ក្រុមមន្ត្រីសង្គមស៊ីវិល ជំរុញទៅរដ្ឋាភិបាលស្រាវជ្រាវរកមេខ្យល់និងអ្នកដែលគប់គិតគ្នាជាមួយអាជ្ញាធរទារលុយពីពលរដ្ឋ ជាថ្នូរបានចាក់វ៉ាក់សាំងការពារជំងឺកូវីដ-១៩ ដោយសារការចាក់វ៉ាក់សាំងនេះ រដ្ឋាភិបាលពុំអនុញ្ញាតឱ្យយកលុយពីពលរដ្ឋនោះឡើយ។
ការជំរុញនេះធ្វើឡើងក្រោយមានកិច្ចប្រជុំបូកសរុបលទ្ធផលយុទ្ធនាការចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋ កម្មករ-កម្មការិនី និងជនបរទេស អាយុចាប់ពី១៨ឆ្នាំឡើងទៅ នៅខណ្ឌចំនួន៦ ក្នុងភូមិសាស្ត្ររាជធានីភ្នំពេញ និងក្រុងតាខ្មៅ កាលពីថ្ងៃទី១៤ ខែមិថុនា ម្សិលមិញនេះ ឧបនាយករដ្ឋមន្ត្រី រដ្ឋមន្រ្តីក្រសួងការពារជាតិ លោក ទៀ បាញ់ បានបញ្ជាទៅមន្ត្រីរបស់ខ្លួនត្រូវស្រាវជ្រាវចាប់មេខ្យល់និងអ្នកពាក់ព័ន្ធដែលនាំពលរដ្ឋមកពីតំបន់ផ្សេងៗមកចាក់វ៉ាក់សាំងកូវីដ-១៩ ហើយយកលុយពីពួកគាត់ក្នុងម្នាក់ចំនួន២០ដុល្លារ ដើម្បីយកមកផ្តន្ទាទោសទៅតាមច្បាប់ ។
លោក ទៀ បាញ់ បានឱ្យដឹងថា៖ «ក្រោយពីមានមេខ្យល់នាំប្រជាពលរដ្ឋមកពីតំបន់ផ្សេងៗមកចាក់វ៉ាក់សាំង ហើយយកលុយពីពួកគាត់ក្នុងម្នាក់២០ដុល្លារ ខណៈរាជរដ្ឋាភិបាលពុំបានឱ្យយកលុយនោះឡើយ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ដើមចមដែលនាំឱ្យពលរដ្ឋផ្តល់លុយឱ្យអាជ្ញាធរមូលដ្ឋាន ឬភូមិ ឬសង្កាត់ ឬមេខ្យល់ ដើម្បីទទួលបានការចាក់វ៉ាក់សាំងការពារជំងឺកូវីដ-១៩ ដោយសារតែពលរដ្ឋមួយចំនួនមិនទទួលបានព័ត៌មានគ្រប់ជ្រុងជ្រោយជាដើម។
ករណីនេះ លោក សន ជ័យ ជំរុញទៅរដ្ឋាភិបាលត្រូវធ្វើការស្រាវជ្រាវរកមេខ្យល់និងមន្ត្រីពាក់ព័ន្ធដែលយកលុយពីប្រជាពលរដ្ឋជាថ្នូរចាក់វ៉ាក់សាំងការពារជំងឺកូវីដ-១៩ ដើម្បីជាគំរូល្អ កុំឱ្យរឿងនេះកើតឡើងបន្តទៀត។
លោកមានប្រសាសន៍ថា៖ «ការស៊ើបអង្កេតមិនមានការលំបាកទេ បើសិនជាមានការស៊ើបអង្កេតហ្មត់ចត់! ហើយកុំឱ្យមានព្រឹត្តិការណ៍ តែងតែមានជនខិលខូចឆក់ឱកាស ឆ្លៀតឱកាសកេងចំណេញពីពលរដ្ឋ។ ហើយរឿងនេះមិនមែនកើតឡើងជាទូទៅទេ ជាពិសេសកើតឡើងចំពោះប្រជាពលរដ្ឋដែលគាត់ពុំមានលទ្ធភាពច្រើនក្នុងការទទួលបានព័ត៌មានឱ្យទូលំទូលាយ»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា ពាក់ព័ន្ធនឹងការទារលុយពលរដ្ឋជាថ្នូរបានចាក់វ៉ាក់សាំងកូវីដ-១៩ គឺជារឿងផ្ទុយពីគោលការណ៍របស់រដ្ឋាភិបាលដែលកំណត់ថា ពលរដ្ឋគ្រប់រូបទៅចាក់វ៉ាក់សាំងដោយមិនគិតថ្លៃ។
ករណីនេះ លោក ពិសី ផ្តល់ជាអនុសាសន៍ថា ដើម្បីទប់ស្កាត់បញ្ហាទាំងនោះបាន លុះត្រាតែអង្គភាពប្រឆាំងអំពើពុករលួយ និងក្រសួងសុខាភិបាល ត្រូវសហការគ្នាជាមួយសមត្ថកិច្ច ចុះស្រាវជ្រាវករណីនេះ និងពង្រឹងការអនុវត្តច្បាប់ឱ្យបានតឹងរ៉ឹងលើអ្នកប្រព្រឹត្ត ទើបអាចមានប្រសិទ្ធភាពខ្ពស់។
