អតីតគ្រូពេទ្យដែលរងការបណ្តេញចេញពីក្របខណ្ឌជាមន្ត្រីសុខាភិបាលជាន់ខ្ពស់នៅក្នុងខេត្តប៉ៃលិន បានដាក់ពាក្យប្តឹងជាថ្មីទៅកាន់ក្រសួងមុខងារសាធារណៈ ដើម្បីឱ្យជួយអន្តរាគមន៍ឱ្យលោកបានចូលបម្រើការងារឡើងវិញ។
ពាក្យបណ្តឹងរបស់លោក ខឹម មុនីកុសល ចុះថ្ងៃទី២៦ ខែឧសភា មានកម្មវត្ថុប្តឹងតវ៉ាទៅនឹងលិខិតរបស់គណៈកម្មាធិការសម្រុះសម្រួលទំនាស់ពាក់ព័ន្ធនឹងកិច្ចការមុខងារសាធារណៈខេត្តប៉ៃលិន កាលពីថ្ងៃទី២៤ ខែឧសភា ដែលបានរក្សាតាមដីកាសម្រេចចុះថ្ងៃទី១៩ ខែមិនា ទុកជាបានការដដែល។
នៅក្នុងពាក្យបណ្តឹងនៅថ្ងៃទី២៦ ខែឧសភា លោក ខឹម មុនីកុសល បានសំណូមពរឱ្យរដ្ឋមន្ត្រីក្រសួងមុខងារសាធារណៈ ជួយអន្តរាគមន៍ដើម្បីឱ្យលោកបានចូលបម្រើការងារនៅក្នុងក្របខណ្ឌមន្ត្រីសុខាភិបាលឡើងវិញ។
ការសម្រេចដាក់ពាក្យបណ្តឹងនេះបានធ្វើឡើងក្រោយពីលទ្ធផលសម្រុះសម្រួលគ្នាពីរលើករវាងលោក ខឹម មុនីកុសល និងរដ្ឋបាលខេត្តប៉ៃលិន កាលពីថ្ងៃទី១៨ និងថ្ងៃទី២១ ខែឧសភានោះ ភាគីទាំងពីរនៅតែប្រកាន់ជំហររៀងៗខ្លួនមិនទទួលយកនូវសំណើនិងសំណូមពររបស់ភាគីណាមួយឡើយ។
វីអូឌី មិនអាចទាក់ទងសុំការឆ្លើយតបពីលោក ព្រុំ សុខា រដ្ឋមន្ត្រីក្រសួងមុខងារសាធារណៈបានទេនៅថ្ងៃព្រហស្បតិ៍នេះ ដោយជំនួយការរបស់លោកប្រាប់ថា លោកកំពុងជាប់ប្រជុំ។
យ៉ាងណាក្តី លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព យល់ឃើញថា ការប្រព្រឹត្តកំហុសរបស់លោក ខឹម មុនីកុសល មិនគួរឈានដល់ការបណ្តេញលោកចេញពីក្របខណ្ឌមន្ត្រីរាជការនោះទេ។ លោកបន្តថា ប្រសិនបើមន្ត្រីរាជការងាយនឹងដកចេញពីតំណែងឬបណ្តេញចេញពីក្របខណ្ឌបែបនេះ វានឹងធ្វើឱ្យប្រព័ន្ធដឹកនាំមុខងារសាធារណៈរបស់កម្ពុជាទន់ខ្សោយ។
លោកបានថ្លែងថា៖ «ដូចខ្ញុំថា បើសិនជានៅខេត្តដោះស្រាយមិនចេញ ដោះស្រាយមិនយុត្តិធម៌ដល់គាត់ទេ គឺមានតែក្រសួងមុខងារសាធារណៈហ្នឹងជាអ្នកដោះស្រាយបញ្ហា ថាតើគួរតែផ្តល់ក្របខណ្ឌឱ្យគាត់វិញឬក៏ត្រូវបញ្ឈប់ក្របខណ្ឌ! ត្រូវតែឱ្យគាត់បាត់បង់ក្របខណ្ឌតាមការសម្រេចរបស់ខេត្ត? នេះគឺជារឿងមួយសំខាន់ ហើយករណីនេះសំខាន់ណាស់ ប្រសិនបើដោះស្រាយអត់បានស្រួលបួលទេ គឺវាជាករណីមួយដែលអាចធ្វើឱ្យជាលម្អាន អាចធ្វើឱ្យមានភាពច្របូកច្របល់នៅក្នុងដំណើរការរដ្ឋបាលសាធារណៈហ្នឹង»។
