អង្គការសង្គមស៊ីវិល គាំទ្រចំពោះរដ្ឋបាលខេត្តកំពង់ស្ពឺដែលធ្វើយុទ្ធនាការដកហូតនិងរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងនៅក្នុងខេត្តនេះ ដោយចាត់ទុកវិធានការរបស់អាជ្ញាធរខេត្តថា ជាជំហានចាប់ផ្តើមដ៏ល្អមួយសម្រាប់កម្ពុជា។
រដ្ឋបាលខេត្តកំពង់ស្ពឺ បានដាក់ចេញនូវវិធានការរដ្ឋបាលរបស់ខ្លួន ពាក់ព័ន្ធនឹងការផ្សាយពាណិជ្ជកម្មគ្រឿងស្រវឹងនេះ នៅក្នុងកិច្ចប្រជុំមួយកាលពីថ្ងៃទី២០ ខែឧសភា ម្សិលមិញ។ វិធានការដែលក្រុមអង្គការមិនមែនរដ្ឋាភិបាលចាត់ទុកថាជាយុទ្ធនាការលុបបំបាត់នៃការលើកកម្ពស់គ្រឿងស្រវឹងនេះ ត្រូវបានរដ្ឋបាលខេត្តកំពង់ស្ពឺប្តេជ្ញាថានឹងលែងឱ្យមានទៀតហើយ ចំពោះព័ត៌មានស្តីពីផលិតផលស្រាបៀរនៅលើផ្ទាំងប៉ាណូនៅតាមទីសាធារណៈក្នុងខេត្តមួយនេះ។
នាយកប្រតិបត្តិនៃអង្គការចលនា ដើម្បីសុខភាពកម្ពុជា លោក មុំ គង់ ឱ្យដឹងនៅថ្ងៃទី២១ ខែឧសភា នេះថា ការសម្រេចចិត្តរបស់រដ្ឋបាលខេត្តកំពង់ស្ពឺ បញ្ឈប់លែងឱ្យមានផ្ទាំងប៉ាណូផ្សាយពាណិជ្ជកម្មស្រាបៀរនេះ ជាសញ្ញាវិជ្ជមានល្អមួយសម្រាប់កម្ពុជា។
តែយ៉ាងណា លោកថា យុទ្ធនាការត្រឹមនេះនៅមិនគ្រប់គ្រាន់នៅឡើយទេ ប្រសិនបើមធ្យោបាយនៃការផ្សព្វផ្សាយស្រាបៀរនេះត្រូវបានរកឃើញនៅតាមរូបភាពផ្សេងៗទៀត។
លោកបន្តថា៖ «សម្រាប់ខ្ញុំ ខ្ញុំគិតថា ការចាត់វិធានការរបស់រដ្ឋបាលខេត្តកំពង់ស្ពឺ គឺជាការចាប់ផ្តើមល្អមួយ។ ប៉ុន្តែគួរតែឱ្យបានទូលំទូលាយគ្របដណ្តប់ការហាមឃាត់ការផ្សាយពាណិជ្ជកម្មតាមវិទ្យុ ទូរទស្សន៍ សារព័ត៌មាន និងមធ្យោបាយដទៃទៀតដែរ ហើយឱ្យបានគ្រប់ក្រុងគ្រប់ខេត្តរួមគ្នា មិនត្រឹមតែខេត្តកំពង់ស្ពឺមួយទេ»។
ចំណែកលោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព សាទរចំពោះចំណាត់ការក្នុងការប្រយុទ្ធប្រឆាំងការប្រើប្រាស់គ្រឿងស្រវឹងនៅពេលនេះ។
លោកបន្តថា ការបញ្ឈប់ឱ្យមានព័ត៌មានស្អេកស្កះនៅលើផ្ទាំងប៉ាណូនានាអំពីគ្រឿងស្រវឹង គឺជាវិធីកាត់ផ្តាច់ចំពោះការលើកកម្ពស់នៃការផ្សព្វផ្សាយផលិតផលគ្រឿងស្រវឹង។ បន្ថែមពីលើនេះ លោកមើលឃើញថា នេះជាយុទ្ធសាស្រ្តថ្មីមួយ ដែលនឹងក្លាយជាគំរូសម្រាប់តំបន់ផ្សេងទៀតដែលនឹងឈានទៅអនុវត្តដូចគ្នានេះដែរ។
លោកបន្តថា៖ «នេះជាការប្តេជ្ញាចិត្តមួយយ៉ាងល្អប្រពៃហើយ ខ្ញុំគិតថា ខ្ញុំមានការស្វាគមន៍ចំពោះអាជ្ញាធរដែលខេត្តកំពង់ស្ពឺនេះធ្វើការសម្រេចចិត្តយ៉ាងត្រឹមត្រូវ នៅក្នុងការការពារតម្លៃសីលធម៌សង្គមកម្ពុជា ក៏ដូចជាការគិតទៅដល់សុខុមាលភាពរបស់ប្រជាពលរដ្ឋជាចម្បង»។
អភិបាលខេត្តកំពង់ស្ពឺ លោក វ៉ី សំណាង មានប្រសាសន៍ថា ក្រោយផែនការដែលបានដាក់ចេញ គណៈបញ្ជាការឯកភាពចំណុះឱ្យខេត្ត ចាប់អនុវត្តហើយនូវវិធានការរដ្ឋបាលទៅតាមគោលដៅនីមួយៗ ដែលនឹងត្រូវបញ្ចប់ការផ្សាយពាណិជ្ជកម្ម ចំពោះផ្ទាំងប៉ាណូឬស្លាកយីហោដែលជ្រកក្រោមស្លាកស្រាបៀរនេះ។
