អាជ្ញាធរខេត្តតាកែវ ឱ្យដឹងថា គិតត្រឹមថ្ងៃនេះ ភាគីវៀតណាមនៅមិនទាន់ឆ្លើយតបនឹងសំណើរបស់កម្ពុជាដែលស្នើឱ្យជួយសម្រួលការនាំស្រូវពីខេត្តតាកែវ ទៅកាន់ខេត្តអានយ៉ាង ប្រទេសវៀតណាម តាមច្រកទ្វារព្រំដែនតំបន់បាក់ដៃ (បាកដាយ) នៅឡើយទេ។
អភិបាលខេត្តតាកែវ លោក អ៊ូច ភា បានប្រាប់ វីអូឌី នៅថ្ងៃសុក្រនេះថា លោកបានផ្ញើលិខិតមួយច្បាប់ទៅកាន់ប្រធានគណៈកម្មាធិការប្រជាជនខេត្តអានយ៉ាង កាលពីថ្ងៃទី២៦ ខែមីនា ដើម្បីស្នើសុំឱ្យភាគីវៀតណាមជួយបន្ធូរបន្ថយការរឹតបន្ដឹងនៅច្រកព្រំដែនបាក់ដៃ (បាកដាយ) និងច្រកទ្វារព្រំដែនទ្វេភាគីកំពង់ក្រសាំង (វិញហូយដុង) ដើម្បីផ្តល់លទ្ធភាពឱ្យប្រជាកសិករខ្មែរនាំទំនិញនិងស្រូវទៅលក់នៅប្រទេសវៀតណាម។
លោកបន្តថា ចាប់តាំងពីឆ្នាំ២០២១មក កងកម្លាំងការពារព្រំដែនរបស់ខេត្តអានយ៉ាង បានបិទទាំងស្រុងមិនឱ្យមានការនាំស្រូវចូលតាមច្រកទ្វារទាំងពីរនោះទេ។
លោក អ៊ូច ភា មានប្រសាសន៍ថា៖ «អញ្ចឹងតាំងពីវិធានការកូវីដហ្នឹងមក គេបិទជិតឈឹងទាំងអស់ គ្រប់ច្រកទាំងអស់ ប៉ុន្តែបានយើងសម្របសម្រួលដើម្បីទំនិញចេញចូល។ វៀតណាមគេមិនជំទាស់ទេ គ្រាន់តែថា គេឱ្យយើងបញ្ជូនទៅដាក់ច្រកអន្តរជាតិភ្នំឌិនអី វាមានដំណើរការធម្មតា ប៉ុន្តែយើងចង់បាននៅអង្គរបុរី នៅហ្នឹងវាស្រួល ចង់និយាយថា ស្រូវវានៅហ្នឹងវាស្រួល យើងដឹកមកកំពង់ក្រសាំង ដឹកមក ភ្នំឌិនវាឆ្ងាយ»។
សំណើរបស់ភាគីកម្ពុជានេះ បានធ្វើឡើងបន្ទាប់ពីមានរបាយការណ៍ពីអភិបាលស្រុកអង្គរបុរី ខេត្តតាកែវ កាលពីថ្ងៃទី២៥ ខែមីនានេះថា ការរឹតបន្ដឹងច្រកព្រំដែនទាំងពីរនេះ បានធ្វើឱ្យប៉ះពាល់ដល់ការនាំស្រូវពីស្រុកអង្គរបុរី ទៅលក់នៅក្នុងស្រុកអានភូ ខេត្តអានយ៉ាង ខណៈស្រូវរបស់ប្រជាកសិករខ្មែរនៅក្នុងស្រុកនេះចាប់ផ្តើមទុំ និងកំពុងប្រមូលផល តែបែរជាមិនអាចនាំចេញទៅលក់នៅក្នុងប្រទេសវៀតណាមបានទៅវិញ។
