ថ្នាក់ដឹកនាំសហជីពក្រុមហ៊ុន ណាហ្គាវើលដ៍ ទាំងអស់បានទទួលសារបញ្ឈប់ពីការងារកាលពីថ្ងៃម្សិលមិញ ក្នុងផែនការជម្រុះបុគ្គលិកជាង១ ០០០នាក់របស់ក្រុមហ៊ុន ដែលករណីនេះត្រូវបានមន្រ្តីសហជីពនិងសង្គមស៊ីវិលមួយចំនួនចាត់ទុកថា ធ្វើឡើងដើម្បីបំបាត់សំឡេងសហជីពសកម្មនៅកន្លែងការងារ។
ក្រុមហ៊ុន ណាហ្គាវើលដ៍ បានចាប់ដំណើរការបញ្ឈប់បុគ្គលិកចំនួន១ ៣២៩នាក់ ពីថ្ងៃទី១៧ ខែឧសភា ឆ្នាំ២០២១ ក្រោយពន្យារពេលជិត១ខែ ដោយសារវិធានបិទខ្ទប់រាជធានីភ្នំពេញ ក្រោមហេតុផលប្រាក់ចំណូលធ្លាក់ចុះដោយបញ្ហារីករាលដាលជំងឺកូវីដ-១៩។ សេចក្តីសម្រេចនេះ បាននាំឱ្យមានការជួបចរចារវាងសហជីពនិងតំណាងក្រុមហ៊ុនជាបន្តបន្ទាប់ និងចលនាតវ៉ាទាមទារការទម្លាក់ចោលពីបុគ្គលិកកម្មកររបស់ក្រុមហ៊ុនតាមរយៈបណ្តាញសង្គមហ្វេសប៊ុកដោយគិតត្រឹមថ្ងៃទី២៨ ខែឧសភានេះ គឺមានរយៈពេល៤៥ថ្ងៃហើយ។
អនុប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ អ្នកស្រី ឈុន សុខា មានប្រសាសន៍ថា គិតមកដល់ថ្ងៃសុក្រនេះ អ្នកស្រីនិងថ្នាក់ដឹកនាំផ្សេងទៀត រាប់ទាំងប្រធានសហជីព និងសកម្មជនសកម្មជាង១០នាក់ រួមនឹងបុគ្គលិកប្រមាណ៦០០នាក់ បានទទួលសារបញ្ឈប់ពីក្រុមហ៊ុន ដែលក្នុងនោះមានមួយចំនួនព្រមទទួលយក និងមួយចំនួនបដិសេធ។
អ្នកស្រីចាត់ទុកការសម្រេចរបស់ក្រុមហ៊ុនថាជាការរើសអើងសហជីព និងចង់លុបបំបាត់សំឡេងតវ៉ាទាមទារអត្ថប្រយោជន៍ និងកិច្ចការពារសិទ្ធិបុគ្គលិកកម្មករដែលរងការកេងប្រវ័ញ្ចនិងរំលោភបំពានដោយអយុត្តិធម៌នៅកន្លែងធ្វើការ ដូចដែលក្រុមហ៊ុនធ្លាប់បានធ្វើដោយជោគជ័យកាលពីឆ្នាំ២០០៩។
អ្នកស្រី ឈុន សុខា ថ្លែងថា៖ «វាជាការរំលោភបំពានមួយលើសិទ្ធិសេរីភាពរបស់សហជីព ដែលយើងមានសិទ្ធិជាសហជីពមួយឯករាជ្យ ហើយដែលបានចុះបញ្ជីការទទួលស្គាល់ដោយក្រសួងការងារ។ ហើយដល់ឥលូវ ក្រុមហ៊ុនបញ្ឈប់ថ្នាក់ដឹកនាំ ក៏ដូចជាសកម្មជនរបស់សហជីពអ៊ីចឹង ធ្វើឱ្យថ្នាក់ដឹកនាំនិងសកម្មជនសហជីពទាំងអស់មិនអាចបំពេញកាតព្វកិច្ចក្នុងនាមខ្លួនឯងជាតំណាងបុគ្គលិកកម្មករ»។
អ្នកស្រីបន្តថា ថ្នាក់ដឹកនាំសហជីពកំពុងរៀបចំឯកសារផ្លូវច្បាប់ប្តឹងជំទាស់ករណីនេះទៅក្រសួងការងារ។
