អាជីវករលក់ដូរនៅផ្សារមួយចំនួនបង្ហាញក្តីរីករាយលាយឡំនឹងក្តីបារម្ភពីការឆ្លងជំងឺកូវីដ-១៩ ក្រោយពីរដ្ឋបាលរាជធានីភ្នំពេញអនុញ្ញាតឱ្យបើកដំណើរការគ្រប់អាជីវកម្ម-ការលក់ដូរជាប្រក្រតីឡើងវិញក្នុងផ្សាររដ្ឋទាំងអស់។
សេចក្តីសម្រេចរបស់រដ្ឋបាលរាជធានីភ្នំពេញ កាលពីយប់ថ្ងៃម្សិលមិញ ស្តីពីការអនុញ្ញាតឱ្យបើកដំណើរការគ្រប់អាជីវកម្ម ការលក់ដូរជាប្រក្រតីឡើងវិញ ក្នុងក្របខណ្ឌផ្សាររដ្ឋទាំងអស់នៅរាជធានីភ្នំពេញ បានបញ្ជាក់ថា រាល់អាជីវកម្ម ការលក់ដូរ ចាំបាច់ត្រូវអនុវត្តវិធានការសុវត្ថិភាពអនាម័យផ្នែកសុខាភិបាលឱ្យបានម៉ឺងម៉ាត់ ដូចជា កាតព្វកិច្ចពាក់ម៉ាស រក្សាគម្លាតសុវត្ថិភាព ការធ្វើអនាម័យសម្លាប់មេរោគ ការវាស់កម្ដៅ ការស្កេន QR code និងវិធានការ «៣កុំ និង ៣ការពារ» ក៏ដូចជាអនុវត្តតាមការណែនាំរបស់ក្រសួងសុខាភិបាល ជាដើម។
រដ្ឋបាលរាជធានីភ្នំពេញ បន្តថា សម្រាប់អភិបាលរដ្ឋាករស្វយ័តផ្សារធំថ្មី គណៈគ្រប់គ្រងផ្សាររដ្ឋ សន្តិសុខ បុគ្គលិក កម្មករ អតិថិជន និងប្រជាពលរដ្ឋដែលចេញចូលផ្សារ ត្រូវអនុវត្តវិធានរដ្ឋបាល វិធានសុខាភិបាល និងគោលការណ៍ណែនាំស្ដីពីការបើកដំណើរការឡើងវិញ ចំពោះផ្សាររដ្ឋទាំងអស់នៅរាជធានីភ្នំពេញ ក៏ដូចជាវិធានរឹតបន្តឹងការអនុវត្តចំពោះសកម្មភាពការងារ មុខរបរ ឬអាជីវកម្ម និងការជួបជុំ ការប្រមូលផ្ដុំមនុស្សជាលក្ខណៈឯកជន ជាដើម។
រដ្ឋបាលរាជធានីភ្នំពេញ ក៏បានណែនាំដល់រដ្ឋបាលខណ្ឌទាំង១៤ និងមន្ទីរពាណិជ្ជកម្មភ្នំពេញ ត្រូវចុះត្រួតពិនិត្យការអនុវត្តតាមផ្សារនីមួយៗ ហើយក្នុងករណីរកឃើញថា អភិបាលរដ្ឋាករស្វយ័តផ្សារធំថ្មី និងគណៈកម្មការគ្រប់គ្រងផ្សាររដ្ឋ ឬបុគ្គលណា មិនព្រមសហការអនុវត្ត ត្រូវចាត់វិធានការរដ្ឋបាលនិងច្បាប់ដោយគ្មានការលើកលែង។
អ្នកស្រី នង លក្ខិណា អាយុ៥២ឆ្នាំ ជាអាជីវករលក់បន្លែត្រីសាច់នៅផ្សារកណ្តាល បានប្រាប់ វីអូឌី នៅថ្ងៃអង្គារនេះថា អ្នកស្រីមានអារម្មណ៍សប្បាយចិត្ត ក្រោយរដ្ឋបាលរាជធានីភ្នំពេញប្រកាសឱ្យបើកផ្សារឡើងវិញ ព្រោះរូបគាត់អាចរកចំណូលបានឡើងវិញ។ អ្នកស្រីបន្តថា ក្នុងអំឡុងពេលបិទផ្សាររដ្ឋនោះ សេដ្ឋកិច្ចគ្រួសាររបស់គាត់បានធ្លាក់ចុះខ្លាំង ខណៈអ្នកស្រីក៏មានបំណុលនៅធនាគារផងដែរ។
អ្នកស្រីបន្តថា៖ «ប៉ុន្តែនៅមានការព្រួយបារម្ភចំពោះជំងឺកូវីដ-១៩ ដែលអាចកើតឡើងម្តងទៀត អ៊ីចឹងត្រូវមានការប្រុងប្រយ័ត្នទាំងអស់គ្នា និងមានការការពារជាចម្បង កុំធ្វេសប្រហែសឱ្យសោះចំពោះជំងឺនេះ»។
លោក បូ សារិន អាយុ៣៨ឆ្នាំ ជាអាជីវករលក់គុយទាវនិងមីឆាតាមរ៉ឺម៉កនៅផ្សារដើមគរ មានប្រសាសន៍ថា ការបើកផ្សារឡើងវិញនេះអាចបង្កភាពងាយស្រួលដល់គាត់ក្នុងការទិញសម្ភារនិងម្ហូបអាហារសម្រាប់លក់បន្ត។
