សាលាដំបូងរាជធានីភ្នំពេញ បដិសេធបណ្ដឹងសុំនៅក្រៅឃុំរបស់«យុវជនខ្មែរថាវរៈ» និង«សមាជិកសមាគមនិស្សិតបញ្ញវន្តខ្មែរ»ចំនួន៧នាក់ ក្រោមហេតុផលថា ដើម្បីរក្សាជនជាប់ចោទទុកជូនតុលាការសម្រាប់បន្តសវនាការ។
តុលាការសាលាដំបូងរាជធានីភ្នំពេញ នៅថ្ងៃអង្គារនេះ បានបើកសវនាការជំនុំជម្រះលើបណ្តឹងសុំនៅក្រៅឃុំរបស់យុវជនខ្មែរថាវរៈ ចំនួន៥នាក់ និងសមាជិកសមាគមនិស្សិតបញ្ញវន្តខ្មែរ ចំនួន២នាក់។ យុវជនខ្មែរថាវរៈ និងសមាជិកសមាគមនិស្សិតបញ្ញវន្តខ្មែរទាំងនោះ មានដូចជា លោក ហ៊ុន វណ្ណៈ, លោក កើត សារ៉ាយ, កញ្ញា ឈឿន ដារ៉ាវី, កញ្ញា អេង ម៉ាឡៃ ហៅ សូ មេត្តា, លោក ថា ឡាវី, លោក មាន ព្រហ្មមុនី និងលោក មួង សុភ័ក្រ្ត។
ប៉ុន្តែក្រោយពីបើកសវនាការរយៈពេលជាង១ម៉ោង ចៅក្រមជំនុំជម្រះសាលាដំបូងរាជធានីភ្នំពេញ លោក ទិតសុទ្ធី បូរ៉ាឆាត បានប្រកាសសាលក្រម ដោយបដិសេធបណ្ដឹងសុំនៅក្រៅឃុំរបស់យុវជនដែលជាសកម្មជនបរិស្ថាននិងសិទ្ធិមនុស្សទាំង៧នាក់នោះ ក្រោមហេតុផលថា ដើម្បីរក្សាជនជាប់ចោទទុកជូនតុលាការពេលបើកសវនាការបន្តទៀត។
មេធាវីការពារក្ដីឱ្យយុវជនខ្មែរថាវរៈ និងសមាជិកសមាគមនិស្សិតបញ្ញវន្តខ្មែរ លោក សំ ចំរើន សម្ដែងការសោកស្ដាយចំពោះសេចក្ដីសម្រេចរបស់តុលាការពេលនេះ ដោយចាត់ទុកការសម្រេចនោះថាមិនបានផ្ដល់យុត្តិធម៌ដល់កូនក្ដីរបស់លោកឡើយ។
លោកបន្តថា កូនក្ដីរបស់លោកទាំង៧នាក់ត្រូវបានតុលាការឃុំខ្លួនរយៈពេលជាង៩ខែមកហើយ ដោយលោកថា ការឃុំខ្លួននេះបានលើសពីច្បាប់កំណត់ទៀតផង។
លោកបានបញ្ជាក់ថា៖ «ការឃុំខ្លួនរបស់ចៅក្រមស៊ើបសួរនិងជម្រះ មានរយៈពេលតែ៧ខែទេ! អ៊ីចឹងរយៈពេល៧ខែ ចៅក្រមត្រូវបញ្ចប់នីតិវិធីរបស់ខ្លួន ត្រូវមានសាលក្រមសម្រេចមួយ កូនក្ដីយើង៧នាក់ មានទោសអត់? ប៉ុន្តែសម្រាប់ពេលនេះ មានរយៈពេល៩ខែជាងហើយ មិនទាន់មានសាលក្រមអង្គសេចក្ដីណាមួយថាពួកគេមានទោសឬអត់ទេ»។
អ្នកស្រី កើត រី ដែលត្រូវជាបងស្រីបង្កើតរបស់លោក កើត សារ៉ាយ ចាត់ទុកការបដិសេធបណ្ដឹងសុំនៅក្រៅឃុំរបស់តុលាការពេលនេះថា ជារឿងអយុត្តិធម៌សម្រាប់គ្រួសាររបស់ពួកគាត់ ខណៈដែលពួកគាត់ពុំបានប្រព្រឹត្តកំហុសដូចការចោទប្រកាន់។
អ្នកស្រីបន្ថែមទៀតថា៖ «តុលាការកម្ពុជាឥតមានតម្លាភាព ឯករាជ្យ ដោយតែងតែពន្យារពេលទុក លើកហើយលើកទៀត នូវសំណុំរឿងលោកប្អូនរបស់ខ្ញុំនិងសមាជិកខ្មែរថាវរៈ»។
ចំណែកកញ្ញា អេង វណ្ឌី ប្អូនស្រីរបស់កញ្ញា អេង ម៉ាឡៃ បានអំពាវនាវដល់តុលាការនិងរដ្ឋាភិបាលទម្លាក់ចោលការចោទប្រកាន់លើយុវជនខ្មែរថាវរៈ និងសមាជិកសមាគមសម្ព័ន្ធនិស្សិតបញ្ញាវន្តខ្មែរ ឱ្យមានសេរីភាពវិញ ខណៈបច្ចុប្បន្នពួកគាត់កំពុងមានបញ្ហាសុខភាពផងដែរ។
