ក្រុមអ្នកនយោបាយនិងគណបក្សនៅក្រៅរដ្ឋាភិបាល ហៅសារអំពាវនាវរបស់គណបក្សកាន់អំណាចឱ្យមានការចូលរួមថែរក្សា «ការពារសន្តិភាព» ថាជានយោបាយប្រជាភិថុតិ ដោយចាត់ទុកសន្តិភាពដែលបានលើកឡើងនេះមានតែនៅលើក្រដាសប៉ុណ្ណោះ។
ការរិះគន់របស់គណបក្សនិងក្រុមអ្នកនយោបាយទាំងនេះ ធ្វើឡើងស្របពេលដែលគណបក្សកាន់អំណាច រំឭកពីសោកនាដកម្មនៃរបបខ្មែរក្រហម នៅថ្ងៃទិវាជាតិនៃការចងចាំ ថ្ងៃទី២០ ខែឧសភា។ ក្នុងសារនៅលើទំព័រហ្វេសប៊ុកនៅថ្ងៃនេះ គណបក្សប្រជាជនកម្ពុជា បានអំពាវនាវឱ្យភាគីពាក់ព័ន្ធទាំងអស់ត្រូវចូលរួមរក្សាឱ្យបាននូវសុខសន្តិភាព ហើយប្រឆាំងការវិលត្រឡប់មកវិញនូវរបបខ្មែក្រហម។
ថ្លែងពីប្រទេសបារាំង នៅថ្ងៃទី២០ ខែឧសភានេះ អតីតតំណាងរាស្ត្រគណបក្សសង្គ្រោះជាតិ លោក ម៉ែន សុថាវរិន្រ្ទ មានប្រសាសន៍ថា សន្តិភាពដែលគណបក្សប្រជាជនកម្ពុជាលើកឡើងនេះ គ្រាន់តែជារឿងដែលល្អមើលតែប៉ុណ្ណោះ តែយកជាការមិនបាន។ លោកបន្ថែមថា រដ្ឋាភិបាលបច្ចុប្បន្នបានបង្កើតឱ្យមានការឈឺចាប់ជាច្រើន ដូចជា ការរំលាយបក្សសង្រ្គោះជាតិ ដែលធ្វើឱ្យលំហនៃលទ្ធិប្រជាធិបតេយ្យត្រូវរួមតូច ព្រមទាំងការធ្វើទុក្ខបុកម្នេញសកម្មជននយោបាយប្រឆាំងនៅតាមមូលដ្ឋាន ជាដើម។
លោកបន្តថា៖ «សុខសន្តិភាពដែលខាងគណបក្សប្រជាជនកម្ពុជាដែលគាត់តែងនិយាយហ្នឹង គឺនិយាយតែលើក្រដាសនិងបបូរមាត់ប៉ុណ្ណោះ។ ដូច្នេះ អត់មានជាក់ស្តែងទេ! ជាក់ស្តែងដើម្បីឱ្យមានសុខសន្តិភាពពិតប្រាកដ ទាល់តែឱ្យគេសុខសន្តិភាពតាមផ្លូវកាយនិងផ្លូវចិត្ត។ ហើយសុខសន្តិភាពទាំងអស់គ្នាតែម្តង មិនមែនសុខតាមតែគណបក្សនីមួយៗទេ គឺសុខសន្តិភាពទាំងអស់គ្នានៅទូទាំងប្រទេសកម្ពុជា»។
អតីតសមាជិកគណៈកម្មាធិការអចិន្ត្រៃយ៍ និងជាប្រធានក្រុមការងារប្រចាំខេត្តសៀមរាបរបស់បក្សឆាំងរូបនេះ បន្ថែមថា ដើម្បីទទួលបានសន្តិភាពពិតប្រាកដ លុះត្រាតែរដ្ឋាភិបាលផ្តល់សម្បទាឱ្យអតីតគណបក្សប្រឆាំងវិលចូលឆាកនយោបាយឡើងវិញ ព្រមទាំងបើកផ្លូវឱ្យគ្រប់ភាគីដទៃទៀតដែលជាតួអង្គនៃលទ្ធិប្រជាធិបតេយ្យបានបំពេញការងាររបស់ពួកគេ ដោយមិនមានការព្រួយបារម្ភនិងភ័យខ្លាច។
ចំណែកលោក យ៉ង សាំងកុមារ ប្រធានគណៈកម្មាធិការនាយក នៃគណបក្សប្រជាធិបតេយ្យមូលដ្ឋានវិញ ថ្លែងថា ដើម្បីឱ្យមានសន្តិភាពទៅបាន ដរាបណាការគំរាមកំហែងបក្សនយោបាយនៅមូលដ្ឋានត្រូវបានធានា គម្លាតនៃភាពក្រីក្រត្រូវបានកាត់បន្ថយជាអតិបរមា ហើយជម្លោះដីធ្លីត្រូវបានដោះស្រាយ ជាពិសេសពលរដ្ឋគ្រប់រូបត្រូវមានសិទ្ធិស្មើគ្នាចំពោះមុខច្បាប់ និងទទួលបានយុត្តិធម៌សង្គមពេញលេញ។
