រដ្ឋលេខាធិការក្រសួងព័ត៌មាន លោក ម៉ៅ អាយុទ្ធ បានទទួលមរណភាពនៅមន្ទីរពេទ្យមិត្តភាពខ្មែរ-សូវៀត ឬពេទ្យរុស្ស៉ី ដោយជំងឺកូវីដ-១៩។
សេចក្តីប្រកាសរបស់អនុគណៈកម្មការស្រាវជ្រាវជំងឺកូវីដ-១៩ លើទំព័រហ្វេសប៊ុក នៅយប់ថ្ងៃទី១៥ ខែមេសានេះ បញ្ជាក់ថា រដ្ឋលេខាធិការក្រសួងព័ត៌មាន លោក ម៉ៅ អាយុទ្ធ បានទទួលមរណភាពនៅល្ងាចថ្ងៃព្រហស្បតិ៍នេះ ដោយសារជំងឺកូវីដ-១៩។
អនុគណៈកម្មការស្រាវជ្រាវជំងឺកូវវីដ-១៩ សរសេរថា៖ «យើងខ្ញុំសូមចូលរួមមរណទុក្ខជាមួយគ្រួសារនៃសព»។
រដ្ឋលេខាធិការក្រសួងព័ត៌មាន លោក ម៉ៅ អាយុទ្ធ មានវ័យ៧៧ឆ្នាំ រស់នៅសង្កាត់បឹងរាំង ខណ្ឌដូនពេញ រាជធានីភ្នំពេញ បានឆ្លងជំងឺកូវីដ-១៩ និងបានចូលសម្រាកនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី៥ ខែមេសា ឆ្នាំ២០២១ ក្រោយពេលធ្វើតេស្តរកឃើញវិជ្ជមានជំងឺនេះ។
មន្ត្រីជាន់ខ្ពស់ក្រសួងព័ត៌មាន និងជាផលិតករភាពយន្តរូបនេះ មានស្នាដៃជាច្រើនក្នុងវិស័យសិល្បៈខ្មែរ ទាំងស្នាដៃផលិតខ្សែភាពយន្ត ផលិតវីដេអូចម្រៀងកាយវិការ កំណាព្យ និងប្រលោមលោក ជាដើម។
លោកបានប្រឡូកក្នុងវិស័យភាពយន្តខ្មែរតាំងពីសម័យសាធារណរដ្ឋខ្មែរ រហូតដល់ពេលបច្ចុប្បន្ន។ ស្នាដៃនិពន្ធ និងផលិតភាពយន្តល្បីល្បាញរបស់លោក រួមមាន រឿង «បិទភ្នែកហែកទ្រូង» ជាស្នាដៃផលិត និងដឹកនាំដំបូងរបស់លោក ក្នុងសម័យសាធារណរដ្ឋខ្មែរ ឆ្នាំ១៩៧៣។ រឿង «ចិត្តចងចាំ» ផលិតឡើងនៅអំឡុងទសវត្សរ៍ឆ្នាំ១៩៨០។ រឿង «ឆ្អឹងអណ្តែត» ផលិតអំឡុងទសវត្សរ៍ឆ្នាំ១៩៩០។
ចំណែកស្នាដៃរបស់លោកដែលល្បីល្បាញខ្លាំងនាសម័យកាលទំនើប គឺរឿង «នេសាទក្រពើ» ដែលទទួលពានមាសជាប់ចំណាត់ថ្នាក់លេខ១ ក្នុងមហោស្រពភាពយន្តវីដេអូជាតិលើកទី២ ឆ្នាំ២០០៥ និងរឿងល្បីល្បាញមួយទៀតដែលជារឿងបែបប្រវត្តិសាស្រ្តប្រចាំឆ្នាំ២០១៧ គឺរឿង «ហ្លួងព្រះស្តេចកន» ផងដែរ៕
