ក្រសួងសុខាភិបាលបានចេញប្រកាសមួយដោយតម្រូវឱ្យប្រជាពលរដ្ឋនៅតាមទីកន្លែងសាធារណៈឬទីប្រជុំជនមួយចំនួន ត្រូវតែពាក់ម៉ាស់និងរក្សាគម្លាតសុវត្ថិភាពសង្គម ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
ប្រកាសរបស់ក្រសួងសុខាភិបាលនេះ បានគូសបញ្ជាក់ថា ប្រសិនបើបុគ្គលណាមិនបំពេញកាតព្វកិច្ចទាំងពីរនេះទេ នឹងត្រូវទទួលរងការពិន័យជាទឹកប្រាក់ពី ២០០ ០០០រៀល ដល់ ១ ០០០ ០០០រៀល ដូចមានចែងនៅក្នុងអនុក្រឹត្យ ស្តីពី «វិធានការសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត»។
បើយោងតាមប្រកាសនេះ បានកំណត់ពីបុគ្គលដែលមានកាតព្វកិច្ចពាក់ម៉ាស់ និងទីកន្លែងដែលតម្រូវឱ្យពាក់ម៉ាស់ ដូចជា បុគ្គលដែលវិជ្ជមានកូវីដ-១៩ បុគ្គលដែលមានកាតព្វកិច្ចធ្វើចត្តាឡីស័ក អ្នកបើកបរនិងអ្នករួមដំណើរលើមធ្យោបាយធ្វើដំណើររួម ឬមធ្យោបាយដឹកជញ្ជូនសម្រាប់បម្រើឱ្យសាធារណជនគ្រប់ប្រភេទ អ្នកផ្តល់សេវាផ្ទាល់ដល់អតិថិជន និងបុគ្គលផ្សេងៗទៀត ដែលកំពុងស្ថិតនៅតាមទីសាធារណៈដែលមានមនុស្សច្រើន ឬទីកន្លែងដែលមានការជួបជុំមនុស្សចាប់ពី២នាក់ឡើងទៅ។ រីឯប្រភេទម៉ាស់ និងរបៀបនៃការពាក់ម៉ាស់ ត្រូវកំណត់តាមការណែនាំរបស់ក្រសួងសុខាភិបាល។
ដោយឡែក ចំពោះទីកន្លែងដែលតម្រូវឱ្យពាក់ម៉ាស់វិញ ក្រសួងថា ត្រូវធ្វើនៅគ្រប់ទីកន្លែងសាធារណៈ ឬកន្លែងផ្តល់សេវាកម្មសាធារណៈនានា ដូចជា ភោជនីយដ្ឋាន អាហារដ្ឋាន ផ្ទះសំណាក់ សណ្ឋាគារ គ្លីនិក ឬមន្ទីរសម្រាកព្យាបាលជំងឺ ឬទីកន្លែងផ្សេងៗទៀតដែលបិទជិត ត្រូវណែនាំឱ្យបុគ្គលគ្រប់រូបពាក់ម៉ាស់ បើមិនពាក់ម៉ាស់ទេគឺមិនត្រូវអនុញ្ញាតឱ្យចូលឡើយ លើកលែងតែបុគ្គលដែលស្ថិតនៅក្នុងការលើកលែងខាងលើ។
ចំពោះកាតព្វកិច្ចត្រូវរក្សាគម្លាតសុវត្ថិភាពវិញ គឺបុគ្គលដែលស្ថិតនៅកន្លែងធ្វើការនៃសហគ្រាស ឬគ្រឹះស្ថានឯកជន ទីតាំងអាជីវកម្ម ឬទីកន្លែងសាធារណៈដែលមានមនុស្សច្រើន ត្រូវអនុវត្តគម្លាតសុវត្ថិភាពឱ្យបានយ៉ាងតិច១ម៉ែត្រកន្លះពីបុគ្គលមួយទៅបុគ្គលមួយទៀត។ ប៉ុន្តែក៏លើកលែងផងដែរសម្រាប់អ្នកដែលកំពុងរស់នៅជាមួយគ្នា សម្រាប់ការធ្វើដំណើរក្នុងមធ្យោបាយឯកជន រវាងជនពិការ ចាស់ជរា ឬកុមារជាមួយអ្នកមើលថែទាំពួកគេ ចំពោះអ្នកផ្តល់និងទទួលសេវាកម្មណាមួយ ចំពោះការហ្វឹកហាត់ឬប្រកួតកីឡា និងរវាងកូនកំលោះនិងកូនក្រមុំ ជាដើម។