អ្នកស្រីអះអាងថា បុគ្គលិកភាគច្រើនដែលមិនទាន់ទទួលការបញ្ឈប់ ក៏បានបង្ហាញជំហរបន្តការតស៊ូរហូតដល់ដំណាក់កាលចុងក្រោយជាមួយថ្នាក់ដឹកនាំសហជីព ដើម្បីរក្សាសំឡេងតំណាងរបស់ពួកគេសម្រាប់ជួយដោះស្រាយបញ្ហារំលោភបំពានសិទ្ធិការងារផ្សេងៗពីថៅកែ។
អ្នកស្រីបន្ថែមថា៖ «ពួកគាត់ក៏រង់ចាំមើលទាំងអស់គ្នាថា តើក្រុមហ៊ុនណាហ្គាចង់ធ្វើអ្វីចំពោះសហជីព! ហើយបើសិនជាជ្រុល ពួកគាត់ថា បើជ្រុលតែកាត់អស់ហើយ គួរណាស់តែប្រកាសកាត់បុគ្គលិក៨ ០០០នាក់នៅក្នុងក្រុមហ៊ុនចោលទាំងអស់តែម្តងទៅ ហើយចាំមើលក្រុមហ៊ុននេះរកស៊ីរបៀបម៉េចនៅពេលដែលអត់មានបុគ្គលិកធ្វើការឱ្យពួកគាត់»។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ មើលឃើញថា ផែនការកាត់បុគ្គលិករបស់ក្រុមហ៊ុន ណាហ្គាវើលដ៍ ហាក់បីដូចជាមិនមែនបណ្តាលមកពីបញ្ហារីករាលដាលជំងឺកូវីដ-១៩នោះទេ ប៉ុន្តែវាជាការលុបបំបាត់សហជីពសកម្មដែលហ៊ានចេញមុខតវ៉ាទាមទារសិទ្ធិនិងផលប្រយោជន៍របស់កម្មករ។
លោកថា៖ «ខ្ញុំអាចនិយាយថា វាអាចជាការរើសអើងទៅលើសហជីពខ្លះ ហើយនិងចង់មានការកេងចំណេញទៅលើសិទ្ធិកម្មករ។ ឧទាហរណ៍ដូចជា បញ្ឈប់កម្មករចាស់ រើសកម្មករថ្មី ដូចជាការបំបាត់មិនឱ្យមានសហជីពជាដើម»។
លោកបន្ថែមថា៖ «ការបញ្ឈប់បុគ្គលិក ជាពិសេសក្រុមសហជីព បានបង្ហាញគំរូអាក្រក់សម្រាប់និយោជកផ្សេងទៀត»។
ប្រធានសហភាពចលនាកម្មករកម្ពុជា លោក ប៉ាវ ស៊ីណា មើលឃើញថា ការកាត់បុគ្គលិកកម្មករក្នុងទ្រង់ទ្រាយធំរបស់ក្រុមហ៊ុនណាហ្គា គឺបង្ហាញយ៉ាងច្បាស់ថា ក្រុមហ៊ុនមួយនេះកំពុងប្រើប្រាស់ឱកាសនៃការរីករាលដាលនៃជំងឺកូវីដ-១៩ ដើម្បីកម្ចាត់ចលនាសហជីពដែលសកម្មក្នុងការតវ៉ាទាមទារសិទ្ធិកម្មករនៅក្នុងក្រុមហ៊ុន។
លោកថា៖ «អ៊ីចឹងទិដ្ឋភាពនេះ វាបង្ហាញយ៉ាងច្បាស់ហើយថា គ្មានអ្វីផ្សេងក្រៅពីចេតនាដែលចង់កម្ទេចសហជីពទេ ព្រោះថា ប្រសិនបើយើងយោងទៅតាមសភាពជាក់ស្ដែង បើរំសាយបុគ្គលិកទាំងស្រុង វាមិនខុសទេ! តែបើក្នុងករណីរំសាយខ្លះ ទុកខ្លះ ហើយក្នុងការរំសាយនោះទៀតសោតផ្ដោតទៅលើសកម្មជនសហជីព មេដឹកនាំសហជីព អាហ្នឹងវាបង្ហាញពីចេតនារើសអើងសហជីពយ៉ាងពិតប្រាកដ»។
មន្រ្តីសម្របសម្រួលគម្រោងជាតិនៅអង្គការ ILO លោក ទុន សោភ័ណ្ឌ មិនអាចបញ្ជាក់ថា ករណីបញ្ឈប់ការងារថ្នាក់ដឹកនាំនិងសកម្មជនសហជីពនៅក្រុមហ៊ុនណាហ្គាវើលដ៍ ជាទង្វើខុសឬស្របច្បាប់នោះទេ បើសិនមិនទាន់ទទួលបានព័ត៌មានច្បាស់លាស់។ លោកថា អង្គការរបស់លោកនឹងចូលដោះស្រាយបញ្ហាវិវាទនេះ បើសិនមានការស្នើ។
