មន្ត្រីជាន់ខ្ពស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បានឱ្យដឹងថា ក្រុមការងារជំនាញកំពុងស្រាវជ្រាវនិងស្រង់ស្ថិតិរកជនអន្តោប្រវេសន៍ខុសច្បាប់ដែលរស់នៅលើផ្ទះបណ្តែតទឹក ដើម្បីបញ្ជូនទៅប្រទេសកំណើតពួកគេវិញ។
ការស្រាវជ្រាវនិងស្រង់ស្ថិតិនេះ ធ្វើឡើងបន្ទាប់ពីរដ្ឋបាលរាជធានីភ្នំពេញ ចេញសេចក្តីជូនដំណឹងទៅអ្នករស់នៅលើផ្ទះបណ្តែតទឹក បែចិញ្ចឹមត្រី និងសំណង់មិនរៀបរយតាមដងទន្លេក្នុងរាជធានីភ្នំពេញ ឱ្យរុះរើចេញ ដើម្បីកុំឱ្យប៉ះពាល់ដល់ជីវចម្រុះក្នុងទឹក ខូចគុណភាពទឹក បំពុលបរិស្ថាន ប៉ះពាល់សោភ័ណភាពរាជធានីភ្នំពេញ ព្រមទាំងប៉ះពាល់ដល់សុខភាពប្រជាពលរដ្ឋដែលប្រើប្រាស់ទឹកមិនស្អាតផងដែរ។
អ្នកនាំពាក្យនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កែវ វណ្ណថន មានប្រសាសន៍នៅថ្ងៃពុធនេះថា សមត្ថកិច្ចជំនាញបានសហការជាមួយអាជ្ញាធរមូលដ្ឋាន ដើម្បីស្រាវជ្រាវរកជនអន្តោប្រវេសន៍ ជាពិសេសជនជាតិវៀតណាមដែលកំពុងរស់នៅលើផ្ទះបណ្តែតទឹកនិងសំណង់មិនរៀបរយតាមដងទន្លេក្នុងរាជធានីភ្នំពេញ។
អ្នកនាំពាក្យរូបនេះអះអាងថា បើរកឃើញជនអន្តោប្រវេសន៍រស់នៅមិនស្របច្បាប់ ក្រុមការងារជំនាញនឹងអនុវត្តតាមច្បាប់អន្តោប្រវេសន៍ ដោយបណ្តេញពួកគេចេញទៅប្រទេសកំណើតវិញ។
លោកមានប្រសាសន៍ថា៖ «បើសិនជាគាត់ជាជនបរទេសអន្តោប្រវេសន៍ស្របច្បាប់ ទាល់តែមានបណ្ណស្នាក់នៅអចិន្ត្រៃយ៍ បើអត់មានទេ យើងអនុវត្តច្បាប់ហើយ។ អនុវត្តច្បាប់អន្តោប្រវេសន៍ គឺបណ្តេញចេញអ្នកដែលអត់មានលិខិតឆ្លងដែន ឬក៏ស្នាក់នៅលើសទិដ្ឋាការ ឬក៏អត់មានបណ្ណស្នាក់នៅអចិន្ត្រៃយ៍»។
ទោះជាយ៉ាងណា លោក កៅ វណ្ណថន មិនបានបញ្ជាក់ពីចំនួនជនអន្តោប្រវេសន៍ដែលកំពុងរស់នៅខុសច្បាប់ថាមានចំនួនប៉ុន្មាននៅឡើយទេ ដោយថា ក្រុមការងារជំនាញកំពុងស្រាវជ្រាវជុំវិញបញ្ហានេះ។
ទាក់ទិននឹងបញ្ហាជនអន្តោប្រវេសន៍ ជាពិសេសជនជាតិវៀតណាមដែលរស់នៅលើផ្ទះបណ្តែតទឹកនេះដែរ ប្រធានសមាគមវៀតណាម លោក ស៊ឹម ជី និយាយកាលពីថ្ងៃទី៨ ខែមិថុនា ឆ្នាំ២០២១ ថាសមាគមរបស់លោកបានដាក់លិខិតទៅកាន់រដ្ឋបាលរាជធានីភ្នំពេញ ដោយបានស្នើសុំចំនួន៣ចំណុច រួមមាន ទី១ ស្នើសុំពន្យារពេលសមស្របបំផុត ដើម្បីផ្លាស់ប្តូរទីតាំង ទី២ ស្នើសុំឱ្យរដ្ឋបាលរាជធានីភ្នំពេញ រកទីតាំងថ្មី ដែលពួកគេអាចចិញ្ចឹមត្រីបន្តទៀតបាន និងទី៣ ស្នើសុំថវិកាខ្លះ ដើម្បីជួយផ្គត់ផ្គង់ឱ្យពួកគេមានលទ្ធភាពចិញ្ចឹមជីវិតនៅពេលចេញទៅវិញជាដើម។
