អាជីវករនិងប្រជាពលរដ្ឋដែលប្រកបរបររកស៊ីនៅក្នុងផ្សារបាត់ដឹង ស្រុកឧដុង្គ ខេត្តកំពង់ស្ពឺ កំពុងព្រួយបារម្ភ បន្ទាប់ពីមានស្ត្រីជាអ្នកបោះដុំសម្លៀកបំពាក់នៅរាជធានីភ្នំពេញម្នាក់ដែលបានឆ្លងជំងឺកូវីដ១៩ បានធ្វើដំណើរទៅកាន់ផ្សារនោះ។
អាជីវករលក់គ្រឿងឧបភោគនិងបរិភោគម្នាក់នៅក្នុងផ្សារបាត់ដឹង គឺអ្នកស្រី គង់ សុភាព បានថ្លែងប្រាប់ វីអូឌី ថា បរិយាកាសនៅក្នុងផ្សារបាត់ដឹង នៅថ្ងៃពុធនេះ មានសភាពស្ងប់ស្ងាត់ជាងពេលធម្មតា។
អ្នកស្រីបន្តថា៖ «រាងបាត់មនុស្សខ្លះ រាល់ដងមនុស្សច្រើន ថ្ងៃនេះមនុស្សអត់សូវមានប៉ុន្មានទេ ដូចថា ៣ភាគ វានៅតែ២ភាគ វាបាត់អស់១ភាគ។ ចាស៎! ភ័យដូចតែគ្នាហ្នឹងណា តែមិនដឹងធ្វើយ៉ាងម៉េច ប៉ុន្តែគ្រាន់តែថា វាមិនទាន់មានអ្នកកើត លក់ដូរធម្មតាអញ្ចឹងទៅ ពាក់ម៉ាស់ ពាក់អីធម្មតាអញ្ចឹងទៅ គ្រាន់តែយើងរាងប្រយ័ត្នជាងលើកមុន លើកមុនយើងអត់សូវប្រយ័ត្នប៉ុន្មានទេ។ លើកមុនម៉ាស់ អ្នកខ្លះពាក់ អ្នកខ្លះអត់ ឥលូវពាក់គ្រប់គ្នា អត់មានអ្នកអត់ពាក់ទេ»។
រដ្ឋបាលខេត្តកំពង់ស្ពឺ កាលពីថ្ងៃទី៩ ខែមីនា ម្សិលមិញនេះ បានសម្រេចបិទតូបចំនួន១២ ស្ថិតនៅផ្សារបាត់ដឹង ក្នុងស្រុកឧដុង្គ ខេត្តកំពង់ស្ពឺ ហើយអ្នកពាក់ព័ន្ធផ្ទាល់ចំនួន២៥នាក់ត្រូវបានអាជ្ញាធរនាំទៅយកសំណាក និងដាក់ឱ្យធ្វើចត្តាឡីស័ករយៈពេល១៤ថ្ងៃនៅឯមន្ទីរពេទ្យបង្អែកខេត្តកំពង់ស្ពឺ។ អ្នកទាំង២៥នាក់នោះ រួមមាន ១៧នាក់ រស់នៅក្នុងស្រុកឧដុង្គ ខេត្តកំពង់ស្ពឺ និង៨នាក់ទៀត រស់នៅក្នុងខេត្តកណ្តាល។
បើតាមរបាយការណ៍របស់រដ្ឋបាលខេត្តកំពង់ស្ពឺ បានឱ្យដឹងថា ស្ត្រីអាជីវករលក់សម្លៀកបំពាក់ម្នាក់ដែលវិជ្ជមានកូវីដ១៩នេះ គឺជាអាជីវករនៅក្នុងផ្សារអូរឡាំពិក ហើយបច្ចុប្បន្ន បាននិងកំពុងដាក់ឱ្យសម្រាកព្យាបាលនៅក្នុងសណ្ឋាគារ The Great Duke រាជធានីភ្នំពេញ។
