តំណាងមេធាវីការពារក្តីឱ្យលោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា គ្រោងដាក់ពាក្យបណ្តឹងចំនួន២ផ្សេងគ្នា នៅក្នុងសប្តាហ៍នេះ ដើម្បីស្នើសុំឱ្យតុលាការពិនិត្យឡើងវិញលើសំណុំរឿងកូនក្តីរបស់ខ្លួន ក្រោយមានការឃុំខ្លួនលើសនីតិវិធី។
លោក សំ សុគង់ សហមេធាវីម្នាក់ក្នុងចំណោមមេធាវីទាំង៥នាក់ដែលកំពុងការពារក្តីឱ្យលោក រ៉ុង ឈុន បានប្រាប់ វីអូឌី នៅថ្ងៃទី២៧ ខែឧសភានេះថា នៅថ្ងៃស្អែកនេះ ក្រុមមេធាវីរបស់លោកនឹងដាក់ពាក្យបណ្តឹងចំនួន២ទៅតុលាការសាលាដំបូងរាជធានីភ្នំពេញ ក្នុងនោះមានបណ្តឹងស្នើសុំឱ្យតុលាការបើកផ្លូវសម្រាប់មេធាវីការពារក្តីបានចូលជួបលោក រ៉ុង ឈុន ដែលកំពុងជាប់ឃុំនៅក្នុងមណ្ឌលអប់រំកែប្រែម១ និងបណ្តឹងមួយទៀតស្នើឱ្យមានការដោះលែងកូនក្តីរបស់ខ្លួនបាននៅក្រៅឃុំបណ្តោះអាសន្ន។
មេធាវីរូបនេះបន្តថា ការដាក់ពាក្យបណ្តឹងទាំងពីរនេះ ដោយសារសំណុំរឿងនេះមិនមែនជាបទល្មើសឧក្រិដ្ឋ ហើយការឃុំខ្លួននេះទៀតសោតលើសពីនីតិវិធីនៃការឃុំខ្លួនផងដែរ។
លោកបន្តថា៖ «ការផ្ទុះកូវីដនៅក្នុងពន្ធនាគារ តើវាពាក់ព័ន្ធនឹងកូនក្តីរបស់មេធាវីដែរឬក៏អត់! ហើយទី២ សុំឱ្យមានការពន្លឿនឬក៏សូមឱ្យមានការដោះលែងឱ្យមានសេរីភាព ដោយសារការអនុវត្តឬការជាប់ឃុំរបស់គាត់ វាសឹងតែស្មើ២ភាគ៣នៃទោសទាំងមូលហើយ។ អ៊ីចឹងការស្នើសុំនេះ ខ្ញុំគិតថា វាមិនខុសច្បាប់ទេ គឺវាស្របទៅតាមនីតិវិធីច្បាប់»។
ប្រធានសហភាពការងារកម្ពុជា និងជាសមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ត្រូវបានសមត្ថកិច្ចចាប់ខ្លួនទាំងយប់កាលពីចុងខែកក្កដា ឆ្នាំ២០២០។ ការចាប់ខ្លួននេះធ្វើឡើងក្រោយពេលលោកបានអត្ថាធិប្បាយនិងចេញសេចក្តីថ្លែងការណ៍ជុំវិញបញ្ហាដីធ្លីរបស់ពលរដ្ឋក្នុងខេត្តត្បូងឃ្មុំ ដែលជាប់ពាក់ព័ន្ធបញ្ហាព្រំដែនរវាងកម្ពុជា-វៀតណាម។ ភ្លាមៗ បន្ទាប់ពីការចាប់ខ្លួន លោក រ៉ុង ឈុន ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ ចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សង្គម» និងចេញដីកាឱ្យឃុំខ្លួនបណ្តោះអាសន្ននៅពន្ធនាគារព្រៃស។
យ៉ាងនេះក្តី ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ឱ្យដឹងថា សាច់ញាតិនិងខាងសមាគមមិនដែលបានជួបមុខលោក រ៉ុង ឈុន ម្តងណាឡើយ ក្រោយពីផ្ទុះជំងឺកូវីដ-១៩ក្នុងព្រឹត្តិការណ៍សហគមន៍២០កុម្ភៈកន្លងទៅនេះ។
