សមត្ថកិច្ចកម្ពុជាបានបញ្ជូនយុវជនបរិស្ថាន៣នាក់ទៅកាន់សាលាដំបូងរាជធានីភ្នំពេញ កាលពីវេលាម៉ោង៧និង៣០នាទីព្រឹកថ្ងៃសៅរ៍ ទី១៩ ខែមិថុនានេះ ដើម្បីធ្វើការចោទប្រកាន់។
លោកមេធាវី សំ សុគង់ បានប្រាប់ វីអូឌី នៅព្រឹកថ្ងៃសៅរ៍នេះថា កូនក្តីរបស់លោកទាំង៣នាក់ រួមមាន លោក យីម លាងហ៊ី កញ្ញា ស៊ុន រដ្ឋា និងលោក លី ចាន់ដារ៉ាវុធ កំពុងស្ថិតនៅក្នុងបន្ទប់រង់ចាំនៅក្នុងតុលាការនៅឡើយ គិតត្រឹមម៉ោងប្រមាណជា៩ព្រឹកថ្ងៃសៅរ៍នេះ។ ចំណែកយុវជនបរិស្ថានម្នាក់ទៀត ឈ្មោះ សិដ្ឋ ឈីវលីម៉េង លោកមិនដឹងថាអាជ្ញាធរបានចាប់ខ្លួនឬអត់នោះទេ។
យ៉ាងណាក្តី លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិ បានប្រាប់ វីអូឌី នៅព្រឹកថ្ងៃសៅរ៍នេះថា អាជ្ញាធរបានចាប់ខ្លួនយុវជនបរិស្ថានតែ៣នាក់ប៉ុណ្ណោះ គឺលោក យីម លាងហ៊ី កញ្ញា ស៊ុន រដ្ឋា និងលោក លី ចាន់ដារ៉ាវុធ ព្រមទាំងបានបញ្ជូនខ្លួនទៅកាន់អយ្យការអមសាលាដំបូងរាជធានីភ្នំពេញ នៅព្រឹកមិញនេះ។ លោកបានបញ្ជាក់ថា ការចាប់ខ្លួនយុវជនបរិស្ថានទាំង៣នាក់នេះ គឺតាមដីកាបង្គាប់របស់ព្រះរាជអាជ្ញាសាលាដំបូងរាជធានីភ្នំពេញ លោក សេង ហៀង ក្រោមការចោទប្រកាន់ពីបទ «បង្កឱ្យអសន្តិសុខសង្គម»។
លោកមេធាវី សំ សុគង់ បានសន្និដ្ឋានជាបឋមថា ការចាប់ខ្លួនកូនក្តីរបស់លោកទាំង៣នាក់ ក្រោមការចោទប្រកាន់ពីបទ «បង្កឱ្យអសន្តិសុខសង្គម» នេះ មិនអាចទទួលយកបានទេ ដោយសារតែការចោទប្រកាន់នេះបានប៉ះពាល់ដល់សិទ្ធិរបស់ពួកគេក្នុងការធ្វើសកម្មភាពដើម្បីសង្គម និងប៉ះពាល់ដល់សិទ្ធិបញ្ចេញមតិរបស់យុវជនទាំង៣នាក់ផងដែរ៕