លោកមានប្រសាសន៍ថា៖ «ពាក់ព័ន្ធនឹងរឿងនេះ អាចពាក់ព័ន្ធនឹងអំពើពុករលួយ ហើយការចូលរួមរបស់អង្គភាពប្រឆាំងអំពើពុករលួយមើលលើកិច្ចការហ្នឹងក៏ជាការចាំបាច់ដែរ ដោយមានការសហការជាមួយក្រសួងសុខាភិបាល និងអង្គភាពប្រឆាំងអំពើពុករលួយទៅ ហើយធ្វើម៉េចយើងអនុវត្តច្បាប់ឱ្យបានតឹងរ៉ឹង។ ខ្ញុំមើលឃើញស្រុកយើងប្រើមនោសញ្ចេតនាច្រើន អ៊ីចឹងកិច្ចការអត់មានប្រសិទ្ធភាពកើតទេ»។
វីអូឌី មិនអាចសុំការបំភ្លឺបន្ថែមពីរដ្ឋមន្រ្តីក្រសួងការពារជាតិ លោក ទៀ បាញ់ និងអ្នកនាំពាក្យ លោក ឈុំ សុជាតិ បានទេនៅថ្ងៃនេះ។
ដោយឡែក អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា កន្លងមក លោកស្រីធ្លាប់ទទួលបានព័ត៌មាននេះដែរ ប៉ុន្តែមិនមានភស្តុតាងណាមួយច្បាស់លាស់ ដើម្បីស្វែងរកជនខិលខូចដែលទារលុយពីពលរដ្ឋជាថ្នូរបានចាក់វ៉ាក់សាំងនោះទេ។ យ៉ាងណា លោកស្រីអំពាវនាវទៅប្រជាពលរដ្ឋដែលរងគ្រោះដោយសារការទារលុយពីមេខ្យល់ឬពីមន្ត្រីមូលដ្ឋាន ត្រូវរាយការណ៍មកក្រសួងសុខាភិបាល ដើម្បីចាត់វិធានការបន្ទាន់លើជនខិលខូចទាំងនោះ។
លោកស្រីមានប្រសាសន៍ថា៖ «បើសិនករណីមានជនខិលខូចគាត់ទៅទារលុយពីបងប្អូនយើងដែលទៅចាក់វ៉ាក់សាំង សូមកុំឱ្យ! យើងសាម៉ីខ្លួន កុំឱ្យ! បើសិនជាមានបញ្ហាអ្វី សូមតេមកគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស [គ.វ.ក-១៩] ដើម្បីក្រុមការងារ [គ.វ.ក-១៩] ចុះធ្វើការស្រាវជ្រាវវែកមុខរកជនខិលខូចជាបន្ទាន់។ តែយើងមិនមានការអនុញ្ញាត មិនមានការលើកលែងឱ្យជនណាដែលប្រកាសឬមួយក៏ទៅបង្ខិតបង្ខំបងប្អូនយើង ដើម្បីឱ្យបង់លុយបង់កាក់ សុំកុំជឿ ហើយកុំបង់ឱ្យសោះ»។
កាលពីម្សិលមិញនោះ រដ្ឋមន្ត្រីក្រសួងការពារជាតិ លោក ទៀ បាញ់ ថ្លែងទៀតថា រហូតមកដល់ពេលនេះ ក្រុមការងារចាក់វ៉ាក់សាំងការពារមេរោគកូវីដ-១៩ ជូនដល់ប្រជាពលរដ្ឋក្នុងខណ្ឌចំនួន៦ នៃរាជធានីភ្នំពេញ បានប្រហែល១លាននាក់ហើយ។
លោកថ្លែងទៀតថា ក្រសួងការពារជាតិ នឹងបន្តចាក់ជូនប្រជាពលរដ្ឋនៅខេត្តចំនួន៥បន្ថែមទៀត ដូចជា ខេត្តកំពង់ចាម កំពងស្ពឺ តាកែវ ស្វាយរៀង និងព្រះសីហនុ ដើម្បីធ្វើយ៉ាងណាពន្លឿនការចាក់វ៉ាក់សាំងជូនប្រជាពលរដ្ឋឱ្យបានឆាប់រហ័សបំផុត ស្របទៅតាមការណែនាំរបស់រាជរដ្ឋាភិបាល។
របាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី១៤ ខែមិថុនា កម្ពុជាបានចាក់វ៉ាក់សាំងប្រឆាំងជំងឺកូវីដ-១៩ ជូនប្រជាពលរដ្ឋនៅទូទាំងប្រទេសបានចំនួន៣លាននាក់ នៃចំនួនគោលដៅប្រជាជនដែលត្រូវចាក់មានចំនួន១០លាននាក់ សម្រាប់រយៈពេលត្រឹមខែវិច្ឆិកា ឆ្នាំ២០២១នេះ៕
