មេដឹកនាំអតីតបក្សប្រឆាំងនៅកម្ពុជា ស្នើទៅអង្គការសហប្រជាជាតិ (UN) និងសហគមន៍អន្តរជាតិ ជួយធ្វើអន្តរាគមន៍ទៅរដ្ឋាភិបាលកម្ពុជាឱ្យបញ្ចប់បញ្ហានិទណ្ឌភាពក្នុងប្រទេស ស្របពេលអតីតសកម្មជននិងមន្រ្តីរបស់ខ្លួនរងការប្រើហិង្សាជាបន្តបន្ទាប់។
ប្រធានស្តីទីអតីតគណបក្សសង្គ្រោះជាតិ លោកស្រី មូរ សុខហួរ ថ្លែងតាមសារ WhatsApp នៅថ្ងៃទី១៣ ខែឧសភា ឆ្នាំ២០២១ ថាក្រុមមន្រ្តីគណបក្សនេះនឹងបញ្ចូលករណីហិង្សាលើអតីតមន្រ្តីនិងសកម្មជនរបស់គណបក្សខ្លួនដែលបានកើតឡើងថ្មីៗនេះ ទៅក្នុងរបាយការណ៍និទណ្ឌភាពនៅកម្ពុជា ដើម្បីផ្ញើទៅអង្គការសហប្រជាជាតិ និងប្រទេសប្រជាធិបតេយ្យធំៗ ឱ្យជួយអន្តរាគមន៍ស្វែងរកយុត្តិធម៌ជូនជនរងគ្រោះ។
លោកស្រីមានប្រសាសន៍ថា៖ «យើងជាគណបក្ស ហើយខ្លួនខ្ញុំផ្ទាល់ជាអ្នកធ្វើរបាយការណ៍ជាបន្ទាន់ ជាអ្នកសរុបចំនួននៃករណី ហើយករណីនីមួយៗដែលខ្ញុំ និងឯកឧត្តម អេង ឆៃអ៊ាង ដែលជាអ្នកទទួលបន្ទុក នឹងចាត់វិធានការបន្តទៅទៀតក្នុងការផ្តល់នូវយុត្តិធម៌ ហើយយើងរាយការណ៍ជូនអង្គការសហប្រជាជាតិជាបន្ទាន់»។
បើតាមប្រភពដដែល គិតត្រឹមថ្ងៃទី១៤ ខែឧសភា ឆ្នាំ២០២១ មានអតីតសកម្មជននិងមន្រ្តីគណបក្សសង្គ្រោះជាតិចំនួន៣នាក់បានស្លាប់ ដោយសារអំពើហិង្សាដែលបង្កឡើងដោយជនមិនស្គាល់មុខ ក្នុងចំណោមជនរងគ្រោះសរុបនៅទូទាំងប្រទេសចំនួន៣១នាក់។
ថ្នាក់ដឹកនាំជាន់ខ្ពស់អតីតបក្សប្រឆាំងរូបនេះ ចាត់ទុកអំពើហិង្សាលើអតីតមន្រ្តីនិងសកម្មជនរបស់ខ្លួនកន្លងមកថា ជាការប៉ុនប៉ងមនុស្សឃាតក្រោមការរៀបចំជាប្រព័ន្ធពីមន្រ្តីបក្សកាន់អំណាច តាមការអំពាវនាវរបស់លោកនាយករដ្ឋមន្រ្តី ហ៊ុន សែន ដើម្បីបំបិទសំឡេងប្រឆាំងនយោបាយក្នុងស្រុក។
លោកស្រី មូរ សុខហួរ បានបន្ថែមទៀតថា៖ «ដូចលោក ហ៊ុន សែន បានលើកឡើងអ៊ីចឹង “ងើបមួយ វាយមួយៗ” ផ្នត់គំនិតនេះជាផ្នត់គំនិតខ្មែរសម្លាប់ខ្មែរ។ ដោយសារអី? ដោយសារខ្មែរទាំងនោះជាខ្មែរស្នេហាជាតិ ខ្មែរដែលមិនអាចទទួលយកភាពអយុត្តិធម៌។ ដូច្នេះ រឿងនេះវាស៊ីជម្រៅជ្រៅណាស់ លុះត្រាតែផ្លាស់ប្តូរផ្នត់គំនិតហ្នឹង លុះត្រាតែបញ្ចប់វប្បធម៌និទណ្ឌភាព លុះត្រាតែអ្នកនយោបាយគណបក្សប្រជាជនកុំយកគណបក្សដទៃទៀតទុកជាសត្រូវខ្លួនឯង»។