ទន្ទឹមនឹងនេះ អ្នកស្រីយល់ឃើញថា ធាតុផ្សំនៃបទល្មើសប្រឆាំងលោក រ៉ុង ឈុន នេះ គឺពុំមានមូលដ្ឋានក្នុងការដាក់បន្ទុកបានឡើយ ដែលករណីនេះ លោកស្រីស្នើឱ្យតុលាការពិចារណាក្នុងការដោះលែងលោក រ៉ុង ឈុន ឱ្យមានសេរីភាពឡើងវិញ។
អ្នកស្រីបន្តថា៖ «សំណុំរឿងរបស់លោក រ៉ុង ឈុន គឺជាសំណុំរឿងដែលយើងគិតថាមិនអាចទទួលយកបាន ព្រោះអីលោក រ៉ុង ឈុន មិនមែនជាមនុស្សក្បត់ជាតិ មិនមែនជាមនុស្សដែលធ្វើឱ្យសង្គមវឹកវរ។ មនុស្សគាត់ជាមនុស្សស្អាតស្អំ សូម្បីតួនាទី លុយកាក់ និងបុណ្យសក្តិរបស់គាត់នៅ គ.ជ.ប ក៏គាត់ដើរចេញដែរ»។
ជុំវិញសំណុំរឿងនេះ មន្រ្តីនាំពាក្យសាលាដំបូងរាជធានីភ្នំពេញ លោក អ៊ី រិន្ទ អះអាងយ៉ាងខ្លីថា លោកនឹងសួរនាំបន្ថែមពីចៅក្រមជំនុំជម្រះក្នុងរឿងក្តីព្រហ្មទណ្ឌមួយនេះ។ ចំណែកលោក លិ សុខា ដែលជាប្រធានក្រុមប្រឹក្សាក្រមជំនុំជម្រះ វីអូឌី ពុំអាចសុំការបញ្ជាក់បានទេនៅថ្ងៃនេះ។
កាលពីថ្ងៃទី២០ ខែឧសភា ឆ្នាំ២០២១ អគ្គនាយកដ្ឋានពន្ធនាគារ បានផ្ញើលិខិតមួយច្បាប់ទៅសាលាដំបូងរាជធានីភ្នំពេញ ដោយស្នើសុំផ្អាកនាំជនជាប់ឃុំទៅជំនុំជម្រះនិងសាកសួរនៅតុលាការ ក្រោយពីមានផ្ទុះជំងឺកូវីដ-១៩នៅក្នុងពន្ធនាគារព្រៃស។
ករណីនេះ លោក សំ សុគង់ មេធាវីការពារក្តីឱ្យលោក រ៉ុង ឈុន យល់ថា ទំនងជាមូលហេតុនេះហើយទើបនាំឱ្យសវនាការប្រឆាំងអតីតប្រធានសមាគមគ្រូបង្រៀនកម្ពុជាឯករាជ្យរូបនេះ ត្រូវអាក់ខាន។
យ៉ាងនេះក្តី លោក អំ សំអាត នាយករងអង្គការការពារសិទ្ធិមនុស្សលីកាដូ ធ្លាប់លើកឡើងថា ស្ថិតក្នុងស្ថានភាពជំងឺកូវីដ-១៩ វាយលុកក៏ពិតមែន ក៏ប៉ុន្តែលោកសង្កេតឃើញតុលាការនៅអាចដំណើរការសំណុំរឿងផ្សេងទៀតបានធម្មតា ក្រៅពីរឿងក្តីរបស់លោក រ៉ុង ឈុន នេះ។
គិតពីថ្ងៃចាប់ខ្លួនរហូតមកដល់ពេលនេះ លោក រ៉ុង ឈុន ត្រូវបានឃុំខ្លួនប្រមាណ៣០០ថ្ងៃមកហើយ គឺមានរយៈពេលជិត១ឆ្នាំ។ បើទោះជាបែបណា ច្បាប់ស្តីពីការឃុំខ្លួនបណ្តោះអាសន្ន មាត្រា១ ចែងថា ទោះស្ថិតក្នុងករណីណាក៏ដោយ ការឃុំខ្លួនបណ្តោះអាសន្ននេះមិនឱ្យលើសពី៤ខែឡើយ។ ប៉ុន្តែការសម្រេចរបស់ចៅក្រមដែលមានមូលហេតុច្បាស់លាស់ ថារយៈពេលនេះអាចបន្តឃុំខ្លួនដល់៦ខែបាន ប្រសិនបើមានការចាំបាច់ក្នុងការស៊ើបអង្កេត៕
