អាជ្ញាធរខេត្តព្រះសីហនុ បានឃាត់ខ្លួនអ្នកបើកបររថយន្តតាក់ស៊ីនិងរថយន្តដឹកទំនិញចំនួន១០នាក់ ក្រោយពេលពួកគេព្យាយាមលួចដឹកមនុស្សចេញពីខេត្តនេះ ដោយបំពានបម្រាមរបស់រដ្ឋាភិបាល។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានឱ្យដឹងថា ក្នុងចំណោមអ្នកបើកបររថយន្តឈ្នួលនិងរថយន្តដឹកទំនិញទាំង១០នាក់នោះ មាន៣នាក់ត្រូវបានអធិការនគរបាលស្រុកកំពង់សីលាឃាត់ខ្លួន ម្នាក់ត្រូវបានអធិការនគរបាលស្រុកព្រៃនប់ឃាត់ខ្លួន និង៦នាក់ទៀតកំពុងស្ថិតនៅក្នុងការសាកសួររបស់អាជ្ញាធរស្រុកទាំងពីរ។
លោកបន្តថា ក្នុងចំណោមពួកគេ៤នាក់ត្រូវបានជាប់ចោទពីបទ «ព្យាយាមគេចវេះពីទីតាំងប៉ុស្តិ៍ត្រួតពិនិត្យចត្តាឡីស័ក» ដែលដាក់នៅតាមព្រំប្រទល់ខេត្ត។
បើតាមអ្នកនាំពាក្យរូបនេះ ពួកគេនឹងទទួលរងពិន័យតាមមាត្រា១១ នៃអនុក្រឹត្យថ្មីលេខ២៧ ដែលនឹងពិន័យជាប្រាក់ពី ១០ ០០០ ០០០ រៀល ដល់ ៥០ ០០០ ០០០ រៀល។
លោក ឃាង ភារម្យ បញ្ជាក់ថា៖ «ជារួម យើងមើលទៅលើករណីទាំងអស់សុទ្ធតែទទួលបានផលប្រយោជន៍ជាថវិកាក្នុងការដឹកជម្លៀសចេញហ្នឹង ភាគច្រើនជាអ្នករត់តាក់ស៊ី។ អ៊ីចឹងមិនដឹងថា គាត់គិតយ៉ាងម៉េច? គាត់ទទួលបានការជូនដំណឹងដែលប្រព័ន្ធផ្សព្វផ្សាយទាំងរដ្ឋនិងវិស័យឯកជន យើងបានផ្សព្វផ្សាយយ៉ាងទូលំទូលាយណាស់ ហើយគាត់នៅតែប្រព្រឹត្តល្មើស»។
យោងតាមគណនីហ្វេសប៊ុករបស់រដ្ឋបាលខេត្តព្រះសីហនុ កាលពីយប់ថ្ងៃទី០៩ ខែមីនា អាជ្ញាធរស្រុកព្រៃនប់ បានឃាត់អ្នកបើកបររថយន្តក្រឡុកស៊ីម៉ង់ត៍ម្នាក់ឈ្មោះ ទៀង ផាន់នី ភេទប្រុស អាយុ៣៩ឆ្នាំ បន្ទាប់ពីគាត់បានបន្លំដឹកអ្នកដំណើរម្នាក់ជាបុគ្គលិកបម្រើការនៅកាស៊ីណូមួយកន្លែង ចេញពីគោលដៅខេត្តព្រះសីហនុឆ្ពោះទៅខេត្តកំពត។
ដោយឡែក កាលពីយប់ថ្ងៃទី០៨ ខែមីនា ក៏មានករណីម្ចាស់រថយន្តតាក់ស៊ីចំនួន០៣គ្រឿង បានបើកគេចពីគោលដៅសមត្ថកិច្ចត្រួតពិនិត្យក្នុងខេត្តព្រះសីហនុ ឆ្ពោះទៅរាជធានីភ្នំពេញ ដោយវាងទៅតាមផ្លូវល្បឿនលឿន ក៏ត្រូវបានកម្លាំងគណៈបញ្ជាការឯកភាពស្រុកកំពង់សីលា ឃាត់សួរនាំ និងកសាងសំណុំរឿងចាត់ការតាមវិធានការច្បាប់។
អ្នកបើកបររថយន្តត្រូវបានឃាត់ខ្លួន រីឯអ្នកដំណើរនៅលើរថយន្ត៤ទៅ៥នាក់ត្រូវបានសមត្ថកិច្ចបញ្ជាឱ្យវិលត្រឡប់ទៅវិញ។