លោក ទុន សោភ័ណ្ឌ និយាយថា៖ «យើងនឹងចាត់វិធានការភ្លាមៗនៅពេលទទួលបានសំណើដែលលម្អិតស្ថានភាពករណី[បញ្ឈប់ថ្នាក់ដឹកនាំ សកម្មជនសហជីព និងបុគ្គលិកណាហ្គាវើលដ៍] ពីសហជីពកម្មករដែលរងផលប៉ះពាល់»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព ថ្លែងថា ការបញ្ឈប់បុគ្គលិកក្នុងស្ថានភាពកូវីដ-១៩ ដែលពួកគេកំពុងជួបបញ្ហាលំបាកផ្នែកជីវភាព ជាការដើរផ្ទុយពីគោលការណ៍ណែនាំរបស់ក្រសួងការងារកន្លងមក។ លោកស្រីបន្ថែមថា ការបញ្ឈប់ថ្នាក់ដឹកនាំសហជីពណាហ្គាវើលដ៍ បើមិនមានហេតុផលសមស្របទេ នោះក្រុមហ៊ុនមិនមែនធ្វើឡើងតែក្រោមហេតុផលប៉ះពាល់ប្រាក់ចំណូលនោះទេ។
លោកស្រីមានប្រសាសន៍ថា៖ «បើការបញ្ឈប់នោះសំដៅទៅលើតួអង្គសកម្ម ក៏ដូចជាតំណាងសហជីព នោះបានន័យថា ខាងក្រុមហ៊ុនបានបំពាននិងធ្វើការយាយីទៅដល់តំណាងសហជីព ដែលគួរតែត្រូវបានធានាទៅតាមច្បាប់នៃព្រះរាជាណាចក្រកម្ពុជាយើង ហើយដែលស្ថាប័នរបស់ខ្លួនហ្នឹងបានយល់ស្របក្នុងការបង្កើតឱ្យមានសហជីព។ អ៊ីចឹង នេះជាការប្រើរូបភាពឬសម្អាងនៃជំងឺកូវីដនេះ មកជាការសងសឹកចំពោះបុគ្គលសកម្មទៅវិញ»។
វីអូឌី មិនអាចទាក់ទងប្រធានប្រតិបត្តិបុគ្គលិកក្រុមហ៊ុន ណាហ្គាវើលដ៍ លោក Mike Ngai ដើម្បីសុំការអធិប្បាយជុំវិញការសម្រេចកាត់បុគ្គលិកនេះបានទេ នៅថ្ងៃសុក្រនេះ។
អ្នកនាំពាក្យក្រសួងការងារ លោក ហេង សួរ លើកឡើងថា ជាទូទៅ ក្រុមហ៊ុនមិនអាចបញ្ឈប់មេដឹកនាំសហជីពបានទេ ដរាបណាពួកគេមិនមានកំហុសធ្ងន់។
លោកមានប្រសាសន៍ថា៖ «ជាគោលការណ៍ គេមិនអាចបញ្ឈប់ថ្នាក់ដឹកនាំសហជីពទេ លើកលែងតែមានកំហុសធ្ងន់ ឬខុសទៅនឹងបទបញ្ជាផ្ទៃក្នុង ឬស្ថានភាពសេដ្ឋកិច្ចជាក់ស្តែងណាមួយរបស់ក្រុមហ៊ុន។ យើងត្រូវពិនិត្យមើលអង្គហេតុនិងដើមទងនៃបញ្ហាសិន។»
តាមរបាយការណ៍ព័ត៌មានហិរញ្ញវត្ថុរបស់ក្រមហ៊ុន ណាហ្គាវើលដ៍ ចុះផ្សាយលើគេហទំព័ររបស់ខ្លួន បានឱ្យដឹងថា ក្រុមហ៊ុនកាស៊ីណូនិងសណ្ឋាគារមួយនេះ រកប្រាក់ចំណេញសុទ្ធបានជាង១០០លានដុល្លារ (១០២,៣លានដុល្លារ) អំឡុងវិបត្តិកូវីដ-១៩ ក្នុងឆ្នាំ២០២០ ដោយធ្លាក់ចុះពីជាង៥២១លានដុល្លារ ក្នុងឆ្នាំ២០១៩៕