រដ្ឋាភិបាលតាមរយៈគណៈកម្មាធិការសិទ្ធិមនុស្សកម្ពុជា បានបញ្ចប់សេចក្តីព្រាងច្បាប់ដំបូងស្តីពី«ការបង្កើតស្ថាប័នសិទ្ធិមនុស្សជាតិ»ហើយ ខណៈមន្ត្រីសង្គមស៊ីវិលព្រួយបារម្ភពីឯករាជ្យភាពរបស់ស្ថាប័នជាតិមួយនេះ។
អនុប្រធានគណៈកម្មាធិការសិទ្ធិមនុស្សកម្ពុជា លោក ជិន ម៉ាលីន បានប្រាប់ វីអូឌី នៅថ្ងៃអង្គារនេះថា គណៈកម្មាធិការសិទ្ធិមនុស្សកម្ពុជា នឹងដាក់ឱ្យភាគីពាក់ព័ន្ធពិគ្រោះយោបល់លើសេចក្តីព្រាងដំបូង ក្នុងពេលឆាប់ៗខាងមុខនេះ។ ប៉ុន្តែ លោកនៅមិនទាន់បញ្ជាក់ឱ្យលម្អិតនៅឡើយទេថា តើសេចក្តីព្រាងច្បាប់នេះមានប៉ុន្មានជំពូកនិងប៉ុន្មានមាត្រានោះ។
យ៉ាងណាក្តី លោកបញ្ជាក់ថា ខ្លឹមសារសំខាន់នៃសេចក្តីព្រាងនេះបានផ្តោតជាសំខាន់លើតួនាទីនិងភារកិច្ចរបស់ស្ថាប័នសិទ្ធិមនុស្សជាតិ ពីសមាសភាពថ្នាក់ដឹកនាំ និងពីឯករាជ្យភាពរបស់ស្ថាប័នថ្នាក់ជាតិនេះ ដែលនឹងមានការចូលរួមពីគ្រប់ភាគី។
លោក ជិន ម៉ាលីន បានថ្លែងយ៉ាងដូច្នេះថា៖ «ឥលូវនេះ យើងបានបញ្ចប់សេចក្តីព្រាងដំបូង ហើយក្រោយពីបញ្ចប់សេចក្តីព្រាងដំបូងនេះ យើងនឹងពិគ្រោះជាមួយគ្រប់ភាគី មានទាំងស្ថាប័នរដ្ឋ ស្ថាប័នអង្គការសង្គមស៊ីវិល ដៃគូអភិវឌ្ឍន៍ អ្នកសិក្សាស្រាវជ្រាវ គ្រឹះស្ថានឧត្តមសិក្សា និងស្ថាប័នវិជ្ជាជីវៈទាំងអស់ ព្រោះច្បាប់នេះមានវិសាលភាពគ្របដណ្តប់លើស្ថាប័នទាំងអស់នៅក្នុងព្រះរាជាណាចក្រកម្ពុជា។ តួនាទីគឺក្នុងការលើកស្ទួយសិទ្ធិសេរីភាព និងការពារសិទ្ធិប្រជាពលរដ្ឋជាមូលដ្ឋានស្នូល»។
ប៉ុន្តែនាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បានដាក់ការព្រួយបារម្ភថា តើស្ថាប័នជាតិមួយនេះ នឹងធានានូវឯករាជ្យភាពនិងមិនចំណុះឱ្យរដ្ឋាភិបាលដែរឬទេ? បើសេចក្តីព្រាងច្បាប់នេះ ធ្វើឡើងដោយរដ្ឋាភិបាលបែបនេះ។
លោកស្រីបានលើកឡើងពីសំណួរយ៉ាងដូច្នេះថា៖ «យើងនឹងចាំមើលថាតើកិច្ចការងារនេះនឹងដំណើរការបែបណា ប៉ុន្តែតាមអ្វីដែលខ្ញុំដឹងកន្លងមក គឺអង្គការសង្គមស៊ីវិលធ្លាប់បានធ្វើកិច្ចការងារជាមួយរដ្ឋាភិបាលច្រើនមកហើយ ហើយធ្លាប់មានសេចក្តីព្រាងច្បាប់ថែមទៅទៀត ប៉ុន្តែមិនដឹងថា សេចក្តីព្រាងច្បាប់ហ្នឹងវាថ្មីពីអ្វីដែលធ្លាប់បានធ្វើឬយ៉ាងម៉េច នេះជារឿងមួយ»។
