អាជ្ញាធរប្រយុទ្ធប្រឆាំងគ្រឿងញៀន បញ្ជូនជនសង្ស័យចំនួន៤នាក់ពាក់ព័ន្ធនឹងរឿងបន្លំខ្លួនជាមន្ត្រីនគរបាលលួចធ្វើសកម្មភាពចាប់ពលរដ្ឋជំរិតទារប្រាក់នៅក្នុងរាជធានីភ្នំពេញ ទៅតុលាការនៅព្រឹកថ្ងៃនេះ ដើម្បីចាត់វិធានការច្បាប់។
អគ្គស្នងការរងនគរបាលជាតិទទួលផែនប្រឆាំងគ្រឿងញៀន លោក ម៉ក់ ជីតូ ប្រាប់ វីអូឌី នៅថ្ងៃទី២១ ខែមិថុនា ឆ្នាំ២០២១នេះថា កាលពីថ្ងៃទី១៧ ខែមិថុនា ឆ្នាំ២០២១ កម្លាំងជំនាញនៃមន្ទីរប្រឆាំងបទល្មើសគ្រឿងញៀន (ក៤) បានចុះបង្ក្រាបនិងឃាត់ខ្លួនជនសង្ស័យ៤នាក់ នៅចំណុចភូមិកំរៀង សង្កាត់ព្រៃវែង ខណ្ឌដង្កោ ដែលបន្លំជាមន្ត្រីនគរបាល លួចធ្វើសកម្មភាពចាប់ប្រជាពលរដ្ឋជំរិតយកប្រាក់នៅក្នុងភូមិសាស្ត្ររាជធានីភ្នំពេញ។
បុរសជាជនសង្ស័យទាំង៤នាក់នោះ រួមមាន ឈ្មោះ កេត វីរីយ៉ា អាយុ៣៥ឆ្នាំ ជនជាតិខ្មែរ (មេខ្លោងផ្តើមគំនិត) ទី២-ឈ្មោះ សយ តុលា អាយុ៣២ឆ្នាំ ជនជាតិខ្មែរ (អ្នកសមគំនិត) ទី៣-ឈ្មោះ ផាន់ វីរ:ភក្តី អាយុ៣១ឆ្នាំ ជនជាតិខ្មែរ (អ្នកសមគំនិត) និងទី៤-ឈ្មោះ សល់ ភារៈ អាយុ៣១ឆ្នាំ ជនជាតិខ្មែរ (អ្នកសមគំនិត)។
ក្រៅពីឃាត់ខ្លួននោះ អាជ្ញាធរប្រយុទ្ធប្រឆាំងគ្រឿងញៀនបានរឹបអូសសម្ភារប្រព្រឹត្តបទល្មើសមួយចំនួនទៀត រួមមាន រថយន្ត ១គ្រឿង, ម៉ូតូ ២គ្រឿង, អាវុធខ្លី (ជ័រ) ១ដើម, កាតសម្គាល់អាវុធខ្លី ១សន្លឹក, វិទ្យុទាក់ទងម៉ាកម៉ូតូរ៉ូឡា ១គ្រឿង, ឯកសណ្ឋាននគរបាល ២កំប្លេ និងអាវ១, មួកនគរបាល១, អាវក្រោះ១ មានផ្លាកសញ្ញាគ្រឿងញៀន, អាវកាក់១ មានផ្លាកសញ្ញាគ្រឿងញៀន, កាតនគរបាលក្លែងក្លាយ ចំនួន៣សន្លឹក, កាតសារព័ត៌មានកំពង់សោមប៉ុស្តិ៍ ១សន្លឹក, ឧបករណ៍តេស្តទឹកមូតរកសារធាតុញៀន១តេស្ត និងកាតកម្លាំងមូលដ្ឋានសម្ងាត់ក្លែងក្លាយ ២សន្លឹក (ក៧ ក៥) ជាដើម។
បន្ថែមពីនេះ អគ្គស្នងការរងនគរបាលជាតិទទួលផែនប្រឆាំងគ្រឿងញៀន លោក ម៉ក់ ជីតូ បានបញ្ជាក់ថា សមត្ថកិច្ចបានបញ្ជូនជនសង្ស័យទាំង៤នាក់នោះទៅតុលាការព្រឹកថ្ងៃនេះ ដើម្បីចាត់វិធានការច្បាប់បន្ត ខណៈមនុស្សពាក់ព័ន្ធយ៉ាងតិច៤នាក់ទៀត សមត្ថកិច្ចកំពុងស្វែងរកចាប់ខ្លួនបញ្ជូនទៅតុលាការផងដែរ។
