អគ្គលេខាធិការដ្ឋានរដ្ឋសភា បានប្រកាសបើកចំហឱ្យសាធារណជនទូទៅដាក់ពាក្យឈរឈ្មោះជាបេក្ខជនជ្រើសរើសជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ថ្មី ជំនួសលោក ស៊ិក ប៊ុនហុក ដែលបានប្រកាសលាឈប់ក្រោមហេតុផលបញ្ហាសុខភាព។
យោងតាមសេចក្តីជូនដំណឹងរបស់អគ្គលេខាធិការដ្ឋានរដ្ឋសភា កាលពីថ្ងៃទី៤ ខែមិថុនា ឥស្សរជនដែលមានបំណងចង់ដាក់ពាក្យឈរឈ្មោះជាប្រធាន គ.ជ.ប ថ្មីនេះ ត្រូវមានលក្ខខណ្ឌមួយចំនួនដូចជា៖ ជាប្រជាពលរដ្ឋខ្មែរទូទៅដែលមានអាយុចាប់ពី៤៥ឆ្នាំឡើង មានសញ្ញាបត្រចាប់ពីឧត្តមសិក្សា និងមានបទពិសោធន៍ការងារចាប់ពី១០ឆ្នាំឡើងទៅ។ បេក្ខជនត្រូវភ្ជាប់មកជាមួយនូវជីវប្រវត្តិសង្ខេប២ច្បាប់ សេចក្តីចម្លងសំបុត្រកំណើត២ច្បាប់ ច្បាប់ថតចម្លងអត្តសញ្ញាណបណ្ណសញ្ជាតិខ្មែរ២ច្បាប់ សេចក្តីប្រកាសអំពីសញ្ជាតិ២ច្បាប់ និងសេចក្តីបញ្ជាក់អំពីការចុះឈ្មោះបោះឆ្នោតដោយអាជ្ញាធរឃុំ-សង្កាត់ដែលសាម៉ីខ្លួនបានចុះឈ្មោះបោះឆ្នោត ជាដើម។
អ្នកនាំពាក្យរដ្ឋសភា លោក ឡេង ប៉េងឡុង បានប្រាប់ វីអូឌី នៅថ្ងៃសៅរ៍ថា បេក្ខជនដែលបានដាក់ពាក្យរួចរាល់ គណៈអចិន្ត្រៃយ៍រដ្ឋសភានឹងទទួលជាបេក្ខភាពទាំងអស់ បន្ទាប់មកបក្ខជនដែលឈរឈ្មោះត្រូវមានការសម្របសម្រួលជាមួយគណបក្សនយោបាយ មុននឹងរដ្ឋសភាអនុម័ត។
យ៉ាងណាក្តី លោក ឡេង ប៉េងឡុង នៅមិនអាចបញ្ជាក់ជាមុនថា តើបេក្ខជនរូបណាដែលមានលក្ខណៈសម្បត្តិគ្រប់គ្រាន់ដើម្បីទទួលតំណែងនេះនៅឡើយទេ បើទោះបីជាគេដឹងថា បេក្ខជនប្រធានគណៈកម្មាធិការជាតិរៀបចំការបោះឆ្នោតនេះ ជាបេក្ខភាពមកពីកូតាគណបក្សកាន់អំណាចក្តី។
លោកមានប្រសាសន៍យ៉ាងដូច្នេះថា៖ «ច្បាប់យើងស្តីពីការរៀបចំនិងការប្រព្រឹត្តទៅរបស់គណៈកម្មាធិការជាតិរៀបចំការបោះឆ្នោតហ្នឹង គឺថាជាច្បាប់ប្រជាធិបតេយ្យ គឺយើងជ្រើសរើសដោយតម្លាភាពជាសាធារណៈ គឺប្រជាពលរដ្ឋណាក៏អាចដាក់បានដែរ ឱ្យតែត្រូវតាមលក្ខខណ្ឌកំណត់ក្នុងច្បាប់»។
ចំណែកលោក សុខ ឥសាន អ្នកនាំពាក្យគណបក្សកាន់អំណាចវិញ ក៏មិនទាន់អាចបង្ហើបជាមុនបាននៅឡើយទេ ថាតើគណបក្សនឹងចាត់តាំងបេក្ខភាពឥស្សរជនរូបណាឱ្យធ្វើជាប្រធានគណៈកម្មាធិការជាតិរៀបចំការបោះឆ្នោតថ្មីនៅឡើយទេ។ ក៏ប៉ុន្តែលោកបញ្ជាក់ថា ការជ្រើសរើសនេះគឺធ្វើឡើងតាមរបៀបលទ្ធិប្រជាធិបតេយ្យ។