រដ្ឋបាលខេត្តបន្តថា រីឯនៅក្នុងករណីដាច់ដោយឡែកមួយទៀត អ្នកបើកបររថយន្តតាក់ស៊ីដឹកស្រ្តីជនជាតិចិនម្នាក់ គេចចេញពីគោលដៅត្រួតពិនិត្យនៅស្រុកកំពង់សីលា ខេត្តព្រះសីហនុ ឆ្ពោះទៅកាន់រាជធានីភ្នំពេញ ក៏ត្រូវបានសមត្ថកិច្ចឃាត់ខ្លួន និងកសាងសំណុំរឿងចាត់ការតាមវិធានការច្បាប់ដែរ កាលពីយប់ថ្ងៃទី៨ ខែមីនា។ យោងតាមចម្លើយសារភាពរបស់អ្នកបើកបររថយន្តតាក់ស៊ីនោះ ខ្លួនទទួលបានប្រាក់៣០០ដុល្លារ ជាថ្នូរនឹងការដឹកស្ត្រីជនជាតិចិនរូបនេះ។ នៅក្នុងករណីនេះ អាជ្ញាធរខេត្តព្រះសីហនុបានសម្រេចភ្លាមៗ ដោយបណ្តេញស្ត្រីជនជាតិចិនរូបនេះ ចេញពីប្រទេសកម្ពុជា ក្រោយពីបញ្ចប់ការធ្វើចត្តាឡីស័ក ចំណែកឯតៃកុងរថយន្តឈ្នួលត្រូវបានពិន័យជាប្រាក់ពី១០លានរៀលដល់៥០លានរៀល។
កាលពីព្រឹកថ្ងៃទី៩ ខែកុម្ភៈ អាជ្ញាធរខេត្តតាកែវ ក៏បានឃាត់ខ្លួនបុរសជនជាតិចិនចំនួន២ក្រុម មានគ្នា១៥នាក់ជាបន្តបន្ទាប់ក្នុងរយៈពេលពីរថ្ងៃមកនេះ។ ដោយឡែក កាលពីយប់ថ្ងៃទី១០ ខែមីនា អាជ្ញាធររាជធានីភ្នំពេញ ក៏បានឃាត់រថយន្តមួយគ្រឿងដែលមានជនជាតិចិន៣នាក់ និងបុរសជនជាតិខ្មែរម្នាក់ បើកគេចចេញពីសមត្ថកិច្ច ដែលគេសង្ស័យថា មានជំងឺកូវីដ១៩។
លោក ឃាង ភារម្យ បានមានប្រសាសន៍បន្ថែមថា៖ «តាមការផ្សព្វផ្សាយក្នុងផេក [ទំព័រហ្វេសប៊ុក] រដ្ឋបាលខេត្តព្រះសីហនុ មានម្នាក់នោះយកពីគេបានដល់ទៅ៣០០ដុល្លារ ហើយតាក់ស៊ីខ្លះហ្នឹងយក៣០ដុល្លារ អ្នកខ្លះយក៤០ដុល្លារក្នុងម្នាក់អញ្ចឹងទៅ។ បើយើងមើលទៅដូចវាមិនច្រើនអីទេ ប៉ុន្តែបងប្អូនយើងទម្លាប់ថា គាត់ចូលចិត្តបំពាន អ្នកខ្លះ! ហើយបើយើងគិតពីទំហំទឹកប្រាក់ហ្នឹង វាមិនសមណាយើងធ្វើអញ្ចឹងសោះ! ចុះបើសិនអ្នកដែលយើងនាំចេញទៅ យើងខំប្រឹងដឹកទៅ ហើយគាត់មានផ្ទុកជំងឺកូវីដ១៩ ហើយយកទៅចម្លងអ្នកផ្សេងទៀតដែលគ្នាអត់ដឹងអីនោះ តើវានឹងមានសោកនាដកម្មអ្វីខ្លះ?»
ប៉ុន្តែអ្នកស្រី ជៀប សុធារី មន្ត្រីសម្របសម្រួលអង្គការការពារសិទ្ធិមនុស្សអាដហុកប្រចាំនៅខេត្តព្រះសីហនុ បានកត់សម្គាល់ថា កត្តាជីវភាពនិងប្រាក់ចំណូលប្រចាំថ្ងៃ បានជំរុញឱ្យរដ្ឋាភិបាលដោះស្រាយបញ្ហានេះផង។
អ្នកស្រីមានប្រសាសន៍ដូច្នេះថា៖ «អាជីវភាពប្រចាំថ្ងៃ ខ្ញុំគិតទៅវាមធ្យមទេ វាងំរឿងជំពាក់លុយធនាគារ ព្រោះអ្នកខ្លះតាមខ្ញុំដឹង គាត់ខ្ចីលុយធនាគារមកទិញរថយន្តឬបង់ប្រចាំខែអ៊ីចឹងទៅ។ អាហ្នឹងជាការលំបាក ព្រោះបើការហូបចុក គាត់អាចកាត់បន្ថយបាន អាហ្នឹងគួរតែរដ្ឋាភិបាល ហើយនិងខាងមីក្រូហិរញ្ញវត្ថុឯកជនហ្នឹង ជួយសម្រួលធ្វើយ៉ាងណាដើម្បីជួយពួកគាត់ផង»។
កាលពីយប់ថ្ងៃទី៤ ខែមីនា លោកនាយករដ្ឋមន្ត្រី ហ៊ុន សែន បានបញ្ជាឱ្យបិទការធ្វើចរាចរណ៍ចេញនិងចូលនៅក្នុងខេត្តព្រះសីហនុ លើកលែងតែរថយន្តដឹកទំនិញ ដោយលោកចាត់ទុកថា ស្ថានភាពនៃការឆ្លងរាលដាលមេរោគកូវីដ-១៩ នៅទីនោះ ស្ថិតនៅក្នុងស្ថានភាពអាក្រក់។ គិតត្រឹមថ្ងៃទី១១ ខែមីនា ខេត្តព្រះសីហនុ មានអ្នកជំងឺកូវីដ-១៩ សរុបចំនួន១១៦នាក់ ក្នុងនោះមានស្រីចំនួន៤៧នាក់៕