អាជ្ញាធរខេត្តកែប ប្រាប់ឱ្យម្ចាស់ក្រុមហ៊ុនឬម្ចាស់អាជីវកម្មរុះរើបដាឬផ្ទាំងប៉ាណូផ្សាយពាណិជ្ជកម្មគ្រប់ប្រភេទចេញពីក្នុងភូមិសាស្ត្រខេត្តនេះ ដោយជំនួយមកវិញនូវខ្លឹមសារអប់រំនានាពាក់ព័ន្ធវិធានការទប់ស្កាត់ការឆ្លងរីករាលដាលនៃជំងឺកូវីដ-១៩។
ក្នុងសេចក្តីជូនដំណឹងមួយកាលពីថ្ងៃទី៧ ខែមិថុនា ឆ្នាំ២០២១ រដ្ឋបាលខេត្តកែប បានទុករយៈពេល៣ថ្ងៃចាប់ពីថ្ងៃទី៧ ដល់ថ្ងៃទី៩ ខែមិថុនានេះ ឱ្យម្ចាស់ក្រុមហ៊ុនឬម្ចាស់អាជីវកម្មធ្វើការរុះរើបដាឬផ្ទាំងប៉ាណូដែលមានខ្លឹមសារផ្សព្វផ្សាយផលិតផល ដើម្បីឱ្យរដ្ឋបាលខេត្តមានលទ្ធភាពយកបង្គោលដែលក្រុមហ៊ុនដាក់ផ្សាយពាណិជ្ជកម្មនាពេលកន្លងមកនោះ ទៅដាក់ជំនួសវិញនូវខ្លឹមសារអប់រំនានាពាក់ព័ន្ធនឹងវិធានការទប់ស្កាត់ការរាលដាលជំងឺកូវីដ-១៩។
រដ្ឋបាលខេត្តកែប បានព្រមានថា ក្នុងករណីម្ចាស់ក្រុមហ៊ុនឬម្ចាស់អាជីវកម្មមិនគោរពតាមសេចក្តីជូនដំណឹងនេះ រដ្ឋបាលខេត្តនឹងចាត់វិធានការតាមនីតិវិធីរដ្ឋបាល រួមនឹងធ្វើការរុះរើផង ដោយរាល់ការចំណាយជាបន្ទុករបស់ម្ចាស់ក្រុមហ៊ុន ហើយរាល់ការខូចខាតអាជ្ញាធរខេត្តមិនទទួលខុសត្រូវនោះទេ។
តែយ៉ាងណា អភិបាលរង និងជាអ្នកនាំពាក្យរដ្ឋបាលខេត្តកែប លោក វ៉ៅ សុខា មានប្រសាសន៍បញ្ជាក់បន្ថែមលើលិខិតជូនដំណឹងនេះថា រដ្ឋបាលខេត្តសុំឱ្យម្ចាស់ក្រុមហ៊ុនឬម្ចាស់អាជីវកម្មចូលរួមចំណែកផ្សព្វផ្សាយអំពីវិធានការការពារនៃការឆ្លងរាលដាលជំងឺកូវីដ-១៩ ក្នុងកម្រិតណាមួយប៉ុណ្ណោះ មិនមែនឱ្យរុះរើបដាឬផ្ទាំងប៉ាណូនោះចេញទាំងស្រុងឡើយ។
លោកបន្ថែមថា៖ «នៅតាមដងផ្លូវនៅក្នុងខេត្តកែបយើងនេះ មានប៉ាណូខ្លះគាត់ដាក់ហូរហែជាប់គ្នា៥០ម៉ែត្រមួយ។ យើងមិនហាមទេ ផ្សាយចុះ! ប៉ុន្តែយើងសុំឱ្យមានការចូលរួមផ្សព្វផ្សាយបញ្ហាការឆ្លងរាលដាលជំងឺកូវីដក្នុងហ្នឹងផង ពីព្រោះបើយើងធ្វើថ្មី ក៏វាយូរដែរ។ ឧទាហរណ៍ថា ក្នុងផ្ទាំងប៉ាណូហ្នឹង ទី១ គាត់ដាក់ផ្សព្វផ្សាយផលិតផលរបស់គាត់ទៅ ទី២ គាត់ចូលរួមជាមួយអាជ្ញាធរផ្សព្វផ្សាយពីវិធានការជំងឺកូវីដ ដើម្បីឱ្យប្រជាពលរដ្ឋបានជ្រួតជ្រាបបន្ថែមទៀត។ យើងធ្វើមិននេះ មិនដូចនៅកំពង់ស្ពឺទេ ខុសគ្នា»។
