រដ្ឋាភិបាលអូស្រ្តាលី បានផ្ដល់ជំនួយបន្ថែមចំនួន៤ ០០០ ០០០ដុល្លារអូស្រ្តាលី (ស្មើជាង៣ ០០០ ០០០ដុល្លារអាមេរិក) ដល់ប្រទេសកម្ពុជា ដើម្បីកាត់បន្ថយផលប៉ះពាល់នៃជំងឺកូវីដ-១៩ មកលើសេដ្ឋកិច្ចនិងពលរដ្ឋ។
យោងតាមសេចក្តីប្រកាសព័ត៌មានដែលផ្សព្វផ្សាយដោយស្ថានទូតអូស្ត្រាលីប្រចាំកម្ពុជា ចុះថ្ងៃទី១១ ខែឧសភា ឆ្នាំ២០២១ ឱ្យដឹងថា រដ្ឋាភិបាលអូស្រ្តាលីបានចុះកិច្ចព្រមព្រៀងជាមួយកម្មវិធីអភិវឌ្ឍន៍សហប្រជាជាតិ (UNDP) ក្នុងការផ្ដល់ថវិកាបន្ថែមនេះដល់កម្ពុជា ដើម្បីឆ្លើយតបនិងស្តារផលប៉ះពាល់សង្គមសេដ្ឋកិច្ចដែលបង្កឡើងដោយសារការរាតត្បាតជាសកលនៃជំងឺកូវីដ-១៩។
សេចក្តីប្រកាសព័ត៌មានបន្តថា ថវិកានេះជាថវិកាបន្ថែមលើមូលនិធិពង្រឹងភាពធន់របស់អូស្ត្រាលី-UNDP ដែលបានបំពេញតួនាទីយ៉ាងសំខាន់ក្នុងការពង្រីកការអនុវត្តកម្មវិធីឧបត្ថម្ភសាច់ប្រាក់ដែលកម្ពុជាកំពុងអនុវត្ត ក្នុងនោះកម្មវិធីនេះ ធ្លាប់បានផ្ដល់សាច់ប្រាក់ចំនួន២៩០លានដុល្លារសហរដ្ឋអាមេរិក ដល់ប្រជាពលរដ្ឋទីទ័លក្រប្រមាណ៦៩៣ ០០០គ្រួសារនៅកម្ពុជា ក្នុងអំឡុងពេលនៃការរាតត្បាតជំងឺកូវីដ-១៩។
សេចក្តីប្រកាសព័ត៌មានបញ្ជាក់ថា៖ «ថវិកា៤លានដុល្លារអូស្ត្រាលីបន្ថែមនេះ នឹងត្រូវប្រើប្រាស់សម្រាប់បន្តការអនុវត្តការងារពង្រឹងកម្មវិធីជំនួយសង្គម និងគាំទ្រដល់អាជីវកម្មនៅក្នុងស្រុក ដើម្បីសម្របខ្លួនទៅតាមស្ថានភាពដែលពួកគេជួបប្រទះ ក្នុងអំឡុងពេលដែលមានការរាតត្បាតជាសកលនៃជំងឺនេះ ព្រមទាំងអាទិភាពដទៃទៀតដែលនឹងត្រូវកំណត់តាមរយៈការពិគ្រោះយោបល់ជាមួយនឹងរាជរដ្ឋាភិបាលកម្ពុជា និងសង្គមស៊ីវិល»។
លោក Pablo Kang ឯកអគ្គរាជទូតអូស្រ្តាលីប្រចាំកម្ពុជា បានថ្លែងក្នុងសេចក្ដីប្រកាសព័ត៌មាននោះថា ជំងឺកូវីដ-១៩ បានបង្កផលប៉ះពាល់ជាច្រើនដល់សេដ្ឋកិច្ចនិងជីវភាពរស់នៅរបស់ប្រជាពលរដ្ឋកម្ពុជា ហើយក្នុងនាមជាដៃគូនិងមិត្តភក្តិយូរអង្វែងរបស់ប្រទេសនេះ រដ្ឋាភិបាលអូស្ត្រាលីចង់ធ្វើអ្វីដែលអាចធ្វើទៅបាន ដើម្បីជួយសម្រាលផលប៉ះពាល់ទាំងនេះ ជាពិសេសផលប៉ះពាល់ទៅលើក្រុមមនុស្សងាយរងគ្រោះជាងគេ។
លោកបានបន្ថែមថា៖ «តាមរយៈការសហការជាមួយនឹង UNDP យើងក៏កំពុងបង្កើនថវិកាគាំទ្រសម្រាប់ការងារដែលចាំបាច់នៅពេលបច្ចុប្បន្ន ដើម្បីជួយកម្ពុជាក្នុងការស្ដារសេដ្ឋកិច្ចឡើងវិញឱ្យបានឆាប់រហ័សប្រកបដោយបរិយាបន្ន បន្ទាប់ការរាតត្បាតជាសកលនេះ[បញ្ចប់ព្រឹត្តិការណ៍សហគមន៍២០កុម្ភៈ]»។
ចំណែកលោក Nick Beresford នាយក UNDP ប្រចាំប្រទេសកម្ពុជា មានប្រសាសន៍ក្នុងសេចក្ដីប្រកាសព័ត៌មាននេះដែរថា អូស្រ្តាលីជាប្រទេសដែលនាំមុខគេក្នុងការផ្ដល់ជំនួយអភិវឌ្ឍន៍យ៉ាងមានប្រសិទ្ធភាពនិងទាន់ពេលវេលា។
លោកបន្តថា៖ «រួមគ្នា! យើងអាចឆ្លើយតបបានយ៉ាងលឿនចំពោះវិបត្តិនេះ តាមរយៈការគាំទ្រដល់ការពង្រីកកម្មវិធីជំនួយសង្គមឱ្យបានឆាប់រហ័ស ឱ្យជំនួយឧបត្ថម្ភនានាបានដល់គ្រួសារដែលត្រូវការជំនួយជាងគេ ហើយក្នុងពេលជាមួយគ្នាក៏ការពារដំណើរការពាណិជ្ជកម្មនិងជីវភាពរបស់ពលរដ្ឋដែរ»៕