សមត្ថកិច្ចស្រុកបរិបូណ៌ ខេត្តកំពង់ឆ្នាំង អះអាងថា កំពុងស្រាវជ្រាវលើករណីអគ្គិភ័យឆេះផ្ទះមួយកន្លែងដែលបណ្ដាលឱ្យស្ត្រីម្នាក់និងកូន៤នាក់ស្លាប់ និងខូចខាតផ្ទះអស់ទាំងស្រុង។
ទំព័រហ្វេសប៊ុកការិយាល័យផ្សព្វផ្សាយអប់រំ នៃស្នងការដ្ឋាននគរបាលខេត្តកំពង់ឆ្នាំង បានឱ្យដឹងថា ករណីអគ្គិភ័យនេះ បានកើតឡើងកាលពីយប់ថ្ងៃទី៩ ខែឧសភា ឆ្នាំ២០២១ ស្ថិតក្នុងភូមិដើមជ្រែ ឃុំខុនរ៉ង ស្រុកបរិបូណ៌ ខេត្តកំពង់ឆ្នាំង បណ្ដាលឱ្យឆេះផ្ទះមួយខ្នងទំហំ ៧ម៉ែត្រគុណនឹង១២ម៉ែត្រ សង់ពីដែក បាំងនិងប្រក់ស័ង្កសី ដែលមានម្ចាស់ផ្ទះឈ្មោះ នន់ សារ៉េត ភេទប្រុស អាយុ៣៩ឆ្នាំ ជាជនជាតិខ្មែរ។
ប្រភពដដែលបន្តថា អគ្គិភ័យនេះបណ្តាលឱ្យមនុស្សស្លាប់ចំនួន៥នាក់ ហើយសម្ភារប្រើប្រាស់និងផ្ទះត្រូវបានភ្លើងឆេះអស់ទាំងស្រុង។
អធិការនគរបាលស្រុកបរិបូណ៌ លោក ជាង សុវណ្ណារិទ្ធ បានឱ្យដឹងថា ជុំវិញករណីនេះ អាជ្ញាធរកំពុងតែស្រាវជ្រាវរកមូលហេតុដែលនាំឱ្យមានអគ្គិភ័យនេះកើតឡើង ខណៈលោកអះអាងថា ព័ត៌មានបឋមដែលទទួលបានគឺបណ្ដាលមកពីកូនរបស់ជនរងគ្រោះលេងភ្លើងដែកកេះ។
បើតាមអធិការស្រុករូបនេះ ឱ្យដឹងទៀតថា អាជ្ញាធរបានប្រើប្រាស់រថយន្ត៣គ្រឿងក្នុងប្រតិបត្តិការពន្លត់អគ្គិភ័យនេះ។
លោកនិយាយថា៖ «ខ្ញុំមិនអាចរៀបរាប់លម្អិតបានទេ ព្រោះដោយសារតែយើងកំពុងស្រាវជ្រាវ»។
លោក វរលក្ខណ៍ វាសនា អាយុ៤៤ឆ្នាំ អះអាងថា ជាអ្នកជិតខាងជនរងគ្រោះ បានឱ្យដឹងថា អ្នកស្លាប់ទាំង៥នាក់នោះ រួមមាន ស្រ្តីម្នាក់ដែលមានកូនក្នុងផ្ទៃ៤ខែ និងកូនប្រុសចំនួន៤នាក់ ខណៈបុរសជាស្វាមីមិនបាននៅក្នុងផ្ទះនោះទេនៅពេលកើតហេតុ។ លោកបន្តថា ម្ចាស់ផ្ទះដែលត្រូវអគ្គិភ័យឆេះនោះ មានមុខរបរជាអ្នកលក់ខោអាវជជុះ ទើបបណ្ដាលឱ្យអគ្គិភ័យឆេះលឿនបែបនេះ។
លោកនិយាយថា៖ «ផ្ទះគាត់លក់អាវជជុះ កូននៅលើឡៅតឿ ម្ដាយរត់មកបើកទ្វារ តែរត់អត់ទាន់»។
អភិបាលរងខេត្តកំពង់ឆ្នាំង លោក ស៊្រន សំឬទ្ធី មានប្រសាសន៍ថា រដ្ឋបាលខេត្តបានចុះចែកអំណោយមួយចំនួនទៅដល់ជនរងគ្រោះ ខណៈលោកអះអាងថា នឹងមានជំនួយមនុស្សធម៌ជាបន្តបន្ទាប់ទៀត។
លោកនិយាយថា៖ «ខ្ញុំពិតជាសោកស្ដាយចំពោះឧប្បត្តិហេតុបាត់បង់[ជីវិត]ក្នុងពេលតែមួយអ៊ីចឹង»។
ជាមួយគ្នានេះដែរ នៅព្រឹកថ្ងៃទី១០ ខែឧសភា ឆ្នាំ២០២១នេះ ក៏មានករណីគ្រោះអគ្គិភ័យឆេះផ្សារតាខ្មៅ ស្ថិតក្នុងសង្កាត់តាខ្មៅ ក្រុងតាខ្មៅ ខេត្តកណ្ដាល បណ្តាលឱ្យខូចខាតតូបលក់គ្រឿងបន្លាស់ម៉ូតូចំនួន១២តូប តែមិនបណ្តាលឱ្យគ្រោះថ្នាក់ដល់មនុស្សឡើយ។
ទំព័រហ្វេសប៊ុករបស់នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បញ្ជាក់ថា មូលហេតុនៃការឆេះនេះបណ្ដាលមកពីការផ្សារដែករបស់ជាងផ្សារដំបូល ធ្លាក់មកត្រូវប៉ាតង់កៅស៊ូ និងសំបកកង់ម៉ូតូនៅខាងក្រោម ហើយរាលដាលឆេះដល់តូបទាំងនោះតែម្តង។
យោងតាមរបាយការណ៍ទទួលបានពីលោក ង៉ែត សាម៉ុន នាយការិយាល័យរដ្ឋបាលសរុប នៃនាយកដ្ឋាននគរបាលបង្ការពន្លត់អគ្គិភ័យនិងសង្រ្គោះ ឱ្យដឹងថា គិតចាប់តាំងពីដើមខែមករា មកដល់ថ្ងៃទី១៥ ខែមេសា ករណីគ្រោះអគ្គិភ័យនៅទូទាំងប្រទេសបានកើតឡើងចំនួន២៨៩លើក បណ្ដាលឱ្យមានមនុស្សស្លាប់ចំនួន៤នាក់ រងរបួសចំនួន១៧នាក់ និងខូចខាតផ្ទះសម្បែងចំនួន២៤៨ខ្នង។
ប្រភពដដែលបញ្ជាក់ដែរថា មូលហេតុចម្បងដែលនាំឱ្យមានអគ្គិភ័យនេះកើតឡើង ភាគច្រើនដោយសារតែឆ្លងចរន្តអគ្គិសនី៕