លោកបានបន្តលើកឡើងតាមរយៈលិខិតផ្ញើទៅកាន់អភិបាលស្រុកអានយ៉ាង កាលពីថ្ងៃទី២៥ ខែមីនាថា ជារៀងរាល់ឆ្នាំ សមត្ថកិច្ចច្រកទ្វារទាំងសងខាងតែងតែសម្របសម្រួលឱ្យប្រជាជនជាប់ព្រំដែនរវាងស្រុកទាំងពីរ បានដោះដូរទំនិញគ្នាទៅវិញទៅមក ប៉ុន្តែដោយសារតែមានការផ្ទុះនូវជំងឺកូវីដ-១៩ បានធ្វើឱ្យប្រទេសទាំងពីររឹតបន្ដឹងការនាំចេញនាំចូលទំនិញរៀងៗខ្លួន។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ លោក ញ៉ឹប ស៊្រន បានថ្លែងថា ការរឹតបន្ដឹងការឆ្លងកាត់ច្រកព្រំដែនទ្វេភាគីទាំងពីរនេះ បានធ្វើឱ្យប៉ះពាល់ខ្លាំងដល់ការនាំចេញស្រូវរបស់ប្រជាកសិករខ្មែរ ជាពិសេស ប្រជាកសិករនៅស្រុកអង្គរបុរី ដែលធ្វើស្រូវប្រាំងក្នុង១ឆ្នាំពី១ទៅ៣ដង។
លោកបន្តថា ការខកខាននាំស្រូវទៅលក់នៅក្នុងប្រទេសវៀតណាមនេះ ក៏បានធ្វើឱ្យតម្លៃស្រូវមានការធ្លាក់ចុះផងដែរ ដោយលោកថា តម្លៃស្រូវបច្ចុប្បន្នគឺត្រឹមតែ៩៧០រៀលក្នុង១គីឡូក្រាម ខណៈរាល់ឆ្នាំស្រូវលក់ចេញបានជាង១ ០០០រៀលក្នុង១គីឡូក្រាម។
លោកមានប្រសាសន៍បន្ថែមថា៖ «ឯកឧត្តមអភិបាលគាត់បានសុំទៅហើយ វៀតណាមគេបានបើកច្រកកំពង់ក្រសាំងមួយដែរ តែនៅច្រកបាក់ដៃហ្នឹង គេអត់ទាន់បើក! អ៊ីចឹងទៅ វាមានការលំបាកដែរ គឺការលំបាកត្រង់ថា គាត់អស់ថ្លៃដើមនៃការដឹកជញ្ជូនពីរតង់»។
ប្រជាកសិករម្នាក់រស់នៅភូមិសាមគ្គី ឃុំអង្គរបុរី ស្រុកអង្គរបុរី ខេត្តតាកែវ លោក គង់ សារី បានថ្លែងថា ស្រូវរបស់ប្រជាពលរដ្ឋនៅក្នុងស្រុកអង្គរបុរីចាល់ច្រើន ដោយមិនអាចនាំចេញទៅលក់នៅប្រទេសវៀតណាមបានឡើយ ដោយសារតែភាគីវៀតណាមបានបិទច្រកព្រំដែនមិនឱ្យកសិករខ្មែរនាំស្រូវទៅលក់នៅប្រទេសវៀតណាម។
លោក សារី មានប្រសាសន៍ត្អូញត្អែរយ៉ាងដូច្នេះថា៖ «ឥលូវនេះស្រូវយ៉ាប់ដែរ យ៉ាប់អត់មានអ្នកទិញ ហើយតម្លៃធ្លាក់ចុះថោក ដូចខ្ញុំជម្រាបលោកគ្រូមុនអញ្ចឹង។ ពីដើម ទីកាលពីខែមុនហ្នឹង វាបានរហូតដល់១តៅ១២គីឡូ បាន១២ ០០០ ទៅ១៣ ០០០រៀល ឥលូវ១តៅ១២គីឡូហ្នឹងបានតែ៩ ០០០ ហើយអត់មានអ្នកទិញទៀត! ចាល់ៗច្រើន ប៉ុន្តែមានមួយចំនួនហ្នឹងគេដឹកឡើងដាក់ឡានវិញ»៕