បើតាមអភិបាលខេត្តរូបនេះ ក្រោយពីជូនដំណឹងនិងបានកំណត់ថ្ងៃឱ្យម្ចាស់អាជីវកម្មរុះរើស្លាកចេញហើយ បើម្ចាស់អាជីវកម្មទាំងនោះមិនអនុវត្តទេ វិធីចុងក្រោយ កម្លាំងចម្រុះនឹងត្រូវអនុវត្តទៅតាមផែនការដែលបានគ្រោងទុក។
លោកបន្តថា៖ «យើងនឹងជូនដំណឹងជាលាយលក្ខណ៍អក្សរ ទុករយៈពេលឱ្យប៉ុន្មានថ្ងៃអ៊ីចឹងទៅ។ ហើយយើងអនុវត្តផ្ទាល់ ក្នុងករណីគេមិនធ្វើតាមយើង យើងមានក្រុមការងាររបស់ខេត្តដែលដឹកនាំដោយអភិបាលរងខេត្តមួយរូប គាត់នឹងដឹកនាំក្រុមការងារចុះទៅ អាចកាត់ អាចទម្លាក់អ៊ីចឹងទៅ»។
យ៉ាងណា យុទ្ធនាការដែលដាក់ចេញដោយរដ្ឋបាលខេត្តកំពង់ស្ពឺនៅពេលនេះ ធ្វើឡើងស្របពេលវិធានរដ្ឋបាលដែលដាក់ចេញដោយរដ្ឋាភិបាលកំពុងនៅជាធរមាននៅឡើយ អំពីបម្រាមនៃការទទួលទាននិងលក់ដូរគ្រឿងស្រវឹងក្នុងអំឡុងពេលផ្ទុះការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈនេះ។
ជាអាជីវករលក់ភេសជ្ជៈគ្រប់មុខនៅទីរួមខេត្តកំពង់ស្ពឺ លោក សុខ ម៉ៅ អះអាងថា លោកនឹងចូលរួមអនុវត្តតាមវិធានរដ្ឋបាលដែលដាក់ចេញដោយអាជ្ញាធរខេត្ត។ លោកបន្តថា ថ្វីត្បិតទីតាំងរបស់លោកមានយីហោភ្ជាប់ដោយផ្ទាំងប៉ាណូផ្សាយពីផលិតផលស្រាបៀរមែន តែលោកនឹងរុះរើចេញ។
លោក សុខ ម៉ៅ យល់ឃើញថា នេះជាមធ្យោបាយល្អ ដើម្បីឈានទៅកាត់បន្ថយការប្រើប្រាស់គ្រឿងស្រវឹងហួសប្រមាណពីអ្នកទទួលសេវា។
លោកបន្តថា៖ «និយាយរួម បើខាងរដ្ឋបាលខេត្តគេមានចំណាត់ការអ៊ីចឹង ខាងខ្ញុំជាអាជីវករហ្នឹងសប្បាយចិត្តនិងពេញចិត្តឱ្យដក ហើយឱ្យដកទូទាំងប្រទេសទៅ ហើយអត់មានប៉ះពាល់ចំណូលអីទេ ទោះបីជាប៉ះពាល់ ក៏សប្បាយចិត្តដែររឿងដកស្ពតពាណិជ្ជកម្មគ្រឿងស្រវឹង»។
ទាក់ទិនបញ្ហានេះ ក្រសួងសុខាភិបាលបានផ្តើមឱ្យមានសេចក្តីព្រាងច្បាប់ស្តីពីការគ្រប់គ្រងគ្រឿងស្រវឹង ប៉ុន្តែច្បាប់នេះ បានបាត់ដំណឹងទៅវិញ ក្រោយពីរដ្ឋមន្រ្តីក្រសួងសុខាភិបាល លោក ម៉ម ប៊ុនហេង ប្រកាសថា នឹងបញ្ជូនទៅគណៈរដ្ឋមន្រ្តី ដើម្បីពិនិត្យនិងសម្រេចនៅដើមឆ្នាំ២០១៦។
វីអូឌី ពុំអាចសុំការបំភ្លឺបន្ថែមពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានទេ អំពីការប្រព្រឹត្តទៅនៃសេចក្តីព្រាងច្បាប់នេះ។
បើទោះជាបែបណា មជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានបង្ហាញពីលទ្ធផលនៃការស្ទង់មតិរបស់ខ្លួននៅអំឡុងឆ្នាំ២០១៧ ដោយរកឃើញថា មានមនុស្សប្រមាណ៩០ភាគរយបានឃើញការផ្សព្វផ្សាយពីផលិតផលគ្រឿងស្រវឹងនៅតាមមធ្យោបាយផ្សេងៗ ហើយក្នុងចំណោមអ្នកដែលបានឃើញការផ្សព្វផ្សាយនោះ ប្រមាណ៧០ភាគរយ ចង់សាកល្បងប្រើប្រាស់គ្រឿងស្រវឹងទាំងនេះ៕