អាជ្ញាធរខេត្តកំពតបានសម្រេចបិទផ្អាកអាជីវកម្មកាស៊ីណូនៅច្រកអន្តរជាតិ«ព្រែកចាក» និងច្រកទ្វារទ្វេភាគី«តន់ហន់» ព្រមទាំងផ្សារព្រែកក្រឹស ក្នុងស្រុកកំពង់ត្រាច ខេត្តកំពត រយៈពេល១៤ថ្ងៃ ដោយថា ដើម្បីចូលរួមទប់ស្កាត់ការឆ្លងជំងឺកូវីដ-១៩ និងក្រោយពេលរកឃើញបុគ្គលិកកាស៊ីណូឆ្លងជាង៥០នាក់នៅថ្ងៃនេះ។
លិខិតរបស់រដ្ឋបាលខេត្តកំពតដែលជម្រាបជូនអភិបាលស្រុកកំពង់ត្រាច នៅថ្ងៃទី៣០ ខែឧសភានេះ ថាការសម្រេចបិទអាជីវកម្មកាស៊ីណូនៅតំបន់ច្រកព្រំដែនទាំងពីរ និងនៅផ្សារក្រឹសនេះ គឺដើម្បីបន្តយ៉ាងសកម្មក្នុងការចូលរួមបង្ការនិងទប់ស្កាត់ការឆ្លងរីករាលដាលជំងឺកូវីដ-១៩ ជាពិសេសក្នុងព្រឹត្តិការណ៍សហគមន៍២០កុម្ភៈ។
រដ្ឋបាលខេត្តកំពតសរសេរថា៖ «ក្នុងន័យនេះ រដ្ឋបាលខេត្តសូមណែនាំឱ្យអភិបាលនៃគណៈអភិបាលស្រុកកំពង់ត្រាច ត្រូវធ្វើការណែនាំបិទផ្អាកអាជីវកម្មកាស៊ីណូនៅច្រកទ្វារព្រំដែនអន្តរជាតិព្រែកចាក និងច្រកទ្វារទ្វេភាគីតន់ហន់ ព្រមទាំងផ្សារព្រែកក្រឹស ក្នុងស្រុកកំពង់ត្រាច ខេត្តកំពត រយៈពេល១៤ថ្ងៃ ចាប់ពីថ្ងៃចុះហត្ថលេខានេះតទៅ»។
លិខិតដដែលបញ្ជាក់ថា ការសម្រេចនេះ ដោយយោងតាមការផ្សាយព័ត៌មានស្តីពីការកើនឡើងនូវតួលេខនៃការឆ្លងរីករាលដាលជំងឺកូវីដ-១៩ នៅស្រុកកំពង់ត្រាច ខេត្តកំពត។
អាជ្ញាធរខេត្តកំពត នៅថ្ងៃអាទិត្យនេះ បានចេញសេចក្តីជូនដំណឹងស្តីពីការរកឃើញករណីវិជ្ជមានកូវីដ-១៩ថ្មី ចំនួន៥៦ករណី ដែលកើតឡើងទៅលើបុគ្គលិកកាស៊ីណូទាំងអស់ ប៉ុន្តែអាជ្ញាធរខេត្តនេះមិនបានបញ្ជាក់ពីចំនួនឆ្លងសរុបនៅទូទាំងខេត្តនោះឡើយ។
បើតាមក្រសួងសុខាភិបាល គិតត្រឹមព្រឹកថ្ងៃទី៣០ ខែឧសភា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន២៩ ៤០៤នាក់ ក្នុងនោះ អ្នកជំងឺព្យាបាលជាសះស្បើយសរុបមានចំនួន២២ ១៨៨នាក់ និងអ្នកស្លាប់សរុប២០៩នាក់៕