រដ្ឋបាលខេត្តបន្តថា មុនផ្ទុះដំណឹងនេះ ស្ត្រីរូបនេះបានយកសម្លៀកបំពាក់ទៅបោះដុំឱ្យម៉ូយរបស់ខ្លួននៅក្នុងផ្សារបាត់ដឹង កាលពីថ្ងៃសៅរិ៍ ទី៦ ខែមីនា ចំនួន១២តូប។
បើតាមការរៀបរាប់ពីស្ត្រីម្នាក់ដែលសុំមិនបញ្ចេញឈ្មោះ បានឱ្យដឹងថា ដំបូងឡើយ ពួកគេមិនទាន់ជឿទេ ក៏ប៉ុន្តែបន្ទាប់ពីសាម៉ីខ្លួនបានទូរសព្ទមកប្រាប់មនុស្សដែលខ្លួនបានទាក់ទងនៅក្នុងផ្សារខាងលើនេះ ទើបមានការភ្ញាក់ផ្អើលគ្រប់ៗគ្នា។
អ្នកស្រីបានមានប្រសាសន៍យ៉ាងដូច្នេះថា៖ «ដើមកំណើត អ្នកបោះដុំខោវអាវអូរឡាំពិកនោះ គាត់បានមកបោះដុំនៅក្នុងផ្សារ។ គាត់យកឱ្យម៉ូយនៅក្នុងផ្សារ ហើយគាត់មិនមែនបោះឱ្យតែមួយតូបឯណា គាត់ដើរសឹងគ្រប់តូប ហើយមុនដំបូងពួកខ្ញុំអត់ជឿដែរហ្នឹង។ គេនិយាយតែម្នាក់នោះ [តា]កុង ហេង គាត់ឆាតមកប្រាប់ គាត់នៅផ្សារហ្នឹង គាត់អត់ជឿទេ ហើយគាត់តេ [ទូរសព្ទ] ទៅគេបីបួននាក់ទៀត ដល់សួរបីបួននាក់ហ្នឹងទៅ គេថាកើតគ្រប់គ្នា»។
ទោះជាយ៉ាងនេះក្តី អភិបាលខេត្តកំពង់ស្ពឺ លោក វ៉ី សំណាង បានប្រាប់ វីអូឌី ថា គិតត្រឹមថ្ងៃទី១០ ខែមីនានេះ ខេត្តកំពង់ស្ពឺ មិនទាន់មានប្រជាពលរដ្ឋណាម្នាក់ឆ្លងជំងឺកូវីដ១៩នៅឡើយទេ ខណៈរដ្ឋបាលខេត្តរង់ចាំលទ្ធផលធ្វើតេស្តទៅលើអាជីវករ១៧នាក់នេះសិន។
យ៉ាងណាក្តី ដោយស្ថានភាពចាំបាច់ លោកថា រដ្ឋបាលខេត្តបានជូនដំណឹងបន្ថែមនៅថ្ងៃនេះ ដោយសម្រេចឱ្យផ្អាកជាបណ្តោះអាសន្ននូវកម្មវិធីអាពាហ៍ពិពាហ៍ ពិធីជប់លៀង និងពិធីជួបជុំផ្សេងៗទៀត រហូតដល់មានការជូនដំណឹងជាថ្មី។
ជំងឺកូវីដ១៩ ដែលផ្ទុះចេញពីព្រឹត្តិការណ៍សហគមន៍២០កុម្ភៈ បាននិងកំពុងរីករាលដាលពីរាជធានីភ្នំពេញ ទៅកាន់ខេត្តព្រះសីហនុ និងបណ្តាខេត្ត-ក្រុងផ្សេងទៀត។