កញ្ញារៀបរាប់ថា៖ «ដូចបងសុភ័ក្រ្ត គាត់និយាយថា គាត់មានបញ្ហាសុខភាព ឥលូវគាត់ស្គមខ្លាំងមែនទែន និយាយមួយម៉ាត់ទៅដូចខ្មោចអ៊ីចឹង ហើយពួកគាត់ម្នាក់ៗមានសុខភាពទ្រុឌទ្រោមខ្លាំង។ ដូចជាបងស្រីកញ្ញាផ្ទាល់ មានជំងឺឈឺជើងខ្លាំង ហើយលោក មាន ព្រហ្មមុនី មានបញ្ហាសុខភាពស្គមខ្លាំង។ ខ្ញុំស្នើសុំឱ្យរដ្ឋាភិបាលកាត់ក្តីនិងដោះលែងពួកគាត់ឱ្យបានឆាប់ៗ ឱ្យមានសេរីភាពទាំងអស់គ្នា»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព សង្កេតឃើញថា យុវជនដែលធ្វើការងារសង្គមនិងសកម្មជននយោបាយភាគច្រើន មិនសូវត្រូវបានតុលាការឱ្យពួកគាត់នៅក្រៅឃុំបណ្ដោះអាសន្នទេ បើទោះបីជាមេធាវីខ្នះខ្នែងតវ៉ានិងស្នើសុំយ៉ាងណាក្ដី។
លោកស្រីបន្តថា ពួកគាត់ភាគច្រើនក៏ប្រឈមនឹងការចោទប្រកាន់និងឃុំខ្លួនពីសំណាក់តុលាការ ផ្ទុយពីអ្នកមានទ្រព្យធននិងឧកញ៉ាមួយចំនួនដែលត្រូវបានសម្របសម្រួលនិងបន្ធូរបន្ថយឱ្យនៅក្រៅឃុំបណ្ដោះអាសន្ន ហើយករណីខ្លះទៀតត្រូវបានតុលាការសម្រេចបញ្ចប់រឿងត្រឹមពាក្យសុំទោស ជាដើម។
លោកស្រីថា៖ «ខាងស្ថាប័នតុលាការត្រូវពិនិត្យអំពីនីតិរដ្ឋ ហើយនិងភាពស្មើគ្នារបស់ពលរដ្ឋចំពោះមុខច្បាប់ហ្នឹង។ ខ្ញុំមើលទៅទាមទារឱ្យតុលាការ លោកត្រូវមើលឃើញថា ការដាក់ឃុំខ្លួនបណ្ដោះអាសន្ននេះ គួរតែជាជម្រើសចុងក្រោយបំផុត មិនមែនលក្ខខណ្ឌដែលត្រូវតែធ្វើគ្រប់ករណីទេ។ យើងឃើញហើយ ករណីសកម្មជននយោបាយ សកម្មជនសិទ្ធិមនុស្ស ទោះបីជាមានការធានាអះអាងថាពួកគាត់នឹងសហការរាល់នីតិវិធី នៅតែមិនបានការបន្ធូរបន្ថយចំពោះករណីពួកគាត់»។
លោកស្រី ចក់ សុភាព ចាត់ទុកការឃុំខ្លួនយុវជនខ្មែរថាវរៈនិងសមាជិកសមាគមនិស្សិតបញ្ញវន្តខ្មែរបណ្ដោះអាសន្ននេះ ថាបានធ្វើឱ្យប៉ះពាល់សិទ្ធិសេរីភាពរបស់ពួកគាត់ ខណៈដែលតុលាការមិនទាន់សម្រេចសេចក្ដីថាពួកគាត់មានទោសនៅឡើយនោះ។
ក្រុមយុវជនខ្មែរថាវរៈ និងសមាជិកសមាគមនិស្សិតបញ្ញវន្តខ្មែរ ទាំង៧នាក់ ត្រូវបានតុលាការចោទប្រកាន់ពីបទ «ញុះញង់ឱ្យមានភាពវឹកវរដល់សន្តិសុខសង្គម និងផ្តើមគំនិតញុះញង់ឱ្យមានភាពវឹកវរដល់សន្តិសុខសង្គម»។ ការចាប់ខ្លួននិងចោទប្រកាន់ក្រុមយុវជនទាំងនេះ ពាក់ព័ន្ធករណីពួកគេចូលរួមតវ៉ានិងគ្រោងជួបជុំគ្នាដោយសន្តិវិធីនៅទីលានប្រជាធិបតេយ្យរាជធានីភ្នំពេញ ក្នុងអំឡុងខែសីហា និងខែកញ្ញា ឆ្នាំ២០២០ ដើម្បីទាមទារឱ្យដោះលែងលោក រ៉ុង ឈុន។
ប្រធានសហភាពការងារកម្ពុជា និងជាអតីតសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) មកពីអតីតគណបក្សសង្រ្គោះជាតិ លោក រ៉ុង ឈុន ត្រូវបានសមត្ថកិច្ចចាប់ខ្លួនកាលពីថ្ងៃទី៣១ ខែកក្កដា ឆ្នាំ២០២០ ក្រោយពេលលោកបានចេញសេចក្តីថ្លែងការណ៍និងអត្ថាធិប្បាយជុំវិញបញ្ហាព្រំដែនកម្ពុជា-វៀតណាម នៅក្នុងខេត្តត្បូងឃ្មុំ៕
អត្ថបទទាក់ទង
តុលាការដោះលែងកូនឧកញ៉ា ហេង សៀ ក្រោយពួកគេថាមិនបានផលិតវីដេអូអាសអាភាស
តុលាការសាលាដំបូងរាជធានីភ្នំពេញ ដោះលែងកូនប្រសារប្រុសនិងកូនស្រីបង្កើតឧកញ៉ា ហេង សៀ ក្រោយពីពួកគេសុំទោសជាសាធារណៈ និងថាមិនបានផលិតវីដេអូនិងរូបអាសអាភាសពាក់ព័ន្ធនឹងកញ្ញា មាន ពេជ្ររីតា ជាមួយនឹងឪពុករបស់ខ្លួនទេ។