លោកមានប្រសាសន៍ថា៖ «បញ្ជូនហើយ បានបញ្ជូនទៅព្រះរាជអាជ្ញា សំណុំរឿងនៅដំណាក់កាលព្រះរាជអាជ្ញានៅឡើយ។ ដំណាក់កាលទីមួយ យើងចោទពីបទក្លែងជាសមត្ថកិច្ច មិនត្រឹមក្លែងទេ ពួកវាធ្វើសកម្មភាពជំរិតទារប្រាក់ ហើយវាចូលបទគំរាមទារប្រាក់មួយទៀត។ ហើយ[សមត្ថកិច្ច]កំពុងស្រាវជ្រាវរកអ្នកពាក់ព័ន្ធបន្តទៀតដែរ»។
លោក ម៉ក់ ជីតូ អំពាវនាវទៅប្រជាពលរដ្ឋនិងអាជ្ញាធរមូលដ្ឋានដែលសង្ស័យលើមនុស្សពាក់ឯកសណ្ឋានបន្លំខ្លួនធ្វើជាមន្ត្រីនគរបាលឬមន្ត្រីប្រយុទ្ធប្រឆាំងគ្រឿងញៀន ត្រូវរាយការណ៍ទៅអង្គភាពសាម៉ី ដើម្បីចុះស្រាវជ្រាវថាតើពួកគេជាមន្ត្រីពិតប្រាកដ ឬក្លែងបន្លំ ឬមានការបញ្ជាពីថ្នាក់លើឱ្យចុះបង្ក្រាបជនល្មើសតាមមូលដ្ឋានដែរឬយ៉ាងណា នោះទើបអាចទប់ស្កាត់បញ្ហាប្រឈមនានាបានផលវិជ្ជមាន និងកុំឱ្យប៉ះពាល់ដល់មុខមាត់អង្គភាពសាម៉ី ជាដើម។
ចំណែកអ្នកនាំពាក្យសាលាដំបូងរាជធានីភ្នំពេញ លោក ប្លង់ សុផល សុំមិនធ្វើការបកស្រាយជុំវិញករណីនេះ ដោយលោកតម្រូវឱ្យអ្នកសារព័ត៌មានមុននឹងសម្ភាសរូបលោក ត្រូវយកកាតអ្នកសារព័ត៌មានដែលចេញដោយក្រសួងព័ត៌មាន ទៅបង្ហាញរូបលោកជាមុនសិន ទើបលោកផ្តល់ព័ត៌មានជូន។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា តុលាការត្រូវធ្វើការស្រាវជ្រាវឱ្យបានគ្រប់ជ្រុងជ្រោយលើអំពើល្មើសដែលកើតឡើង ហើយត្រូវអនុវត្តច្បាប់ឱ្យបានតឹងរ៉ឹងលើជនដែលប្រព្រឹត្ត ដើម្បីជាគំរូនិងចៀសវាងកុំឱ្យរឿងបែបនេះកើតឡើងបន្តទៀតនៅថ្ងៃខាងមុខ។
លោកជំរុញដូច្នេះថា៖ «ករណីនេះ តុលាការត្រូវតែអនុវត្តតាមផ្លូវច្បាប់ឱ្យបានតឹងរ៉ឹង ត្រូវតែពិចារណាទៅលើអង្គហេតុ អង្គច្បាប់ដែលបានកើតឡើងហ្នឹង។ ហើយត្រូវផ្តន្ទាទោស ដើម្បីជាគំរូ កុំឱ្យអ្នកក្រោយយកគំរូតាម ដែលធ្វើឱ្យប៉ះពាល់ទៅដល់សណ្តាប់ធ្នាប់សាធារណៈឬក៏ផលប្រយោជន៍ប្រជាពលរដ្ឋ»។
របាយការណ៍របស់នាយកដ្ឋានប្រឆាំងគ្រឿងញៀននៃក្រសួងមហាផ្ទៃ ឱ្យដឹងថា ក្នុងឆ្នាំ២០២០ សមត្ថកិច្ចជំនាញបង្ក្រាបបទល្មើសគ្រឿងញៀនជាង១ម៉ឺនករណី ក្នុងនោះបានចាប់ខ្លួនមនុស្សជាង២ម៉ឺននាក់ និងគ្រឿងញៀនចំនួន៣ ១៨៩គីឡូក្រាម និងសារធាតុគីមីផ្សំចំនួន៥ ០២៥គីឡូក្រាម។ ចំនួននេះបានបង្ហាញពីការកើនឡើងប្រមាណ៤ដងនៃគ្រឿងញៀនដែលរឹបអូសបាន និងកើនឡើងប្រមាណ៥ភាគរយនៃចំនួនមនុស្សដែលត្រូវបានចាប់ខ្លួន បើធៀបនឹងឆ្នាំ២០១៩៕