នៅខេត្តកណ្តាល នៅថ្ងៃទី១០ ខែមីនានេះ បានសម្រេចបិទភូមិមួយស្ថិតនៅក្នុងស្រុកល្វាឯម បន្ទាប់ពីរកឃើញអ្នកឆ្លងជំងឺកូវីដ១៩ ចំនួន១១នាក់ ដែលមានប្រភពចម្លងចេញពីគ្រួសារមួយមានទំនាក់ទំនងជាមួយគ្រូពេទ្យម្នាក់នៅក្នុងស្រុកពាមរក៍ ខេត្តព្រៃវែង ដែលមានផ្ទុកជំងឺកូវីដ១៩។
អភិបាលខេត្តកណ្តាល លោក គង់ សោភ័ណ្ឌ បានមានប្រសាសន៍ថា គិតត្រឹមថ្ងៃនេះ ខេត្តកណ្តាល មានអ្នកជំងឺកូវីដ១៩ សរុបជាង៣០នាក់ និងជាង៦ ០០០នាក់ត្រូវបានដាក់ឱ្យធ្វើចត្តាឡីស័ក។
លោកមានប្រសាសន៍ថា៖ «អញ្ចឹងយើងសន្និដ្ឋានថា ក្រុមដែលទាក់ទងនឹងព្រឹត្តិការណ៍២០កុម្ភៈនេះ ជាគ្រួសារគាត់មួយមានលក្ខណៈធំ ព្រោះ៨៨នាក់ វាឆ្លង៨នាក់ទៀតហើយ ហើយនៅម្តុំគ្នាគាត់ នៅភូមិវាលធំហ្នឹង។ អញ្ចឹងទេបានយើងសម្រេចចិត្តជាមួយក្រុមការងាររបស់យើងនៅឯស្រុក ជជែកគ្នាទៅ លើកយោបល់មកឱ្យខ្ញុំ ខ្ញុំមកត្រួតពិនិត្យទៅឃើញថា ដើម្បីចៀសវាងការឆ្លងរីករាលដាលខ្នាតធំដែលពិបាកយើងទប់ស្កាត់ អញ្ចឹងយើងក៏សម្រេចចិត្តចងខ្សែបិទនៅចំណុចភូមិវាលធំហ្នឹង។ មិនមែនបិទទាំងស្រុងទេ បិទនៅតំបន់គ្រប់គ្រងដែលគ្នាគាត់ប៉ះពាល់ហ្នឹង បាទ! បិទបណ្តោះអាសន្នសិន ដើម្បីយកសំណាកនេះទៅមើលទាំងអស់គ្នា»។
សម្រាប់ខេត្តព្រៃវែងវិញ អាជ្ញាធរបានបិទសាលារៀនទាំងអស់នៅក្នុងស្រុកពាមរក៍ និងទីតាំងពាក់ព័ន្ធចំនួន៤កន្លែង បន្ទាប់ពីផ្ទុះជំងឺកូវីដ១៩ ចេញពីគ្រូពេទ្យម្នាក់នៅក្នុងស្រុកនេះ។ បន្ថែមលើនេះ អាជ្ញាធរក៏បានយកអ្នកពាក់ព័ន្ធសរុបចំនួន២៦១នាក់ហើយ ដើម្បីយកសំណាក និងដាក់ឱ្យធ្វើចត្តាឡីស័ករយៈពេល១៤ថ្ងៃ។
ដោយឡែក សម្រាប់ខេត្តសៀមរាបវិញ បន្ទាប់ពីមានស្ត្រីម្នាក់អាយុ៣២ឆ្នាំម្នាក់ រស់នៅក្នុងឃុំសំរោងយ៉ា ស្រុកពួក ខេត្តសៀមរាប វិជ្ជមានកូវីដ១៩ អាជ្ញាធរខេត្តបានយកអ្នកពាក់ព័ន្ធដែលជាសាច់ញាតិរបស់អ្នកជំងឺជាង១០នាក់ ដាក់ឱ្យធ្វើចត្តាឡីស័កផងដែរ។ នេះបើតាមការឱ្យដឹងពីលោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប៕
