ប្រមុខរដ្ឋស្តីទី បានទូលថ្វាយសំណើទៅព្រះមហាក្សត្រ ដើម្បីសុំបញ្ចប់គោរមងារ«ឧកញ៉ា»ពីលោក ឌួង ឆាយ ក្រោយពីបែកធ្លាយវីដេអូឃ្លីបដែលបង្ហាញពីសកម្មភាពឧកញ៉ារូបនេះបានប្រើប្រាស់ហិង្សាលើអតីតភរិយារបស់ខ្លួន នៅលើបណ្តាញសង្គម។
ក្នុងលិខិតរបស់ប្រមុខរដ្ឋស្តីទី លោក សាយ ឈុំ ថ្វាយទៅព្រះមហាក្សត្រនៅថ្ងៃនេះ បានស្នើសុំព្រះរាជមេត្តាប្រោសប្រទានព្រះរាជតម្រិះ តាមសំណើរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី១៦ ខែមីនា ម្សិលមិញ ដើម្បីសុំបញ្ចប់គោរមងារ«ឧកញ៉ា»ពីលោក ឌួង ឆាយ ។
ទោះជាយ៉ាងណា ក្នុងលិខិតនោះមិនបានបញ្ជាក់ពីមូលហេតុច្បាស់លាស់នៃការស្នើសុំនេះទេ។
នៅថ្ងៃនេះដែរ ក្រសួងកិច្ចការនារី ក៏បានចេញសេចក្តីថ្លែងការណ៍មួយដោយថ្កោលទោសចំពោះ ឧកញ៉ា ឌួង ឆាយ ដែលប្រើអំពើហិង្សាក្នុងគ្រួសារ លើអតីតភរិយារបស់ខ្លួនគឺអ្នកស្រី ដេត ម៉ាលីណា ដែលវីដេអូនៃការប្រើហិង្សានោះត្រូវបានអ្នកស្រីបង្ហោះលើបណ្តាញសង្គមហ្វេសប៊ុក កាលពីយប់ថ្ងៃទី១៥ ខែមីនា ឆ្នាំ២០២១។
ក្នុងសេចក្តីថ្លែងការណ៍នោះ ក្រសួងបានចាត់ទុកអំពើហិង្សាគ្រប់ទម្រង់និងគ្រប់រូបភាពណាក៏ដោយ ជាអំពើមិនអាចទទួលយកបាន និងមិនអាចអត់ឱនឱ្យបាន។ រីឯជនរងគ្រោះ កូន និងអ្នកពាក់ព័ន្ធ ត្រូវទទួលបានកិច្ចការពារដោយច្បាប់និងសង្គម ហើយអ្នកដែលប្រព្រឹត្តត្រូវទទួលខុសត្រូវចំពោះមុខច្បាប់។
ក្រសួងកិច្ចការនារី បញ្ជាក់ថា អំពើហិង្សាក្នុងគ្រួសារនាំឱ្យប៉ះពាល់ដល់សតិអារម្មណ៍ បញ្ញាស្មារតី រូបរាងកាយ និងផ្លូវចិត្តរបស់កុមារ ហើយនៅពេលពួកគេធំឡើង អាចជំរុញឱ្យពួកគេបង្កហិង្សាផងដែរ។ ករណីនេះ ក្រសួងថា ឪពុកម្តាយគ្រប់រូបត្រូវចេះរកដំណោះស្រាយបញ្ហាប្រឈមនានាក្នុងគ្រួសារ និងអប់រំថែរក្សាកូន លើកកម្ពស់ការពារសិទ្ធិកុមារនិងស្ត្រី ដើម្បីឱ្យក្លាយជាពលរដ្ឋល្អសម្រាប់សង្គមជាតិ ។
បន្ថែមពីនេះ ក្រសួងក៏បានលើកទឹកចិត្តដល់ជនរងគ្រោះដោយអំពើហិង្សា អំពើរំលោភសេពសន្ថវៈ អំពើជួញដូរមនុស្ស អំពើរំលោភបំពាននិងបៀតបៀនផ្លូវភេទគ្រប់ទម្រង់ ជាពិសេសស្ត្រី និងកុមារ ត្រូវបង្ហាញជាសាធារណៈ និងស្វែងរកិច្ចអន្តរាគមន៍ ជំនួយផ្នែកច្បាប់ (មេធាវីស្ម័គ្រចិត្តរបស់រដ្ឋាភិបាល) តាមរយៈការរាយការណ៍ទៅអាជ្ញាធរនៅមូលដ្ឋានជិតបំផុត ឬមន្ត្រីកិច្ចការនារីទាំង២៥រាជធានី-ខេត្ត ឬហ្វេសប៊ុករបស់ក្រសួង ដើម្បីជួយរកដំណោះស្រាយនិងយុត្តិធម៌ឱ្យជាដើម។
វីអូឌី មិនអាចសុំការបំភ្លឺពីឧកញ៉ា ឌួង ឆាយ បានទេនៅថ្ងៃនេះ។