អតីតគ្រូពេទ្យជាន់ខ្ពស់ប្រចាំខេត្តប៉ៃលិន លោក ខឹម មុនីកុសល បានចាត់ទុកករណីបណ្តេញលោកចេញពីក្របខណ្ឌមន្ត្រីរាជការនៅខេត្តប៉ៃលិននេះថា ទំនងជារឿងនយោបាយ ដោយសារកាលពីឆ្នាំ២០១៧ លោកគឺជាសមាជិកអតីតគណបក្សសង្គ្រោះជាតិ ក៏ប៉ុន្តែចាប់តាំងពីតុលាការកំពូលបានរំលាយគណបក្សប្រឆាំងមក លោកមិនមានជាប់ពាក់ព័ន្ធជាមួយនឹងគណបក្សនយោបាយណាមួយទៀតនោះឡើយ។
ប៉ុន្តែលោកថា នៅក្នុងការជួបប្រជុំចំនួនពីរលើករួចមកហើយនោះ គណៈកម្មាធិការសម្រុះសម្រួលដែលមានអភិបាលខេត្តប៉ៃលិន លោកស្រី បាន ស្រីមុំ ជាប្រធាននេះ បានសើរើរឿងចាស់ពីអតីតកាលរបស់លោកម្តងហើយម្តងទៀត។
លោកមានប្រសាសន៍យ៉ាងដូច្នេះថា៖ «លោកត្រូវចាំថា នៅក្នុងការបោះឆ្នោតឆ្នាំ២០១៧ ការបោះឆ្នោតក្រុមប្រឹក្សាឃុំសង្កាត់ហ្នឹង ខ្ញុំក៏បានចូលរួមជាមួយនឹងអតីតគណបក្សសង្គ្រោះជាតិដែរកាលហ្នឹង ប៉ុន្តែក្រោយពីការរំលាយគណបក្សហ្នឹងទៅ មានន័យថា វាបញ្ចប់ហើយ ខ្ញុំក៏មិនមានអីពាក់ព័ន្ធជាមួយនឹងគណបក្សនយោបាយណាមួយទេ។ ក៏ប៉ុន្តែពួកគាត់នៅតែយកបញ្ហាហ្នឹងមកធ្វើជាបញ្ហាដដែលៗសារឡើងវិញ អ៊ីចឹងការដកតំណែងខ្ញុំកាលពីឆ្នាំ២០១៨អីហ្នឹង គឺហេតុផលការបោះឆ្នោតហ្នឹងឯង ហើយឥលូវហ្នឹងគាត់ទើបប្រឌិដ្ឋរឿងចោទប្រកាន់ខ្ញុំថែមទៀត វាមិនយុត្តិធម៌សម្រាប់ខ្ញុំទេ និយាយឱ្យចំទៅ»។
រដ្ឋបាលខេត្តប៉ៃលិនបានចោទប្រកាន់លោក ខឹម មុនីកុសល ថាបាន «ប្រព្រឹត្តកំហុស និងការឆ្គាំឆ្គងក្នុងវិជ្ជាជីវៈ» ក្រោយពីលោកបានបង្ហោះសារនៅលើហ្វេសប៊ុករិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កនៅមន្ទីរបក្សខេត្តប៉ៃលិន។ ប៉ុន្តែសេចក្តីសម្រេចរបស់អភិបាលខេត្តប៉ៃលិននេះបានរងការរិះគន់ពីអ្នកច្បាប់និងមហាជនមួយចំនួនថា ធ្វើឡើងដោយខុសនីតិវិធីច្បាប់៕