លោកបន្តថា៖ «តែនៅតែមានការព្រួយបារម្ភអ៊ីចឹងចំពោះជំងឺកូវីដ-១៩ ប៉ុន្តែធ្វើយ៉ាងម៉េច បើយើងជំពាក់លុយធនាគារ បើគ្រាន់តែដើម្បីក្រពះមិនជាបញ្ហានោះទេ តែបញ្ហាចម្បងគឺរឿងធនាគារ គេមិនចាំយើងទេ។ ដូច្នេះ ត្រូវតែព្យាយាមរកស៊ី តែក៏ត្រូវការពារផងដែរ ដោយពាក់ម៉ាស់ លាងដៃជាមួយអាល់កុល និងរក្សាគម្លាតជានិច្ច»។
ចំណែកប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ក៏បានសាទរដែលរដ្ឋបាលរាជធានីភ្នំពេញបើកផ្សាររដ្ឋឡើងវិញ ព្រោះក្នុងរយៈពេលបិទខ្ទប់កន្លងមក អាជីវករជួបការលំបាកច្រើនក្នុងជីវភាពគ្រួសារដោយសារតែគ្មានចំណូល ហើយរដ្ឋក៏មិនបានជួយពួកគាត់ឱ្យបានគ្រប់គ្រាន់ផងដែរ។
លោកបន្តថា៖ «ទោះបីតួលេខជំងឺកូវីដ-១៩ នៅតែមិនទាន់ធូរថយយ៉ាងណាក៏ដោយ ប៉ុន្តែខ្ញុំគិតថា អាជីវករខ្លួនឯងគួររក្សាសុវត្ថិភាព ៣ការពារ ៣កុំ និងពាក់ម៉ាស់ លាងដៃឱ្យបានជាប្រចាំ ជារឿងមួយល្អប្រសើរសម្រាប់អាជីវករលក់ដូរនៅរាជធានីភ្នំពេញផងដែរ»។
ទោះយ៉ាងណា លោកក៏បានជំរុញទៅអាជ្ញាធរ ជាពិសេសអ្នកគ្រប់គ្រងផ្សារនីមួយៗ ត្រូវមានសន្តិសុខសម្រាប់ត្រួតពិនិត្យ និងកំណត់ចំនួនមនុស្សក្នុងការចេញ-ចូលផ្សារឱ្យបានច្បាស់លាស់ ព្រមទាំងត្រូវកំណត់ឱ្យអាជីវករនិងពលរដ្ឋដែលចេញចូលផ្សារ ពាក់ម៉ាស់ និងអនុវត្តវិធានសុខាភិបាលឱ្យបានត្រឹមត្រូវផងដែរ។
ចំណែកប្រធានវិទ្យាស្ថានប្រជាធិបតេយ្យកម្ពុជា និងអ្នកជាអ្នកឃ្លាំមើលការអភិវឌ្ឍសង្គម លោក ប៉ា ចន្ទរឿន ហាក់មានការភ្ញាក់ផ្អើលដែលរដ្ឋបាលរាជធានីភ្នំពេញអនុញ្ញាតឱ្យបើកផ្សាររដ្ឋឡើងវិញ ខណៈស្ថានភាពជំងឺកូវីដ-១៩នៅមិនទាន់ធូរស្បើយនៅឡើយ។
តែយ៉ាងណា លោកថា ការអនុញ្ញាតឱ្យបើកផ្សារឡើងវិញនេះ អាជ្ញាធរអាចមានការសិក្សាជាលក្ខណៈបច្ចេកទេសនិងមានវិធានការគ្រប់គ្រាន់ហើយ ទើបមានការសម្រេចបែបនេះ។
លោកថា៖ «ដើម្បីឱ្យរាជធានីភ្នំពេញមានសុវត្ថិភាព ទាំងអាជ្ញាធរនិងប្រជាពលរដ្ឋមិនត្រូវព្រលែងដៃចំពោះជំងឺកូវីដ-១៩នោះទេ ដោយត្រូវមានការរក្សាគម្លាត ពាក់ម៉ាស់ និងលាងដៃជាមួយអាល់កុលជាប្រចាំ បើមិនដូច្នោះទេ អាចបង្កឱ្យមានហានិភ័យម្តងទៀតនៅរាជធានីភ្នំពេញ»។
កាលពីយប់ថ្ងៃទី២៣ ខែមេសា រដ្ឋបាលរាជធានីភ្នំពេញ បានចេញសេចក្ដីសម្រេចបិទផ្សាររដ្ឋនិងផ្សារមិនរៀបរយរយៈពេល១៤ថ្ងៃ ដើម្បីទប់ស្កាត់ការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ។ ប៉ុន្តែក្រោយមក ដោយឃើញស្ថានការណ៍នៃការឆ្លងជំងឺនេះនៅមិនទាន់ធូរស្រាល រដ្ឋបាលរាជធានីភ្នំពេញក៏បន្តបិទមួយរយៈបន្ថែមទៀត រហូតមកដល់ថ្ងៃម្សិលមិញនេះ ទើបមានការសម្រេចឱ្យបើកឡើងវិញ៕
