សមត្ថកិច្ចខេត្តបន្ទាយមានជ័យ បញ្ជូនមេខ្យល់ចំនួន៦នាក់ទៅតុលាការ និងពលករ៦នាក់ផ្សេងទៀតបញ្ជូនទៅធ្វើចត្តាឡីស័ក ខណ:ដែលពួកគេបម្រុងឆ្លងដែនដោយខុសច្បាប់ទៅរកការងារធ្វើនៅប្រទេសថៃ។
ស្នងការរងទទួលបន្ទុកផ្នែកទទួលផែនការងារប្រឆាំងការជួញដូរមនុស្ស និងការពារអនីតិជន លោកស្រី ឌី សុជាតិ ប្រាប់ វីអូឌី នៅថ្ងៃអង្គារថា កាលពីថ្ងៃទី២០ ខែមិថុនា កន្លងទៅ អាជ្ញាធរជំនាញបានសហការជាមួយអជ្ញាធរមូលដ្ឋាន ចុះបង្ក្រាបមនុស្ស១២នាក់ដែលជាមេខ្យល់ និងពលករដែលបម្រុងឆ្លងដែនខុសច្បាប់ ស្ថិតនៅភូមិសាស្ត្រក្រុងប៉ោយប៉ែត ខេត្តបន្ទាយមានជ័យ។
លោកស្រីបន្តថា ក្នុងនោះ សមត្ថកិច្ចបានបញ្ជូនមេខ្យល់ចំនួន៦នាក់ទៅតុលាការកាលពីថ្ងៃចន្ទនិងអង្គារសប្ដាហ៍នេះ ដើម្បីចាត់វិធានការច្បាប់ ហើយពលករចំនួន៦នាក់ផ្សេងទៀតត្រូវបានបញ្ជូនទៅធ្វើចត្តាឡីស័កចំនួន១៤ថ្ងៃ។
លោកស្រីមានប្រសាសន៍កាលពីម្សិលមិញថា៖ «យើងបញ្ជូនទៅ [តុលាការ៦នាក់] កាលពីថ្ងៃម្សិលមិញ រហូតមកដល់ថ្ងៃនេះមិនទាន់រួចចំនួន១២នាក់ទេ។ ហើយពេលនោះដូចជាពលករមានតែ៦នាក់ដែរទេ ចំពោះមេខ្យល់កំពុងចំណាត់ការតាមច្បាប់ អត់ទាន់សម្រេចយ៉ាងណាទេ ដោយសារមនុស្សច្រើន ដល់ច្រើនទៅ យើងសួរមិនទាន់ចប់»។
មន្ត្រីសម្របសម្រួលសមាគមការពារសិទ្ធិមនុស្សអាដហុកខេត្តបន្ទាយមានជ័យ លោក ស៊ុំ ចាន់គា មានប្រសាសន៍ថា មូលហេតុដែលប្រជាពលរដ្ឋសម្រេចចិត្តឆ្លងដែនតាមរយៈមេខ្យល់នោះ ដោយសារតែពួកគាត់គ្មានជម្រើសនិងមានបញ្ហាជីវភាព ទោះបីជាដឹងថាជួបបញ្ហាប្រឈមផ្លូវច្បាប់និងជំងឺកូវីដ-១៩យ៉ាងណាក៏ដោយ។
មន្ត្រីសង្គមស៊ីវិលរូបនេះក៏ស្នើដល់រាជរដ្ឋាភិបាលនិងបណ្ដាក្រសួងពាក់ព័ន្ធ គួរធ្វើយ៉ាងណាបង្កើនការងារក្នុងស្រុកឱ្យបានច្រើន ដែលមានប្រាក់ខែសមរម្យសម្រាប់ទ្រទ្រង់ជីវភាពពលរដ្ឋ ទើបអាចទប់ស្កាត់បញ្ហាឆ្លងដែនខុសច្បាប់នេះមានប្រសិទ្ធភាព។
មន្ត្រីកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឌីថេ ហូយ៉ា ធ្លាប់ប្រាប់ វីអូឌី ថា គិតត្រឹមរយៈពេល៦ខែដើមឆ្នាំ២០២១ សមត្ថកិច្ចថៃបានចាប់ឃាត់ខ្លួនពលករខ្មែរជាង៥០០នាក់ ក្នុងចំណោមជាង៣០ករណី ដោយពួកគេម្នាក់ៗត្រូវចំណាយលុយបង់ឱ្យមេខ្យល់ប្រមាណពី៣ ០០០ ទៅ៤ ០០០បាត ស្មើនឹងជាង១០០ដុល្លារ។
លោក ហូយ៉ា បញ្ជាក់ទៀតថា កាលពីអំឡុងចុងខែឧសភា ពលករខ្មែរ១២នាក់ត្រូវបានតម្រួតថៃចាប់ខ្លួននៅតំបន់អូរជ្រៅ ស្រុកអារ៉ាញ់ប្រថេត ខេត្តស្រះកែវ និងបញ្ជូនទៅតុលាការផ្តន្ទាទោសតាមគោលការណ៍ច្បាប់ទប់ស្កាត់ការរីករាលដាលនៃជំងឺកូវីដ-១៩ថ្មី ដែលអាចជាប់ពន្ធនាគារដល់ពីរឆ្នាំ និងពិន័យប្រាក់ចំនួន៤០ ០០០បាត។
ដោយឡែក កាលពីថ្ងៃទី៥ ខែមិថុនា ពលករខ្មែរមួយក្រុមទៀតដែលមានគ្នា១៧នាក់ ក្នុងនោះ មានស្រី៧នាក់ បានឆ្លងដែនខុសច្បាប់ចូលក្នុងទឹកដីថៃតាមច្រកព្រំដែនកម្ពុជា-ថៃ ជាប់នឹងតំបន់តាព្រះយ៉ា ស្រុកតាព្រះយ៉ា ខេត្តស្រះកែវដដែល ហើយត្រូវបានសមត្ថកិច្ចថៃចាប់ខ្លួននិងបញ្ជូនត្រឡប់មកកម្ពុជាវិញ។
តាមរបាយការណ៍អង្គការសង់ត្រាល់កន្លងមក ឱ្យដឹងថា បច្ចុប្បន្នមានពលករខ្មែរធ្វើការងារស្របច្បាប់និងមិនស្របច្បាប់មានជាង១លាន៨សែននាក់ ធ្វើការនៅប្រទេសថៃ៕