ក្រោយមក នៅថ្ងៃទី១០ ខែមិថុនា ឆ្នាំ២០២១ អ្នកនាំពាក្យក្រសួងការបរទេសវៀតណាម លោកស្រី Lê Thị Thu Hằng បានចេញសេចក្តីថ្លែងការណ៍មួយក្រើនរំឭកពីការស្នើសុំរបស់រដ្ឋមន្ត្រីខ្លួនទៅកាន់ភាគីកម្ពុជា ត្រូវមានផែនទីបង្ហាញផ្លូវសមស្របសម្រាប់សហគមន៍ពលរដ្ឋដើមកំណើតវៀតណាម ដើម្បីធានាបាននូវសិទ្ធិនិងសុខុមាលភាពពេញលេញរបស់ពួកគេផងដែរ។
អ្នកនាំពាក្យក្រសួងការបរទេសវៀតណាម និយាយថា៖ «ការរៀបចំទីតាំងថ្មីសម្រាប់ពលរដ្ឋដើមកំណើតវៀតណាម ត្រូវឈរលើហេតុផលអាចទទួលយកបានជាមួយនឹងការរៀបចំហេដ្ឋារចនាសម្ព័ន្ធចាំបាច់ ដែលធានាឱ្យជីវិតរបស់ពួកគេមានស្ថិរភាពនិងការគាំទ្រសុខុមាលភាពពីសង្គម»។
ទោះជាបែបនេះក្តី មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែនករុណា បង្ហាញការគាំទ្រចំពោះចំណាត់ការរបស់អាជ្ញាធរខ្មែរក្នុងការស្រង់ស្ថិតិនិងស្រាវជ្រាវរកមើលជនអន្ដោប្រវេសន៍ដែលកំពុងរស់នៅដោយខុសច្បាប់ក្នុងប្រទេសកម្ពុជា ដើម្បីធ្វើបែបបទបញ្ជូនពួកគេឱ្យត្រលប់ទៅប្រទេសកំណើតរបស់ខ្លួនវិញ។
ប៉ុន្តែមន្ត្រីសិទ្ធិមនុស្សរូបនោះស្នើដល់អាជ្ញាធរអនុវត្តច្បាប់នេះឱ្យមានតម្លាភាពរវាងជនអន្តោប្រវេសន៍ខុសច្បាប់នៅលើដីគោក និងនៅលើផ្ទះបណ្តែតទឹក ទូទាំងប្រទេស ទើបអាចទប់ស្កាត់មិនឱ្យមានជនអន្តោប្រវេសន៍ខុសច្បាប់ហូរចូលមកកម្ពុជាបន្តទៀត។
លោកបានបន្តថា៖ «ជាធម្មតា ការអនុវត្តច្បាប់ គេអត់មានគិតមានក្រខ្ពស់ទាបអីទេ សខ្មៅអីទេ! គេគិតទៅការអនុវត្តឱ្យមានភាពត្រឹមត្រូវ ឱ្យមានភាពស្មើគ្នាទាំងអស់គ្នា ហើយចំណុចទាំងអស់នេះ ចៀសវាងមានការរិះគន់ អាជ្ញាធរគប្បីមានការពិនិត្យមើលនៅក្នុងរឿងហ្នឹងឡើងវិញ»។
លោកមានប្រសាសន៍បន្ថែមទៀតថា៖ «ហើយយើងត្រូវពិនិត្យមើលការពង្រឹងលើការអនុវត្តច្បាប់ តើមូលហេតុអ្វីបានជាជនបរទេសអាចមករស់នៅក្នុងប្រទេសយើងយ៉ាងអនាធិបតេយ្យ ដោយមិនមានការអនុវត្តច្បាប់អន្តោប្រវេសន៍ឱ្យបានត្រឹមត្រូវ។ ចំណុចទាំងអស់នេះ គួរតែធ្វើជាប្រចាំ អត់មែនធ្វើម្ដងម្កាលអ៊ីចឹងទេ ដើម្បីចៀសវាងកុំឱ្យមានបញ្ហាបែបនេះកើតឡើងទៀត»។
យ៉ាងណា ក្នុងលិខិតរបស់អ្នកនាំពាក្យនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ កាលពីថ្ងៃ១៥ ខែមិថុនា ឆ្នាំ២០២១ ម្សិលមិញនេះ បានឱ្យដឹងថា កន្លងមក អគ្គនាយកដ្ឋានអន្តោប្រវេសន៍បានពង្រឹងការអនុវត្តច្បាប់ជាប្រចាំចំពោះជនបរទេសខុសច្បាប់គ្រប់រូបភាព ដោយធ្វើការឃាត់ខ្លួន កសាងសំណុំរឿងបញ្ជូនទៅតុលាការ និងអនុវត្តការបណ្តេញចេញពីប្រទេសកម្ពុជាស្របតាមច្បាប់អន្តោប្រវេសន៍ទៀតផង។
លិខិតដដែលបញ្ជាក់ថា ចាប់ពីឆ្នាំ២០១៤ រហូតដល់៥ខែក្នុងឆ្នាំ២០២១នេះ អគ្គនាយកដ្ឋានអន្តោប្រវេសន៍បានបណ្តេញជនបរទេសខុសច្បាប់ចេញពីប្រទេសកម្ពុជា សរុបចំនួន១៨ ៤៧០នាក់ ស្មើនឹង១០៤សញ្ជាតិ៕