ប៉ុន្តែឧកញ៉ា ឌួង ឆាយ បានបកស្រាយតាមរយៈការឡាយ (Live) នៅលើទំព័រហ្វេសប៊ុករបស់លោក កាលពីព្រឹកម្សិលមិញថា រូបលោកទទួលស្គាល់កំហុសថា ពិតជាបានប្រើអំពើហិង្សាលើអតីតភរិយារបស់គាត់ពិតមែន ប៉ុន្តែរឿងនោះជារឿងចាស់កាលពីចុងឆ្នាំ២០២០ ពីព្រោះក្រោយពីបង្កហិង្សា ពួកគេបានសម្រេចចិត្តលែងលះគ្នា។
លោក ឌួង ឆាយ ថ្លែងទៀតថា ដើមចមដែលនាំឱ្យរូបលោកប្រើអំពើហិង្សាលើអតីតភរិយាកន្លងមកនោះ ដោយសារតែរឿងជម្លោះផ្ទៃក្នុងគ្រួសារ ហើយអតីតភរិយាបានរឹតត្បិតសេរីភាពរបស់លោកជាដើម។
លោកបកស្រាយដូច្នេះថា៖ «បើសិនជាមិនមានជនទី៣ បងប្អូនពូមីងពិចារណាទៅ មនុស្សស្រីដាច់ចិត្តលែងប្តីខ្លួនឯង ដោយប្តីខ្លួនឯងមិនទាន់ប្រើហិង្សាមកលើយើងជាលើកចុងក្រោយផងហ្នឹង។ មិនមែនលែងខ្ញុំមុនខ្ញុំប្រើហិង្សាលើគាត់ផង ដោយសាររឿងឱ្យខ្ញុំទៅក្រៀវ ដោយសារវិបត្តិសេដ្ឋកិច្ច ដោយសារគាត់ទទួលបន្ទុកក្នុងគ្រួសារមួយរយៈខ្លី ចូលប៉ុន្មានខែហ្នឹង។ មនុស្សស្រី បើមិនមានអ្នកណានៅពីក្រោយ មិនមានបង្អែករឹងមាំគ្រប់គ្រាន់ មិនអាចធ្វើរឿងនេះបានទេ បងប្អូន»។
វីអូឌី មិនអាចសុំការបំភ្លឺពីអ្នកនាំពាក្យក្រសួងមហាផ្ទៃ លោក ផាត សុផានិត និងអ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង បានទេនៅថ្ងៃនេះ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព ដែលតាមដានករណីនេះ មានប្រសាសន៍ថា បើសិនជាមានការបញ្ចប់គោរមងារ ឧកញ៉ា ឌួង ឆាយ ជាគំរូល្អសម្រាប់សង្គមជាតិ។ ប៉ុន្តែលោកស្រីស្នើទៅរដ្ឋាភិបាលនិងស្ថាប័នពាក់ព័ន្ធ មុននឹងផ្តល់គោរមងារដល់ឧកញ៉ាណាមួយ មិនត្រូវគិតពីរឿងទ្រព្យសម្បត្តិជួយជាតិតែមួយមុខទេ គឺត្រូវសិក្សាឱ្យបានច្បាស់លាស់ពីសីលធម៌ ចំណេះដឹង ការជួយសង្គមជាតិ ជាដើម ដើម្បីកុំឱ្យមានរឿងកើតឡើងដូចករណីឧកញ៉ា ឌួង ឆាយ នេះ។
លោកស្រី ចក់ សុភាព ក៏បានស្នើស្ថាប័នពាក់ព័ន្ធ ជាពិសេសតុលាការ ត្រូវធ្វើការស្រាវជ្រាវនិងចាត់វិធានការច្បាប់ដល់អ្នកដែលបង្កហិង្សាលើស្ត្រី ដើម្បីផ្តល់យុត្តិធម៌ដល់ជនរងគ្រោះ។
លោកស្រីមានប្រសាសន៍ថា៖ «ពិតជាមានការប្រើប្រាស់អំពើហិង្សាបែបនេះមែន អាជ្ញាធរពាក់ព័ន្ធ ជាពិសេសព្រះរាជអាជ្ញា គួរតែធ្វើកិច្ចការងារទៅតាមនីតិវិធីច្បាប់ដែរ។ ខ្ញុំឃើញមានការជជែកខ្លះ មានសេចក្តីថ្លែងការណ៍ ជាពិសេសចេញពីក្រសួងកិច្ចការនារី ជាដើម ដែលលើកទឹកចិត្តឱ្យជនរងគ្រោះដាក់ពាក្យបណ្តឹង។ ប៉ុន្តែបើយើងមើលពីនីតិវិធីច្បាប់ នៅពេលដែលមានករណីព្រហ្មទណ្ឌបែបនេះ ហើយមានការរំលោភបំពានជាហិង្សាផ្អែកលើយេនឌ័រនេះ មិនមែនចាំទាល់តែជនរងគ្រោះចេញមុខមកប្តឹងផ្តល់នោះទេ ជាពិសេសខាងក្រសួងកិច្ចការនារីផ្ទាល់ ក៏គួរតែមានតួនាទីចូលរួមចំណែកក្នុងការជំរុញឱ្យមាននីតិវិធីទៅតាមផ្លូវច្បាប់ដែរ »៕