លោកស្រីបន្តទៀតថា៖ «ហើយទី២ ដូចខ្ញុំបានគូសបញ្ជាក់អ៊ីចឹង កន្លងមក យើងឃើញហើយ នីតិវិធីនៃការតាក់តែងច្បាប់អ្វីផ្សេងៗហ្នឹង និងការពិគ្រោះយោបល់ទៀតសោតហ្នឹង ថាតើនឹងធានាការបញ្ចូលមតិឬធាតុចូលហ្នឹងដោយពេញលេញ ឬដោយមានអត្ថន័យបែបណា គឺជារឿងផ្សេងទៀត។ អ៊ីចឹងបានខ្ញុំគូសបញ្ជាក់ ពាក់ព័ន្ធនឹងការបង្កើតគណៈកម្មការសិទ្ធិមនុស្សនេះ ការពិតអាស្រ័យលើទិដ្ឋភាពច្បាប់ហើយ តែនៅក្នុងច្បាប់ហ្នឹងត្រូវធានាថា សមាសភាពដែលមកធ្វើការនៅក្នុងគណៈកម្មការថ្នាក់ជាតិនេះ ត្រូវតែតួអង្គឯករាជ្យ ហើយមិនគួរចំណុះឱ្យរដ្ឋាភិបាលអីនោះទេ បើមិនចឹងទេ វានឹងមិនធានាដល់ឯករាជ្យភាពរបស់គណៈកម្មការសិទ្ធិមនុស្សហ្នឹងទេ»។
លោកស្រី ចក់ សុភាព នៅតែមើលឃើញថា ការបង្កើតស្ថាប័នសិទ្ធិមនុស្សជាតិនៅក្នុងកាលៈទេសៈពេលនេះ គឺពិបាកក្នុងការធានាថាជាស្ថាប័នជាតិដែលឯករាជ្យខ្លាំងណាស់។
យ៉ាងណាក្តី បើតាមការបញ្ជាក់ពីលោក ជិន ម៉ាលីន អនុប្រធាន និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា ថា ស្ថាប័នសិទ្ធិមនុស្សជាតិនេះ គឺជាស្ថាប័នឯករាជ្យដែលមិនចំណុះក្រោមរដ្ឋាភិបាលនោះទេ។ លោកបន្តថា ស្ថាប័នសិទ្ធិមនុស្សជាតិនេះ គឺផ្សេងពីយន្តការគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា។
បើតាមលោក ជិន ម៉ាលីន ដែលមានតួនាទីជារដ្ឋលេខាធិការក្រសួងយុត្តិធម៌ផងនោះ បានថ្លែងថា សេចក្តីព្រាងច្បាប់ដំបូងនេះក៏មានការចូលរួមផ្តល់ធាតុចូលពីប្រទេសអូស្ត្រាលី តាមរយៈអង្គការវេទិកាអាស៊ីប៉ាស៊ីហ្វិកដែលមានមូលដ្ឋាននៅប្រទេសអូស្រ្តាលី។
គួរជម្រាបជូនថា គម្រោងនៃការបង្កើតស្ថាប័នសិទ្ធិមនុស្សជាតិនេះ ត្រូវបានលោកនាយករដ្ឋមន្ត្រីបើកភ្លើងខៀវឱ្យបង្កើតតាំងពីទសវត្សរ៍ឆ្នាំ១៩៩៦មកម៉្លេះ ដោយអនុលោមទៅតាមគោលការណ៍ប៉ារីស (The Paris Principles) ដែលត្រូវបានបង្កើតឡើងនៅក្នុងសិក្ខាសាលាអន្តរជាតិមួយនាទីក្រុងប៉ារីស ឆ្នាំ១៩៩១ ហើយត្រូវបានមហាសន្និបាតអង្គការសហប្រជាជាតិ អនុម័តនៅឆ្នាំ១៩៩៣។ ស្ថាប័នសិទ្ធិមនុស្សជាតិ គឺជាស្ថាប័នឯករាជ្យមួយមិនចំណុះក្រោមរដ្ឋាភិបាល ដែលមានតួនាទីការពារនិងធ្វើឱ្យប្រសើរឡើងនូវស្ថានភាពសិទ្ធិមនុស្សនៃប្រទេសជាសមាជិក៕
