អាជ្ញាធររាជធានីភ្នំពេញ នឹងផ្អាកជាបណ្តោះអាសន្ននូវការធ្វើចរាចរណ៍និងសកម្មភាពជួបជុំនានា នៅចន្លោះពីម៉ោង៨យប់ ដល់ម៉ោង៥ព្រឹក ចាប់ពីថ្ងៃទី១ ខែមេសា ដល់ថ្ងៃទី១៤ ខែមេសា ដើម្បីទប់ស្កាត់ការឆ្លងរាលដាលជំងឺកូវីដ-១៩ នៅក្នុងភូមិសាស្រ្តរាជធានីភ្នំពេញ។
យោងតាមសេចក្តីសម្រេច ស្តីពី ការអនុវត្តវិធានការរដ្ឋបាលជាបណ្តោះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ-១៩ នៅក្នុងភូមិសាស្រ្តរាជធានីភ្នំពេញ ចុះថ្ងៃទី០១ ខែមេសានេះ បានបញ្ជាក់ថា នឹងត្រូវបានផ្អាកជាបណ្តោះអាសន្ននូវសកម្មភាពអាជីវកម្មចំពោះតូបអាហារ អាហារដ្ឋាន ភោជនីយដ្ឋាន ហាងកាហ្វេ ហាងភេសជ្ជៈ និងភោជនីយដ្ឋាននៅតាមសណ្ឋាគារ ដែលទទួលអតិថិជនចូលមកទទួលទានអាហារ ភេសជ្ជៈ ឬទទួលទានគ្រឿងស្រវឹង នៅចន្លោះម៉ោង៨យប់ ដល់ម៉ោង៥ទៀបភ្លឺ។
តែយ៉ាងណា សេចក្តីសម្រេចនោះថា ទីតាំងអាជីវកម្មទាំងអស់នេះអាចលក់ជាលក្ខណៈវេចខ្ចប់បាន។
សេចក្តីសម្រេចដដែលបានណែនាំឱ្យផ្អាកជាបណ្តោះអាសន្ននូវការប្រមូលផ្តុំ ឬការជួបជុំគ្នាទទួលអាហារឬគ្រឿងស្រវឹងនានា ចាប់ពីម៉ោង៨យប់ ដល់ម៉ោង៥ភ្លឺ លើកលែងតែការជួបជុំជាលក្ខណៈគ្រួសារ ឬរៀបចំពិធីបុណ្យសព ជាដើម។
រដ្ឋបាលរាជធានីភ្នំពេញ បានបន្តនៅក្នុងសេចក្តីសម្រេចនោះទៀតថា ត្រូវផ្អាកការធ្វើចរាចរណ៍ជាបណ្តោះអាសន្នចន្លោះពីម៉ោង៨យប់ ដល់ម៉ោង៥ទៀបភ្លឺ ប៉ុន្តែត្រូវបានលើកលែងចំពោះការធ្វើដំណើរដោយមូលហេតុសុខភាពបន្ទាន់ ការធ្វើដំណើររបស់បុគ្គលិក ក្រុមគ្រូពេទ្យ ការធ្វើចរាចរណ៍រថយន្តកុងតឺន័រ រថយន្តដឹកទំនិញ រថយន្តបាញ់បេតុង និងរថយន្តសម្រាប់បម្រើឱ្យការដឹកជញ្ជូនទំនិញផ្គត់ផ្គង់ការដ្ឋានសំណង់ ជាដើម។ ការធ្វើដំណើររបស់បុគ្គលិកក្រុមហ៊ុន និងកម្មករ-កម្មការិនីទៅកន្លែងការងារ និងការធ្វើដំណើរចាំបាច់ផ្សេងៗទៀតដែលមានការអនុញ្ញាតពីអាជ្ញាធរមានសមត្ថកិច្ច។
អភិបាលរាជធានីភ្នំពេញ លោក ឃួង ស្រេង បានបញ្ជាក់តាមសារជាសំឡេង និងត្រូវបានផ្សព្វផ្សាយជាសាធារណៈនៅថ្ងៃនេះថា ប្រសិនបើប្រជាពលរដ្ឋមិនអនុវត្តតាមវិធានការនេះទេ អាជ្ញាធររាជធានីភ្នំពេញ នឹងឃាត់យានជំនិះរបស់ប្រជាពលរដ្ឋរក្សាទុកជាបណ្តោះអាសន្ន ចំណែកឯមនុស្សនឹងត្រូវណែនាំឱ្យធ្វើចត្តាឡីស័កនៅតាមផ្ទះរៀងៗខ្លួនក្នុងរយៈពេល១៤ថ្ងៃ។ ប៉ុន្តែលោកបញ្ជាក់ថា នៅថ្ងៃទី១ ខែមេសានេះ អាជ្ញាធរនៅមិនទាន់អនុវត្តនៅឡើយទេ ដោយធ្វើការអប់រំជាមុនសិន៕