លោកមានប្រសាសន៍ថា៖ «សេរីភាពនយោបាយ យើងឃើញប្រជាពលរដ្ឋនៅតែរស់នៅភ័យខ្លាច។ ភ័យខ្លាចការបញ្ចេញមតិ ភ័យខ្លាចចូលរួមនៅក្នុងសកម្មភាពនយោបាយ សូម្បីជាមួយគណបក្សប្រជាធិបតេយ្យមូលដ្ឋានក៏ដូច្នោះដែរ ភ័យខ្លាចតែគេតាមដាន គេសម្លុត គេគំរាមអ៊ីចឹងទៅ។ ដូច្នេះ សន្តិភាព លុះត្រាតែមានប្រជាពលរដ្ឋរស់នៅដោយគ្មានការភ័យខ្លាច»។
ផ្ទុយពីការលើកឡើងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា កម្ពុជាក្រោមការដឹកនាំរបស់គណបក្សប្រជាជនកម្ពុជាក្នុងរយៈពេលប្រមាណ៤០ឆ្នាំមកនេះ ប្រជាពលរដ្ឋអាចដើរហើរនិងបំពេញការងាររបស់ខ្លួនដោយសេរីនិងមិនមានការភ័យខ្លាចទេ។
លោកបន្តថា៖ «ដោយសារគាត់មិនបានកាន់អំណាច មិនបានឈ្នះឆ្នោត ទៅដល់ណា គាត់ចេះតែគិតគូរចង់បានអំណាចហ្នឹង។ ប្រជាពលរដ្ឋបោះឆ្នោតឱ្យគាត់ហ្នឹង មិនបានជាប់ឆ្នោត! តែប៉ុណ្ណឹងទេ រឿងសន្តិភាពផ្លូវចិត្តនោះ។ ព្រះលោកចែងហើយថា កាលបើយើងមានជីវិតហើយ សន្តិភាពផ្លូវចិត្តអត់មានទេ។ តែយើងយកសន្តិភាពផ្លូវការ សន្តិភាពក្នុងជីវិតរស់នៅប្រចាំថ្ងៃ និងសន្តិភាពក្នុងប្រទេសទាំងមូល អាហ្នឹងបានសន្តិភាពពិតហើយ។ យើងមានសង្រ្គាមពីណាមក? តាំងពីឆ្នាំ១៩៩៨មក គឺអត់មានទេ»។
នាយកវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន យល់ឃើញថា កម្ពុជាទទួលបានសន្តិភាពមួយផ្នែក បើគេពិនិត្យទៅលើបញ្ហាសន្តិសុខសង្គម ដូចជា មិនមានសង្គ្រាមស៊ីវិលដូចកាលពី៤០ឆ្នាំមុន ជាដើម។ លោកយល់ថា នៅមានបញ្ហាមួយចំនួនដែលមិនទាន់ត្រូវបានដោះស្រាយ ដើម្បីឱ្យកម្ពុជាមានសន្តិភាពពេញលេញ។
លោកបន្តថា៖ «ចំពោះស្រុកខ្មែរយើងវិញ យើងមានសន្តិភាពដែរ ប៉ុន្តែមិនទាន់ពេញលេញទេ ដូចជា ការបែកបាក់គ្នារវាងអ្នកនយោបាយ ហើយសង្គមយើងក៏នៅមានការរឹតត្បិតសិទ្ធិសេរីភាព ឯដំណើរការប្រជាធិបតេយ្យមានឡើងមានចុះ ការឈ្លោះទាស់ទែងគ្នារវាងជាតិសាសន៍ មានតួយ៉ាងដូចការបែងចែកខណ្ឌសីមារវាងគណបក្សកាន់អំណាចនិងអតីតគណបក្សសង្គ្រោះជាតិ ជាដើម »។
សម្រាប់អ្នកជំនាញផ្នែកប្រជាធិបតេយ្យរូបនេះ ការផ្តល់សិទ្ធិសេរីភាពផ្នែកបញ្ហាស្មារតីនិងសិទ្ធិធ្វើនយោបាយ ជាពិសេសយុត្តិធម៌សង្គមតាមរយៈតុលាការដែលធ្វើការដោយឯករាជ្យ ទើបជាមូលដ្ឋាននៃសន្តិភាពពិត៕
