្តី។
ប៉ុន្តែសេចក្តីថ្លែងការណ៍បានបន្តថា ការជួយរបស់កម្ពុជា គឺឱ្យស្របតាមគោលការណ៍របស់អាស៊ាន ពោលគឺតាមមាគ៌ាអាស៊ាន ដែលគ្រប់ភាគីទាំងអស់អាចទទួលយកបាន។ ក្នុងស្មារតីនេះ កម្ពុជាក៏គំាទ្រផងដែរដល់ការជួយសម្របសម្រួលរបស់ប្រធានអាស៊ាន ក៏ដូចជាអគ្គលេខាធិការអាស៊ាន ប្រកបដោយលក្ខណៈវិជ្ជមាន សន្តិភាព និងស្ថាបនា។
លោក កុយ គួង រដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា មិនបានថ្លែងបញ្ជាក់បន្ថែមថាតើកម្ពុជាអាចជួយប្រទេសមីយ៉ាន់ម៉ាដោយរបៀបណានៅឡើយទេ។
លោកបានថ្លែងថា៖ «នៅក្នុងសេចក្តីថ្លែងការណ៍ហ្នឹងបានបញ្ជាក់ច្បាស់ហើយតើ! ថាយើងយកតាមជំហររួមរបស់អាស៊ាន ហើយសេចក្តីថ្លែងការណ៍២កន្លងមក របស់ប្រធានអាស៊ានផង ហើយក្នុងសេចក្តីថ្លែងការណ៍របស់ប្រធានអាស៊ាននៅក្នុងកិច្ចប្រជុំរដ្ឋមន្ត្រីការបរទេសកន្លងមកផង»។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណរ៉ា បានមើលឃើញថា កម្ពុជាមិនមានឥទ្ធិពលធំដុំឬជាចលករសំខាន់ ដើម្បីស្វែងរកដំណោះស្រាយនៅក្នុងប្រទេសមីយ៉ាន់ម៉ានោះទេ។ ក៏ប៉ុន្តែអ្វីដែលកម្ពុជាអាចធ្វើបាន គឺការចូលរួមជាស្មារតី។
លោកមានប្រសាសន៍ថា៖ «យើងនិយាយក្នុងក្របខណ្ឌអាស៊ាននេះ ខ្ញុំគិតថា កម្ពុជាពុំមានលទ្ធភាពអ្វីជួយជ្រោមជ្រែងខ្លាំងទេ ក៏ប៉ុន្តែគ្រាន់តែជាស្មារតីក្នុងនាមជាអ្នកជិតខាង ដោយអំពាវនាវឱ្យភូមាហ្នឹងឈរនៅក្នុងស្មារតីអាស៊ាន ដើម្បីជួយងាកមកក្នុង គេហៅថា រក្សានូវស្ថានភាព ស្ថិរភាព សុវត្ថិភាព សន្តិសុខក្នុងតំបន់ និងនយោបាយការបរទេសនៅក្នុងតំបន់ហ្នឹង។ អញ្ចឹងបើកាលណាភូមាអត់មាន គេហៅថា គន្លងលទ្ធិប្រជាធិបតេយ្យ ឬគោលការណ៍របស់អាស៊ានទេ តំបន់អាស៊ានក៏បាត់នូវបរិយាកាសនយោបាយមួយដែរ។ អញ្ចឹងកម្ពុជា ជាសមាជិកអាស៊ានហ្នឹងមានកាតព្វកិច្ច ភារកិច្ចមួយជំរុញឱ្យតំបន់ហ្នឹងមានសុវត្ថិភាពនិងសន្តិសុខ ចូលរួមចំណែកនៅក្នុងតំបន់ហ្នឹង»។
កាលពីថ្ងៃទី១ ខែកុម្ភៈ កងទ័ពមីយ៉ាន់ម៉ា (Myanmar) បានធ្វើរដ្ឋប្រហារយោធាក្រសោបយកអំណាចពីលោកស្រី អ៊ុង សានស៊ូជី ដោយបានចោទប្រកាន់ថា មានការលួចបន្លំសន្លឹកឆ្នោតនៅក្នុងការបោះឆ្នោតមួយដែលធ្វើឱ្យគណបក្សរបស់ពួកយោធាចាញ់។ ប៉ុន្តែរដ្ឋប្រហារនោះបាននាំឱ្យប្រជាពលរដ្ឋមីយ៉ាន់ម៉ារាប់សែននាក់ នាំគ្នាធ្វើបាតុកម្មតវ៉ាតាមដងផ្លូវស្ទើរតែគ្រប់ទីកន្លែងទូទាំងប្រទេស។
យ៉ាងណាក្តី គិតត្រឹមថ្ងៃទី៩ ខែមីនា ពួកយោធាបានបង្ក្រាបទៅលើក្រុមបាតុករ ដែលបណ្ដាលឱ្យមនុស្សយ៉ាងហោចណាស់៦០នាក់បានស្លាប់ និងចាប់ឃុំខ្លួនក្រុមអ្នកតវ៉ាជិត២ពាន់នាក់ហើយ។
កាលពីថ្ងៃទី៣ ខែមីនា រដ្ឋមន្ត្រីការបរទេសកម្ពុជា លោក ប្រាក់ សុខុន ក៏បានចូលរួមជាមួយរដ្ឋមន្ត្រីការបរទេសអាស៊ានចំនួន៨ទៀតចេញសេចក្តីថ្លែងការណ៍ព្រួយបារម្ភ និងអំពាវនាវឱ្យស្វែងរកដំណោះស្រាយដោយសន្តិវិធីចំពោះបញ្ហានៅក្នុងប្រទេសមីយ៉ាន់ម៉ា។
វីអូឌី មិនអាចទាក់ទងសុំការឆ្លើយតបពីស្ថានទូតមីយ៉ាន់ម៉ាប្រចាំនៅកម្ពុជាបានទេនៅរសៀលថ្ងៃទី១០ ខែមីនានេះ ទាក់ទងនឹងជំហររបស់កម្ពុជាក្នុងការត្រៀមខ្លួនជួយដល់ប្រទេសមីយ៉ាន់ម៉ា ឱ្យវិលទៅរកប្រក្រតីភាពឡើងវិញនេះ៕
