រដ្ឋមន្ត្រីការបរទេសអង់គ្លេស លោក ដូមីនិក រ៉ាអាប់ (Dominic Raab) បានលើកឡើងពីបញ្ហាសិទ្ធិមនុស្សនៅក្នុងជំនួបជាមួយរដ្ឋមន្ត្រីការបរទេសកម្ពុជា លោក ប្រាក់ សុខុន នៅក្នុងដំណើរទស្សនកិច្ចនៅកម្ពុជា។
នៅក្នុងសេចក្តីប្រកាសព័ត៌មានខ្លីមួយរបស់ស្ថានទូតអង់គ្លេសប្រចាំនៅកម្ពុជា ស្តីពី លទ្ធផលនៃជំនួបជាមួយរដ្ឋមន្ត្រីការបរទេសកម្ពុជា លោក ប្រាក់ សុខុន បានឱ្យដឹងថា បញ្ហាសិទ្ធិមនុស្ស គឺជាប្រធានបទមួយក្នុងចំណោមប្រធានបទផ្សេងទៀតដែលរដ្ឋមន្ត្រីការបរទេសអង់គ្លេស លោក ដូមីនិក រ៉ាអាប់ (Dominic Raab) បានលើកឡើង។ ប៉ុន្តែសេចក្តីប្រកាសខ្លីនេះមិនបានបញ្ជាក់ឱ្យពិស្តារឡើយ។
ស្ថានទូតអង់គ្លេសបានសរសេរក្នុងសេចក្តីប្រកាសនោះថា៖ «ថ្ងៃនេះ នៅប្រទេសកម្ពុជា រដ្ឋមន្រ្តីក្រសួងការបរទេសអង់គ្លេស លោក Dominic Raab មានសេចក្តីរីករាយដែលបានជួបជាមួយរដ្ឋមន្រ្តីក្រសួងការបរទេស លោក ប្រាក់ សុខុន ដើម្បីពិភាក្សាអំពីកិច្ចសហប្រតិបត្តិរវាងចក្រភពអង់គ្លេស និងឥណ្ឌូប៉ាស៊ីហ្វិក ជុំវិញអាទិភាពរួម ដែលរួមមាន ពាណិជ្ជកម្ម ភាពប្រសើរឡើងវិញពីស្ថានភាពកូវីដ សិទ្ធិមនុស្ស និងអំពីប្រទេសមីយ៉ាន់ម៉ា»។
ស្ថានទូតបានសរសេរបន្តថា៖ «ចក្រភពអង់គ្លេសទន្ទឹងរង់ចាំក្នុងការធ្វើការយ៉ាងជិតដិតជាមួយកម្ពុជានាពេលខាងមុខ ក្នុងអំឡុងពេលប្រទេសកម្ពុជាជាប្រធានកិច្ចប្រជុំអាស៊ានក្នុងឆ្នាំ២០២២»។
អ្នកនាំពាក្យក្រសួងការបរទេសកម្ពុជា លោក កុយ គួង ពុំអាចបញ្ជាក់បានភ្លាមៗជុំវិញជំនួបនេះទេ ដោយឱ្យរង់ចាំសេចក្តីប្រកាសព័ត៌មានរបស់ក្រសួង។
ចំណែកលោក នេត្រ ភក្ត្រា អ្នកនាំពាក្យក្រសួងបរិស្ថាន បានថ្លែងថា នៅក្នុងជំនួបជាមួយលោក សាយ សំអាល់ រដ្ឋមន្ត្រីក្រសួងបរិស្ថាននោះ លោក ដូមីនិក រ៉ាអាប់ មិនបានលើកឡើងពីបញ្ហាការចាប់ខ្លួនយុវជនបរិស្ថានកាលពីថ្មីៗនេះទេ។ លោកថា លោក ដូមីនិក រ៉ាអាប់ គ្រាន់តែចង់ដឹងពីតម្រូវការរបស់កម្ពុជាដែលចង់ឱ្យចក្រភពអង់គ្លេសជួយប៉ុណ្ណោះ។
លោក នេត្រ ភក្ត្រា បានប្រាប់ វីអូឌី ថា៖ «គាត់មក គាត់ថាមកក្នុងនាមជាមិត្តភក្តិ ជាដៃគូ ហើយគាត់ស្វែងយល់ពីតម្រូវការដែលកម្ពុជាត្រូវការ ហើយថាតើអ្វីដែលកម្ពុជាត្រូវការ»។
លោក ដូមីនិក រ៉ាអាប់ (Dominic Raab) គឺជារដ្ឋមន្ត្រីការបរទេសអង់គ្លេសទី១ ដែលបានមកបំពេញទស្សនកិច្ចជាផ្លូវការនៅកម្ពុជា ចាប់តាំងពីអង់គ្លេសបានបើកស្ថានទូតរបស់ខ្លួននៅកម្ពុជាជាថ្មី ចាប់តាំងពីឆ្នាំ១៩៩១មក។
អនុប្រធានអង្គការឃ្លាំមើលសិទ្ធិមនុស្សអន្តរជាតិប្រចាំតំបន់អាស៊ី លោក ហ្វីល រ៉ូប៊ឺតសុន (Phil Robertson) បានសរសេរសាអេឡិចត្រូនិច (Email) មួយ ទៅកាន់រដ្ឋមន្ត្រីការបរទេសអង់គ្លេស ដោយជំរុញឱ្យរដ្ឋមន្ត្រីការបរទេសអង់គ្លេសរូបនេះលើកឡើងពីបញ្ហាសិទ្ធិមនុស្សនៅក្នុងដំណើរទស្សនកិច្ចនៅកម្ពុជានេះ។
លោក ហ្វីល រ៉ូប៊ឺតសុន ក៏បានជំរុញឱ្យរដ្ឋមន្ត្រីការបរទេសអង់គ្លេស ស្នើទៅរដ្ឋាភិបាលកម្ពុជាឱ្យដោះលែងសកម្មជនបរិស្ថាននិងអ្នកទោសនយោបាយប្រមាណជា៧០នាក់ពីពន្ធនាគារផងដែរ។
គួរជម្រាបជូនថា នៅក្នុងដំណើរទស្សនកិច្ចរយៈពេលមួយថ្ងៃនៅកម្ពុជានេះ រដ្ឋមន្ត្រីការបរទេស និងអភិវឌ្ឍន៍ចក្រភពអង់គ្លេស លោក ដូមីនិក រ៉ាអាប់ (Dominic Raab) បានជួបជាមួយរដ្ឋមន្ត្រីក្រសួងបរិស្ថានកម្ពុជា លោក សាយ សំអាល់ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងបានទៅទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលឯកសារកម្ពុជា (DC-Cam) ផងដែរ មុននឹងបន្តដំណើរឆ្ពោះទៅកាន់ប្រទេសសិង្ហបុរី។
ដោយឡែក គម្រោងជួបជាមួយលោកនាយករដ្ឋមន្ត្រី ហ៊ុន សែន ត្រូវបានលុបចោលទៅវិញ បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសកាលពី៣ថ្ងៃមុនថា លោកត្រូវធ្វើចត្តាឡីស័កដោយសារពាក់ព័ន្ធជាមួយអ្នកជំងឺកូវីដ-១៩៕