កម្ពុជានឹងធ្វើពិធីតម្កល់កែវផ្ទុកតំណក់ប្រេងលើកដំបូងរបស់ខ្លួននៅឯវិមានឈ្នះឈ្នះ នៅថ្ងៃស្អែកនេះ ចំពេលដែលក្រុមហ៊ុនផលិតប្រេង Kris Energy បានប្រកាសក្ស័យធន។
នៅក្នុងពិធីដែលមន្ត្រីរដ្ឋាភិបាលកម្ពុជា បានចាត់ទុកថាជាព្រឹត្តិការណ៍ដ៏សំខាន់មួយនេះ នឹងមានការចូលរួមពីលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ តំណាងឱ្យនាយករដ្ឋមន្ត្រី ដើម្បីទទួលកែវផ្ទុកតំណក់ប្រេងលើកដំបូងរបស់កម្ពុជានេះ ពីរដ្ឋមន្ត្រីក្រសួងរ៉ែ និងថាមពល លោក ស៊ុយ សែម។ មន្ត្រីជាន់ខ្ពស់រដ្ឋាភិបាលទាំងពីរ ក៏នឹងធ្វើពិធីដង្ហែកែវផ្ទុកតំណក់ប្រេងលើកដំបូងនេះទៅរក្សាទុកក្នុងសារមន្ទីរវិមាននយោបាយឈ្នះឈ្នះ ហើយនឹងឆ្លាក់រូបកែវផ្ទុកតំណក់ប្រេងនេះនៅលើជញ្ជាំងវិមានឈ្នះឈ្នះផងដែរ។
លោកនាយឧត្តមសេនីយ៍ ណឹម សុវត្ថិ អគ្គនាយកនៃអគ្គនាយកដ្ឋាននយោបាយនិងកិច្ចការបរទេស និងជាប្រធានក្រុមការងារសិក្សាស្រាវជ្រាវនិងសាងសង់វិមានឈ្នះឈ្នះ បានចាត់ទុកថា តំណក់ប្រេងលើកដំបូងរបស់កម្ពុជាដែលយកទៅរក្សាទុកនៅវិមានឈ្នះឈ្នះនេះ គឺជាសមិទ្ធផលធំមួយទៀតរបស់រដ្ឋាភិបាល។
លោកនាយឧត្តមសេនីយ៍ ណឹម សុវត្ថិ បានថ្លែងយ៉ាងខ្លីថា៖ «អត្ថន័យដូចសម្តេចតេជោ [ហ៊ុន សែន] មានប្រសាសន៍អស់ហើយតើ! កាលពីថ្ងៃទី២៩ ខែធ្នូកន្លងមក អំពីសមិទ្ធផលប្រេងដែលយើងរកឃើញ ហើយជាសមិទ្ធផលនយោបាយឈ្នះឈ្នះដែលលោកបានមកពេលសន្តិភាព»។
ការធ្វើពិធីតម្កល់កែវផ្ទុកតំណក់ប្រេងលើកដំបូងរបស់កម្ពុជា នៅឯសារមន្ទីរវិមានឈ្នះឈ្នះនេះ បានធ្វើឡើងចំពេលដែលក្រុមហ៊ុនផលិតប្រេងឈ្មោះ KrisEnergy ទើបបានប្រកាសក្ស័យធន កាលពីថ្ងៃទី៤ ខែមិថុនា។ ក្រុមហ៊ុនរបស់ប្រទេសសិង្ហបុរីមួយនេះបានប្រកាសថា ខ្លួនគ្មានលទ្ធភាពសងបំណុលនៅក្នុងបណ្តឹងនៅឯតុលាការនោះទេ។
ទោះជាយ៉ាងនេះក្តី លោក ជៀប សួរ អគ្គនាយកនៃអគ្គនាយកដ្ឋានប្រេងកាត នៃក្រសួងរ៉ែ និងថាមពល នៅមិនទាន់អាចវាយតម្លៃពីផលប៉ះពាល់របស់ក្រុមហ៊ុននេះមកលើដំណើរការផលិតកម្មប្រេងនៅកម្ពុជាយ៉ាងណានៅឡើយទេ ដោយរដ្ឋាភិបាលនឹងបន្តពិនិត្យនិងវាយតម្លៃលើស្ថានការណ៍ទៅមុខទៀតសិន។
ទោះជាយ៉ាងនេះក្តី កាលពីចុងខែឧសភាកន្លងទៅ កម្ពុជាបានខកខានក្នុងការនាំចេញប្រេងឆៅជាលើកដំបូងទៅកាន់ទីផ្សារអន្តរជាតិ នៅពេលដែលខ្លួនផលិតបានប្រេងឆៅប្រមាណជា៣០ម៉ឺនបារ៉ែលរួចហើយនោះ។
លោកមានប្រសាសន៍បញ្ជាក់យ៉ាងខ្លីថា៖ «ឥលូវនេះជាជំហានដំបូង យើងឃើញព័ត៌មានអ៊ីចឹងហើយ គឺក្រុមហ៊ុន KrisEnergy ហ្នឹងគាត់ដាក់ពាក្យរំលាយក្រុមហ៊ុនអ៊ីចឹង ប៉ុន្តែនីតិវិធីវាត្រូវតុលាការគេធ្វើការងារអីបន្តទៀត តើវាត្រូវប៉ះពាល់អីយ៉ាងម៉េច! យើងក៏មានការបារម្ភដែរ ប៉ុន្តែយើងនៅរង់ចាំមើលដំណើរការទៅមុខទៀត យើងអត់ទាន់អាចថាយ៉ាងម៉េចបានទេឥលូវនេះ។ បើទៅពេលខាងមុខ ការសម្រេចចិត្តរបស់ក្រុមហ៊ុនអីយ៉ាងម៉េច អាហ្នឹងយើងគិតតាមហ្នឹងទៀត»។
កាលពីថ្ងៃទី២៩ ខែធ្នូ ឆ្នាំ២០២០ ត្រូវជាខួបលើកទី២២ នៃនយោបាយឈ្នះឈ្នះ លោកនាយករដ្ឋមន្ត្រី ហ៊ុន សែន បានប្រកាសថា កម្ពុជាទទួលបានជោគជ័យក្នុងការទទួលបានតំណក់ប្រេងជាលើកដំបូងពីអណ្តូងប្រេងអប្សរា ស្ថិតនៅប្លុកអេ (A) នៃឈូងសមុទ្រកម្ពុជា ដោយក្រុមហ៊ុន KrisEnergy ដែលបានខួងរណ្តៅប្រេងពីបាតសមុទ្រនៃខេត្តព្រះសីហនុ។
បើតាមលោក ជៀប សួរ ចាប់តាំងពីថ្ងៃនោះរហូតមកដល់ចុងខែឧសភាកន្លងទៅនេះ ក្រុមហ៊ុន KrisEnergy បូមប្រេងបានប្រមាណជាង៣០ម៉ឺនបារ៉ែល ខណៈកម្ពុជាក៏គ្រោងនាំចេញប្រេងឆៅជាលើកដំបូងនេះទៅកាន់ទីផ្សារអន្តរជាតិផងដែរ ប៉ុន្តែត្រូវបានពន្យារពេលទៅវិញ៕