មជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា ស៊ីម៉ាក់ កំពុងរង់ចាំអ្នកជំនាញសុខាភិបាលផ្តល់សំណាកក្លិនអ្នកផ្ទុកវីរុសកូវីដ-១៩ ដើម្បីបង្ហាត់សត្វឆ្កែចំនួន១០ក្បាលស្វែងរកអ្នកផ្ទុកជំងឺនេះ។
អគ្គនាយកមជ្ឈមណ្ឌលសកម្មភាពកំចាត់មីនកម្ពុជា លោក ហេង រតនា បានប្រាប់ វីអូឌី នៅថ្ងៃទី២៦ ខែឧសភា ថាសត្វឆ្កែចំនួន៥ក្បាល ក្នុងចំណោម១០ក្បាលនោះ បានទទួលការហ្វឹកហ្វឺនថ្នាក់មូលដ្ឋានឈានមុខរួចហើយ នៅរង់ចាំតែការហ្វឹកហ្វឺនជំនាញហិតក្លិនរកជំងឺកូវីដ-១៩មួយទៀតតែប៉ុណ្ណោះ។
លោក ហេង រតនា បានពន្យល់ថា៖ «អត់ទេ! យើងទាល់តែបង្រៀនជំនាញ ឥលូវនេះយើងអត់ទាន់បានបង្រៀនជំនាញកូវីដនេះនៅឡើយទេ យើងរង់ចាំខាងក្រសួងសុខាភិបាល សាកលវិទ្យាល័យ គេយកសំណាកយកក្លិនអ្នកផ្ទុកវីរុសកូវីដ-១៩នេះ ដើម្បីបានយើងមានប្រដាប់ចាប់ក្លិនហ្នឹងហើយ ដើម្បីហ្វឹកហ្វឺនសុនខហ្នឹងណា! ប៉ុន្តែយើងត្រូវការបញ្ជាក់ឱ្យបានច្បាស់ និងធានាសុវត្ថិភាពថា ទៅយកក្លិន ក្លិនកូវីដពីអ្នកកើតកូវីដ-១៩ នឹងមិនមានផ្ទុកវីរុស[ឆ្លង]ដល់អ្នកហ្វឹកហ្វឺនឬដល់សុនខទេ»។
លោកបន្តទៀតថា បច្ចុប្បន្ននេះ អ្នកជំនាញវិទ្យាសាស្ត្រសុខាភិបាសកំពុងតែមានការរៀបចំនិងយកចិត្តទុកដាក់ក្នុងការស្រាវជ្រាវ ដើម្បីធានានូវសុវត្ថិភាពក្នុងការបម្រើការងារនេះ។
ការបណ្តុះបណ្តាលនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានអនុញ្ញាតឱ្យក្រសួងសុខាភិបាល និងអង្គភាព CMAC រៀបចំកម្មវិធីសិក្សាស្រាវជ្រាវនិងអភិវឌ្ឍន៍សុនខឬសត្វឆ្កែ ជាជំនួយហិតក្លិនរកអ្នកផ្ទុកកូវីដ-១៩ ដោយថា ដើម្បីចូលរួមទប់ស្កាត់និងប្រឆាំងទៅនឹងការរីករាលដាលជំងឺកូវីដ-១៩នៅក្នុងសហគមន៍។
គួរបញ្ជាក់ផងដែរថា ថ្មីៗកន្លងទៅនេះ ក៏មានប្រទេសជឿនលឿនមួយចំនួនបានដាក់ឱ្យប្រើប្រាស់នូវកម្មវិធីសត្វសុនខ ដើម្បីហិតក្លិនរកអ្នកជំងឺកូវីដ-១៩នេះជាបន្តបន្ទាប់ផងដែរ ដូចជា ប្រទេសហ្វាំងឡង់ និងប្រទេសមួយចំនួនទៀត ដែលមានសុនខកំពុងស្ថិតនៅក្រោមការហ្វឹកហាត់ដូចប្រទេសកម្ពុជាដែរ៕