លោកមានប្រសាសន៍ថា៖ «អត់ទេ! អាហ្នឹងគឺយើងធ្វើតាមលទ្ធិប្រជាធិបតេយ្យ មិនមែនគណបក្សសម្រេចអត្តនោម័តទេ គឺយើងប្រកាស រាល់សាធារណជនណាក៏ដោយ ឱ្យតែគ្រប់លក្ខណៈសម្បត្តិ ឱ្យមកដាក់ពាក្យក្នុងរយៈពេលប៉ុន្មានថ្ងៃអ៊ីចឹងទៅ»។
ការប្រកាសជ្រើសរើសប្រធានគណៈកម្មាធិការជាតិរៀបចំការបោះឆ្នោតថ្មីនេះ បានធ្វើឡើងបន្ទាប់ពីលោក ស៊ិក ប៊ុនហុក បានប្រកាសលាឈប់ពីតំណែង ក្រោមហេតុផលសុខភាព។
លោក ស៊ិក ប៊ុនហុក បច្ចុប្បន្នមានអាយុ៧៥ឆ្នាំ បានក្លាយជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី៩ ខែមេសា ឆ្នាំ២០១៥ ក្រោយពីមានការសម្របសម្រួលនយោបាយរវាងគណបក្សប្រជាជនកម្ពុជាតំណាងឱ្យគណបក្សសំឡេងភាគច្រើន និងអតីតគណបក្សសង្គ្រោះជាតិតំណាងឱ្យគណបក្សសំឡេងភាគតិចនៅក្នុងរដ្ឋសភា ដែលមានរូបមន្ត ៤ ៤ ១។
ទោះជាយ៉ាងណាក្តី លោក កន សាវាង្ស អ្នកសម្របសម្រួលផ្នែកអង្កេតនិងតស៊ូមតិ នៃអង្គការឃ្លាំមើលការបោះឆ្នោត (ខុមហ្រ្វែល) បានលើកឡើងថា លោកមិនចម្លែកឡើយចំពោះការជ្រើសរើសបេក្ខភាពប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ថ្មីនេះទេ ព្រោះគេដឹងរួចជាស្រេចទៅហើយថា បេក្ខជននឹងមិនមកពីណាឆ្ងាយក្រៅពីឥស្សរជនមកពីគណបក្សកាន់អំណាចនោះឡើយ។
លោក កន សាវាង្ស ថ្លែងថា៖ «ទោះបីយ៉ាងណាក៏ដោយ នៅក្នុងនីតិវិធីបានចែងរួចស្រេចទៅហើយ អ៊ីចឹងទោះបីជាអ្នកចាស់ឬអ្នកថ្មីក៏ដោយ គឺនៅក្នុងគណបក្សកាន់អំណាចដដែលទេ។ ហើយបើមកពីគណបក្សកាន់អំណាចដដែល គឺបេក្ខជនមកដាក់នេះ គឺគេត្រូវរ៉ូវគ្នាក្នុងបក្សរួចស្រេចទៅហើយ វាមិនអាចមកដោយមិនមានការយល់គ្នានៅក្នុងហ្នឹងទេ។ ទោះបីជាគាត់កាន់ឯកសារយកមកក៏ដោយ តែត្រូវការសម្រេចនៅក្នុងហ្នឹងដដែលទេ បាទ»។
បើតាមសេចក្តីជូនដំណឹងរបស់អគ្គលេខាធិការដ្ឋានរដ្ឋសភា ការទទួលពាក្យរបស់បេក្ខជនមានរយៈពេល៥ថ្ងៃ ចាប់ពីថ្ងៃចន្ទ ទី៧ ខែមិថុនា ដល់ត្រឹមថ្ងៃសុក្រ ទី១១ ខែមិថុនា វេលាម៉ោង៥និង៣០នាទីល្ងាច។ លោក ឡេង ប៉េងឡុង បានថ្លែងថា បន្ទាប់ពីបិទការទទួលពាក្យ លោកនឹងធ្វើរបាយការណ៍មួយផ្ញើទៅកាន់គណៈកម្មាធិការអចិន្ត្រៃយ៍ដើម្បីសម្រេច មុនពេលបោះឆ្នោតផ្តល់សេចក្តីទុកចិត្ត៕