ដោយឡែក ចំពោះទីតាំងដែលតម្រូវឱ្យពាក់ម៉ាស់និងរក្សាគម្លាតសុវត្ថិភាពវិញ គឺនៅតាមរាល់សហគ្រាស ឬគ្រឹះស្ថានឯកជន ឬទីតាំងអាជីវកម្មគ្រប់ប្រភេទនានា។ ចំណែកទីតាំងភូមិសាស្រ្តវិញ គឺត្រូវអនុវត្តការពាក់ម៉ាស់និងរក្សាគម្លាតសុវត្ថិភាពនៅក្នុងភូមិសាស្រ្តដែលមានការឆ្លងរាលដាលនៃជំងឺកូវីដ-១៩ នៅក្នុងសហគមន៍ដែលកំណត់ និងជូនដំណឹងដោយក្រសួងសុខាភិបាលកម្ពុជា។
បើតាមក្រសួងសុខាភិបាល បើសិនបុគ្គលណាមិនអនុវត្តទៅតាមកាតព្វកិច្ចដែលតម្រូវនេះ គឺជំហានដំបូង ពួកគេនឹងរងនូវការព្រមាន និងណែនាំពីមន្រ្តីសុខាភិបាលឬអាជ្ញាធរមានសមត្ថកិច្ច។ ប៉ុន្តែបើសិននៅតែមិនអនុវត្តទៀត នឹងប្រឈមការពិន័យជាទឹកប្រាក់ពីចន្លោះពី ២០០ ០០០រៀល ទៅ ១ ០០០ ០០០រៀលជាកំហិត។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានថ្លែងគាំទ្រចំពោះប្រកាសរបស់ក្រសួងដែលតម្រូវឱ្យប្រជាពលរដ្ឋពាក់ម៉ាស់នៅតាមទីសាធារណៈនេះ ក៏ប៉ុន្តែលោកមិនគាំទ្រឡើយចំពោះការពិន័យដែលមានទំហំទឹកប្រាក់ច្រើនបែបនេះ។
បើតាមអ្នកឃ្លាំមើលសង្គមរូបនេះ អាជ្ញាធរគួរតែអប់រំផ្សព្វផ្សាយដល់ប្រជាពលរដ្ឋឱ្យបានទូលំទូលាយជាមុនសិន។
លោកមានប្រសាសន៍ដូច្នេះថា៖ «អ្វីដែលក្រសួងសុខាភិបាលគាត់ចេញហ្នឹង គឺគាត់ផ្អែកលើច្បាប់ អញ្ចឹងគាត់ក៏មិនអាចធ្វើអ្វីឱ្យខុសពីខ្លឹមសារច្បាប់ដែរ។ ប៉ុន្តែគ្រាន់តែថា ចំនួននៃការពិន័យនេះ វាច្រើនបន្តិចហើយ និយាយឱ្យការពិតទៅ។ ហើយបើសិនជាការពិន័យហ្នឹង ចំពោះជនខិលខូចដែលមិនចង់ពាក់ មិនចង់ចូលរួមក្នុងការពាក់ម៉ាស់ ឬផ្គើនអញ្ចឹងទៅ អាហ្នឹងពិន័យទៅ»។
ឆ្លើយតបនឹងការលើកឡើងនេះ អភិបាលរាជធានីភ្នំពេញ លោក ឃួង ស្រេង បានថ្លែងថា នៅក្នុងជំហានដំបូងនេះ អាជ្ញាធរនឹងធ្វើការផ្សព្វផ្សាយ អប់រំ ប្រជាពលរដ្ឋជាមុនសិន។ ប៉ុន្តែក្នុងករណីមិនរាងចាល នោះអាជ្ញាធរនឹងអនុវត្តវិធានការតាមច្បាប់។
លោកមានប្រសាសន៍ថា៖ «តែយើងធ្វើការផ្សព្វផ្សាយ ណែនាំគាត់ឱ្យអនុវត្តតាមវិធាន និងការណែនាំរបស់ក្រសួងដែលបានចេញសេចក្តីប្រកាសហ្នឹង ប៉ុន្តែបើគាត់មិនអនុវត្ត យើងនឹងថតរូបគាត់ឬក៏ធ្វើកំណត់ហេតុគាត់ ដើម្បីឱ្យគាត់អនុវត្តលើបញ្ហានេះ ហើយយើងក៏អត់ទាន់ដាក់ទោសដាក់ទណ្ឌគាត់អីបានភ្លាមដែរ យើងត្រូវធ្វើការណែនាំ! សំខាន់លើការអប់រំទេ»។
គួរជម្រាបជូនថា ប្រកាសរបស់ក្រសួងសុខាភិបាលនេះបានធ្វើឡើងបន្ទាប់ពីច្បាប់ស្តីពី «វិធានការទប់ស្កាត់ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវប្រកបដោយគ្រោះថ្នាក់ធ្ងន់ធ្ងរផ្សេងទៀត» ត្រូវបានប្រកាសដាក់ឱ្យប្រើប្រាស់កាលពីថ្ងៃទី១១ ខែមីនា ឆ្នាំ២០២១នេះ៕