រដ្ឋសភានឹងបោះឆ្នោតតែងតាំងប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ថ្មី នៅសប្តាហ៍ក្រោយ ក្រោយពីគណបក្សប្រជាជនកម្ពុជាបានសម្រេចឱ្យលោក ប្រាជ្ញ ច័ន្ទ ធ្វើជាប្រធាន គ.ជ.ប ថ្មីជំនួសលោក ស៊ិក ប៊ុនហុក។
អគ្គលេខាធិការនិងជាអ្នកនាំពាក្យរដ្ឋសភា លោក ឡេង ប៉េងឡុង បានប្រាប់ វីអូឌី នៅថ្ងៃពុធនេះថា បន្ទាប់ពីទទួលបានការសម្រេចនេះ គណៈអចិន្ត្រៃយ៍រដ្ឋសភានឹងកោះប្រជុំនៅ៣ថ្ងៃបន្ទាប់ពីការសម្រេចនេះ។ លោកថា បើគ្មានការប្រែប្រួលទេ រដ្ឋសភានឹងប្រជុំអនុម័តលើបេក្ខភាពរបស់លោក ប្រាជ្ញ ច័ន្ទ នៅសប្តាហ៍ក្រោយ។
លោក ឡេង ប៉េងឡុង បានថ្លែងយ៉ាងដូច្នេះថា៖ «អាទិត្យក្រោយនេះ គឺគណៈអចិន្រ្តៃយ៍នឹងប្រជុំ ដើម្បីបញ្ជូនបេក្ខភាពឯកឧត្តម ប្រាជ្ញ ច័ន្ទ ទៅក្នុងរបៀបវារៈនៃសម័យប្រជុំរដ្ឋសភា ហើយដើម្បីសុំរដ្ឋសភាបោះឆ្នោតសុំសេចក្តីទុកចិត្តឯកឧត្តម ប្រាជ្ញ ច័ន្ទ ជាប្រធានគណៈកម្មាធិការជាតិរៀបចំការបោះឆ្នោត។ អ៊ីចឹងគឺអាទិត្យក្រោយ យើងធ្វើការងារហ្នឹង»។
កាលពីព្រឹកថ្ងៃទី១៥ ខែមិថុនា ម្សិលមិញនេះ គណៈកម្មាធិការអចិន្ត្រៃយ៍រដ្ឋសភាបានអនុម័តលើបេក្ខជន២រូបដែលបានដាក់ពាក្យឈរឈ្មោះជាបេក្ខជនប្រធានគណៈកម្មាធិការជាតិរៀបចំការបោះឆ្នោតថ្មី ជំនួសលោក ស៊ិក ប៊ុនហុក គឺលោកប្រាជ្ញ ច័ន្ទ អតីតអភិបាលខេត្តបាត់ដំបង ដែលបច្ចុប្បន្នគឺជាតំណាងរាស្ត្រនិងជាប្រធានគណៈកម្មការទី១នៃរដ្ឋសភា និងលោក ការ លាន ដែលជាអតីតអភិបាលខេត្តព្រះវិហារ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថា គណបក្សបានតែងតាំងលោក ប្រាជ្ញ ច័ន្ទ ដោយសារគណបក្សកាន់អំណាចមួយនេះមើលឃើញថា លោកមានសមត្ថភាពនិងបទពិសោធន៍ការងារច្រើនក្នុងការចាត់ចែងការងាររដ្ឋបាល។
លោកមានប្រសាសន៍ថា៖ «អាហ្នឹងគឺផ្អែកលើលក្ខណៈវិនិច្ឆ័យដែលមានចែងនៅក្នុងច្បាប់ស្តីពីការរៀបចំនិងការប្រព្រឹត្តទៅរបស់ គ.ជ.ប ហ្នឹងហើយ! បើគ្មានលក្ខណៈគ្រប់គ្រាន់ គណៈកម្មាធិការអចិន្រ្តៃយ៍រដ្ឋសភាលោកមិនចុចចំឈ្មោះគាត់ទេ»។
យ៉ាងណាក្តី លោក កន សាវាង្ស មន្ត្រីឃ្លាំមើលការបោះឆ្នោតរបស់អង្គការ ខុមហ្រ្វែល នៅមិនទាន់វាយតម្លៃយ៉ាងណានៅឡើយទេ ចំពោះការងាររបស់លោក ប្រាជ្ញ ច័ន្ទ ក្នុងនាមជាប្រធាន គ.ជ.ប នេះ។
លោកថា៖ «យើងឃើញហើយថា នៅក្នុងសមាសភាពចាស់ដែលធ្លាប់ធ្វើកិច្ចការងារកន្លងមក មានចំណុចខ្លះមានការខ្វះខាត ដែលជាចំណុចលើកឡើងឬជាចំណុចនៃការព្រួយបារម្ភពីភាគីពាក់ព័ន្ធ ដែលតែងលើកឡើងថា សមាសភាពហ្នឹងមិនឯករាជ្យមិនអីជាដើមអ៊ីចឹង។ អ៊ីចឹងចំណុចនេះ យើងនឹងធ្វើការតាមដាននិងពិនិត្យមើលទាំងអស់គ្នាទៀត ការពិនិត្យមើលតែលក្ខណៈសម្បត្តិហ្នឹង គឺថាវាមិនទាន់បានគ្រប់គ្រាន់ទេ សំខាន់ការអនុវត្តជាក់ស្តែងបន្តទៀត»៕
