តំណាងមេធាវីការពារក្តីឱ្យលោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ដែលគ្រោងដាក់ពាក្យបណ្តឹងស្នើតុលាការដោះលែងកូនក្តីរបស់ខ្លួនឱ្យនៅក្រៅឃុំបណ្តោះអាសន្ន នៅថ្ងៃនេះ បានលើកពេលដាក់ពាក្យបណ្តឹងទៅសប្តាហ៍ក្រោយវិញ។
កាលពីថ្ងៃម្សិលមិញ តំណាងមេធាវីការពារក្តីឱ្យលោក រ៉ុង ឈុន បានបញ្ជាក់ថា ពួកគាត់គ្រោងដាក់ពាក្យបណ្តឹងចំនួន២ ទៅតុលាការសាលាដំបូងរាជធានីភ្នំពេញ នៅថ្ងៃសុក្រនេះ។ បណ្តឹងទាំងពីរនោះ រួមមាន បណ្តឹងស្នើសុំឱ្យតុលាការបើកផ្លូវសម្រាប់មេធាវីការពារក្តី បានចូលជួបលោក រ៉ុង ឈុន ដែលកំពុងជាប់ឃុំនៅក្នុងមណ្ឌលអប់រំកែប្រែម១ និងបណ្តឹងមួយទៀតស្នើឱ្យដោះលែងកូនក្តីរបស់ខ្លួនបាននៅក្រៅឃុំបណ្តោះអាសន្ន ក្រោយការឃុំខ្លួនបណ្តោះអាសន្នរង់ចាំសវនាការបានធ្វើលើសនីតិវិធី។
តែយ៉ាងណា លោក សំ សុគង់ សហមេធាវីម្នាក់ក្នុងចំណោមមេធាវីទាំង៥នាក់ដែលកំពុងការពារក្តីឱ្យលោក រ៉ុង ឈុន បានប្រាប់ វីអូឌី នៅថ្ងៃទី២៨ ខែឧសភានេះថា ក្រុមមេធាវីបានរៀបចំឯកសាររួចរាល់ហើយ ប៉ុន្តែត្រូវការពេលវេលាខ្លះ ដើម្បីពិភាក្សាគ្នាបន្ថែម ទើបសម្រេចលើកពេលដាក់ពាក្យបណ្តឹងទៅសប្តាហ៍ក្រោយវិញ។
មេធាវីរូបនេះបន្តថា ការដាក់ពាក្យបណ្តឹងទាំងពីរនេះ ដោយសារសំណុំរឿងនេះមិនមែនជាបទល្មើសឧក្រិដ្ឋ ហើយការឃុំខ្លួននេះទៀតសោតគឺលើសពីនីតិវិធីនៃការឃុំខ្លួនផងដែរ។
លោកបន្តថា៖ «ការផ្ទុះកូវីដនៅក្នុងពន្ធនាគារ តើវាពាក់ព័ន្ធនឹងកូនក្តីរបស់មេធាវីដែរឬក៏អត់! ហើយទី២ សុំឱ្យមានការពន្លឿនឬក៏សូមឱ្យមានការដោះលែងឱ្យមានសេរីភាព ដោយសារការអនុវត្តឬការជាប់ឃុំរបស់គាត់ វាសឹងតែស្មើ២ភាគ៣នៃទោសទាំងមូលហើយ។ អ៊ីចឹងការស្នើសុំនេះ ខ្ញុំគិតថា វាមិនខុសច្បាប់ទេ គឺវាស្របទៅតាមនីតិវិធីច្បាប់»។
ប្រធានសហភាពការងារកម្ពុជា និងជាសមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ត្រូវបានសមត្ថកិច្ចចាប់ខ្លួនទាំងយប់ កាលពីចុងខែកក្កដា ឆ្នាំ២០២០។ ការចាប់ខ្លួននេះធ្វើឡើងក្រោយពេលលោកបានអត្ថាធិប្បាយនិងចេញសេចក្តីថ្លែងការណ៍ជុំវិញបញ្ហាដីធ្លីរបស់ពលរដ្ឋក្នុងខេត្តត្បូងឃ្មុំ ដែលជាប់ពាក់ព័ន្ធបញ្ហាព្រំដែនរវាងកម្ពុជា-វៀតណាម។ ភ្លាមៗ បន្ទាប់ពីការចាប់ខ្លួន លោក រ៉ុង ឈុន ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ ចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សង្គម» និងចេញដីកាឱ្យឃុំខ្លួនបណ្តោះអាសន្ននៅពន្ធនាគារព្រៃស។
មន្រ្តីនាំពាក្យសាលាដំបូងរាជធានីភ្នំពេញ លោក អ៊ី រិន្ទ អះអាងយ៉ាងខ្លីថា លោកនឹងសួរនាំបន្ថែមទៅចៅក្រមជំនុំជម្រះក្នុងរឿងក្តីព្រហ្មទណ្ឌមួយនេះ។
ចំណែកលោក លិ សុខា ដែលជាប្រធានក្រុមប្រឹក្សាក្រមជំនុំជម្រះ វីអូឌី ពុំអាចសុំការបញ្ជាក់បានទេ នៅថ្ងៃនេះ។
មន្រ្តីនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ឃើញថា តុលាការគួរផ្តល់សិទ្ធិសេរីភាពឡើងវិញដល់លោក រ៉ុង ឈុន និងអ្នកទោសមនសិការដទៃទៀត។ លោកបន្តថា ការផ្តល់សម្បទាឱ្យពួកគេបាននៅក្រៅឃុំបណ្តោះអាសន្ននេះ គឺជាការបើកផ្លូវសម្រាប់ជនត្រូវចោទបានបំពេញការងារប្រចាំថ្ងៃនិងជួបជុំគ្រួសារ។
លោកបន្តថា៖ «ចំពោះនីតិវិធីក៏អាចនៅតែបន្តទៅបានដែរ មិនមែនថាឱ្យនៅក្រៅឃុំហើយ រឿងរ៉ាវរបស់ពួកគាត់ចប់នោះទេ។ អ៊ីចឹង វាក៏ជាការផ្តល់ឱកាសឱ្យពួកគាត់បាននៅជួបជុំក្រុមគ្រួសារ ហើយក៏អាចបន្តធ្វើនូវកិច្ចការសង្គមឬកិច្ចការងារនយោបាយរបស់ពួកគាត់បន្តទៀតបាន»។
គិតពីថ្ងៃចាប់ខ្លួនរហូតមកដល់ពេលនេះ លោក រ៉ុង ឈុន ត្រូវបានឃុំខ្លួនជិតមួយឆ្នាំមកហើយ។
ច្បាប់ស្តីពីការឃុំខ្លួនបណ្តោះអាសន្ន មាត្រា១ ចែងថា ទោះស្ថិតក្នុងករណីណាក៏ដោយ ការឃុំខ្លួនបណ្តោះអាសន្ននេះមិនឱ្យលើសពី៤ខែឡើយ។ ប៉ុន្តែការសម្រេចរបស់ចៅក្រមដែលមានមូលហេតុច្បាស់លាស់ រយៈពេលនេះ អាចបន្តឃុំខ្លួនដល់៦ខែបាន ប្រសិនបើមានការចាំបាច់ក្នុងការស៊ើបអង្កេត៕