វីអូឌី មិនអាចទាក់ទងសុំការអត្ថាធិប្បាយភ្លាមៗជុំវិញករណីនេះពីតំណាងការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិប្រចាំកម្ពុជា បានទេ នៅថ្ងៃនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ច្រានចោលការចោទប្រកាន់ដែលថាការប្រើអំពើហិង្សាលើអតីតមន្រ្តីនិងសកម្មជនអតីតគណបក្សសង្គ្រោះជាតិ ពាក់ព័ន្ធរឿងនយោបាយ រៀបចំឡើងដោយគណបក្សប្រជាជនកម្ពុជា។ លោកចាត់ទុកថា បញ្ហាទាំងនោះជាបាតុភាពទំនាស់ក្នុងសង្គមទូទៅកើតឡើងមានជាធម្មតា។
លោកមានប្រសាសន៍ថា៖ «គាត់ [មន្ត្រីអតីតបក្សប្រឆាំង] មានការអី គាត់ចេះតែរើសដាក់ខ្លួន មានការអីចេះតែរឿងនយោបាយ បើគាត់និយាយពីរឿងនយោបាយ មានតែគាត់ធ្វើនយោបាយ បានវាកើតរឿងហ្នឹង! ខ្ញុំមិនចង់ឡងទៅវិញទេ ក៏ប៉ុន្តែយើងត្រូវយល់ថា អ្នកដែលគ្រប់គ្រងមិនចង់ឱ្យកើតមានបញ្ហាកើតឡើងក្នុងសង្គមទេ»។
មន្រ្តីអ្នកនាំពាក្យរូបនេះបន្ថែមថា បញ្ហាបាតុភាពហិង្សាទាំងនោះ គួរតែត្រូវបានរាយការណ៍ទៅកាន់រដ្ឋអំណាចមូលដ្ឋាន និងស្វែងរកភស្តុតាង ឬសាក្សីបំភ្លឺទៅសមត្ថកិច្ច ជាជាងការធ្វើរបាយការណ៍ប្រាប់អង្គការសហប្រជាជាតិ ឬប្រទេសដទៃ ដែលលោកថា ស្ថាប័នទាំងនោះមិនអាចជួយដោះស្រាយឱ្យកម្ពុជាបានឡើយ។
លោក សុខ ឥសាន ថ្លែងថា៖ «ខ្ញុំយល់ថា ការដែលរឿងស្អីពឹងបរទេសៗ វាគ្រាន់តែជាសិទ្ធិ ទស្សនៈធ្វើខ្ញុំបរទេសទេ។ លទ្ធផលជាវិជ្ជមានស្របទៅតាមបំណងរបស់គាត់ វាអត់មានទេ»។
នាយករងនៃអង្គការឃ្លាំមើលសិទ្ធិមនុស្សលីកាដូ លោក អំ សំអាត លើកឡើងថា បញ្ហានិទណ្ឌភាពនៅកម្ពុជានៅតែបន្តកើតមាន ជាពិសេសលើអតីតមន្រ្តីនិងសកម្មជនគណបក្សប្រឆាំង ដែលនាំឱ្យអង្គការសិទ្ធិមនុស្សជាតិ-អន្តរជាតិ និងអ្នករាយការណ៍ពិសេសឧត្តមក្រុមប្រឹក្សាសិទ្ធិមនុស្ស ចាត់ទុកថាជាការធ្វើទុក្ខបុកម្នេញនិងគំរាមកំហែងដល់អ្នកមាននិន្នាការនយោបាយប្រឆាំងរដ្ឋាភិបាល។
លោក អំ សំអាត មានប្រសាសន៍ថា៖ «ត្រូវមានកំណែទម្រង់ប្រព័ន្ធតុលាការនៅកម្ពុជា ដោយធ្វើយ៉ាងម៉េចឱ្យទៅជាប្រព័ន្ធយុត្តិធម៌ តុលាការត្រូវឯករាជ្យ និងត្រូវធានាអំពីសិទ្ធិស្មើគ្នាចំពោះមុខច្បាប់ ធានានូវការរកយុត្តិធម៌សម្រាប់ជនគ្រប់រូបដែលត្រូវបានរងគ្រោះដោយអំពើហិង្សា ទាំងនេះទើបអាចបញ្ចប់និទណ្ឌភាពនៅកម្ពុជាបាន»។
មន្រ្តីឃ្លាំមើលការអនុវត្តសិទ្ធិមនុស្សរូបនេះបន្ថែមថា អ្នកនយោបាយគ្រប់និន្នាការគួរតែបញ្ចប់ការរើសអើងគ្នានិងការខ្វែងគំនិតគ្នា ហើយរួមគ្នាគិតពីប្រយោជន៍ប្រជាពលរដ្ឋជាធំ ដើម្បីធានានិរន្តរភាពជាតិនិងយុត្តិធម៌ក្នុងសង្គម ប្រកាន់យកប្រព័ន្ធប្រជាធិបតេយ្យសេរីពហុបក្ស៕