ម្ចាស់ហាងអាហារដ្ឋាននិងភេសជ្ជៈមួយកន្លែងនៅក្រុងកែប លោក កុង ឃួន បានគាំទ្រចំពោះវិធានការរបស់រដ្ឋបាលខេត្តនេះ ហើយថា លោកនឹងអនុវត្តទៅតាមការណែនាំរបស់អាជ្ញាធរ ប៉ុន្តែលោកស្នើឱ្យការអនុវត្តនោះត្រូវមានតម្លាភាព។
លោកបន្ថែមថា៖ «មិនអីទេ! បើនេះជាគោលការណ៍របស់រដ្ឋបាលខេត្ត យើងជាប្រជាពលរដ្ឋ យើងត្រូវអនុវត្តតាម! ត្រឹមផ្ទាំងប៉ាណូ! ប៉ុន្តែបើយើងត្រូវដកទាំងអស់គ្នាទូទាំងខេត្ត កុំដកកន្លែងតែមួយ មួយទៀតឬអ្នកផ្សេងទៀតមិនដក អាហ្នឹងមិនត្រូវទេ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព លោក យង់ គិមអេង មានប្រសាសន៍ថា ប្រសិនបើអាជ្ញាធរខេត្តកែបអនុវត្តដូចការជូនដំណឹងមែននោះ វាជារឿងល្អ ហើយលោកគាំទ្រពេញទំហឹងចំពោះវិធានការនេះ ជាពិសេសការលុបបំបាត់ផ្ទាំងប៉ាណូផ្សព្វផ្សាយគ្រឿងស្រវឹង។
លោក យង់ គិមអេង បន្ថែមថា រដ្ឋបាលខេត្តទាំងអស់គួរតែលុបបំបាត់បដាឬផ្ទាំងប៉ាណូដែលផ្សព្វផ្សាយគ្រឿងស្រវឹង ដោយដាក់ជំនួសមកវិញនូវការផ្សព្វផ្សាយការអប់រំនានា និងគួរផ្សព្វផ្សាយពីរមណីយដ្ឋាននានាក្នុងខេត្តរបស់ខ្លួនវិញ។
លោកបន្ថែមថា៖ «អ៊ីចឹងខ្ញុំគិតថា រដ្ឋបាលខេត្តកែប បើគេអនុវត្តដូច្នេះ ខ្ញុំសូមស្វាគមន៍និងកោតសរសើរចំពោះខេត្ត ដែលគាត់បានគិតលើកកម្ពស់ដល់សីលធម៌យុវវ័យឬក៏ប្រជាពលរដ្ឋរបស់យើង ធ្វើម៉េចឱ្យចៀសចាកឆ្ងាយពីគ្រឿងស្រវឹង។ គ្រឿងស្រវឹងមិនមែនជានិមិត្តរូបរបស់ប្រទេសកម្ពុជាយើងទេ។ មែនទែនទៅ! វាបានបង្កមហន្តរាយទៅដល់ធនធានមនុស្ស ក៏ដូចជាសង្គមកម្ពុជា តាមរយៈការគ្រោះថ្នាក់ចរាចរណ៍ និងអំពើហិង្សាជាដើម»។
ពាក់ព័ន្ធនឹងការតម្រូវឱ្យម្ចាស់ក្រុមហ៊ុនឬម្ចាស់អាជីវកម្មរុះរើបដាឬផ្ទាំងប៉ាណូផ្សព្វផ្សាយផលិតផលនេះ កាលថ្ងៃទី២០ ខែឧសភា ឆ្នាំ២០២១ រដ្ឋបាលខេត្តកំពង់ស្ពឺ ក៏បានដាក់ចេញនូវវិធានការរដ្ឋបាលរបស់ខ្លួន ឱ្យពលរដ្ឋរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរផងដែរ។
អង្គការសង្គមស៊ីវិលមួយចំនួនបានគាំទ្រចំពោះវិធានការដកហូតនិងរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងនេះ ដោយចាត់ទុកវិធានការរបស់អាជ្ញាធរនេះថា ជាជំហានចាប់ផ្តើមដ៏ល្អមួយសម្រាប់កម្ពុជា៕
