អគ្គិភ័យបានឆេះរោងចក្រផលិតវត្ថុអនុស្សាវរីយ៍មួយកន្លែង បណ្តាលឱ្យរងការខូចខាតផ្នែកខ្លះក្នុងរោងចក្រ ប៉ុន្តែមិនបណ្តាលឱ្យមានពលរដ្ឋណាម្នាក់មានគ្រោះថ្នាក់នោះឡើយ។
ស្នងការនគរបាលខេត្តកណ្តាល លោក ឈឿន សុចិត្ត មានប្រសាសន៍នៅថ្ងៃពុធនេះថា មានករណីឆេះរោងចក្រ ច្រាងហ៊ួរ (ខេមប៊ូឌា) ដែលជារោងចក្រផលិតវត្ថុអនុស្សាវរីយ៍ឬតុក្កតាមួយកន្លែង នៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល កាលពីថ្ងៃទី០១ ខែមិថុនា ឆ្នាំ២០២១នេះ។
លោកបន្តថា អគ្គិភ័យនេះកើតឡើងដោយសារការធ្វេសប្រហែសរបស់ជាងបាញ់ថ្នាំ ដែលផ្សារជើងកង្ហារនៅកន្លែងរោងជាង ប៉ុន្តែសមត្ថកិច្ចបានអន្តរាគមន៍ពន្លត់បានភ្លាមៗផងដែរ។
លោកអះអាងថា៖ «រឿងឆាបឆេះអគ្គិភ័យនេះ គឺបណ្តាលមកការធ្វេសប្រហែសរបស់ជាងរបស់គាត់។ អ៊ីចឹងយើងត្រូវណែនាំគាត់ ដោយឱ្យគាត់ចូលរួមឱ្យបានត្រឹមត្រូវទៅតាមបទដ្ឋានបច្ចេកទេសសំណង់ ក៏ដូចជាបទដ្ឋានបំពាក់បំពង់អគ្គិភ័យផងដែរ»។
លោកបញ្ជាក់ថា រោងចក្រដែលឆេះនេះខូចខាតតិចតួចប៉ុណ្ណោះ ពិសេសខូចខាតវត្ថុអនុស្សាវរីយ៍ រួមមាន តុក្កតា និងរូបថត ដែលរោងចក្រនេះបានផលិតជាដើម។
ស្នងការនគរបាលខេត្តកណ្តាលដដែល អំពាវនាវដល់ម្ចាស់រោងចក្រត្រូវមានការប្រុងប្រយ័ត្នបន្ថែមទៀត ដោយត្រូវសហការជាមួយអាជ្ញាធរមូលដ្ឋាន ក៏ដូចជាអ្នកជំនាញអគ្គិភ័យខេត្ត។ លោកក៏បានណែនាំឱ្យអ្នកជំនាញអគ្គិភ័យខេត្ត ចុះទៅមើលប្រព័ន្ធសុវត្ថិភាពរបស់រោងចក្រ ព្រមទាំងណែនាំដល់ម្ចាស់រោងចក្រឱ្យបំពាក់បំពង់ពន្លត់អគ្គិភ័យ និងរៀបចំប្រព័ន្ធសុវត្ថិភាពឡើងវិញផងដែរ៕