អង្គការឃ្លាំមើលសិទ្ធិមនុស្សអន្តរជាតិ (HRW) បានជំរុញឱ្យរដ្ឋមន្ត្រីការបរទេសអង់គ្លេស លោក ដូមីនិក រ៉ាអាប់ (Dominic Raab) លើកឡើងពីបញ្ហាសិទ្ធិមនុស្សនៅក្នុងដំណើរទស្សនកិច្ចនៅកម្ពុជា នាថ្ងៃទី២៣ ខែមិថុនានេះ។
អនុប្រធានអង្គការឃ្លាំមើលសិទ្ធិមនុស្សអន្តរជាតិប្រចាំតំបន់អាស៊ី លោក ហ្វីល រ៉ូប៊ឺតសុន (Phil Robertson) បានសរសេរសារអេឡិចត្រូនិច (Email) ទៅកាន់រដ្ឋមន្ត្រីការបរទេសអង់គ្លេស កាលពីថ្ងៃទី២២ មិថុនា ថាដំណើរទស្សនកិច្ចរបស់រដ្ឋមន្ត្រីការបរទេសអង់គ្លេសនៅកម្ពុជាពេលនេះ គឺធ្វើឡើងចំពេលដែលមានវិបត្តិសិទ្ធិមនុស្សធ្ងន់ធ្ងរនៅកម្ពុជា ហើយដែលភាគីអង់គ្លេសគួរតែរំលេចប្រធានបទនេះនៅក្នុងដំណើរទស្សនកិច្ចរបស់ខ្លួន។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា លោករដ្ឋមន្ត្រីការបរទេសនិងអភិវឌ្ឍន៍ចក្រភពអង់គ្លេស ដូមីនិក រ៉ាអាប់ (Dominic Raab) បានមកដល់រាជធានីភ្នំពេញកាលពីយប់មិញ ដើម្បីបំពេញទស្សនកិច្ចរយៈពេល១ថ្ងៃនៅកម្ពុជា នៅថ្ងៃទី២៣ ខែមិថុនានេះ។
ក្រសួងបន្តថា ក្នុងដំណើរទស្សនកិច្ចនេះ លោករដ្ឋមន្ត្រីការបរទេសអង់គ្លេស នឹងមានជំនួបជាមួយរដ្ឋមន្ត្រីការបរទេសកម្ពុជា លោក ប្រាក់ សុខុន ដោយផ្តោតលើទិដ្ឋភាពផ្សេងៗនៃកិច្ចសហប្រតិបត្តិការទ្វេភាគី ព្រមទាំងបញ្ហាតំបន់និងអន្តរជាតិ ជាប្រយោជន៍និងកង្វល់រួម។ ជាមួយគ្នានេះ លោករដ្ឋមន្ត្រី ក៏មានជំនួបជាមួយលោក សាយ សំអាល់ រដ្ឋមន្ត្រីក្រសួងបរិស្ថាន ដោយផ្តោតជាសំខាន់លើបញ្ហាការប្រែប្រួលអាកាសធាតុ និងរួមទាំងការទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលឯកសារកម្ពុជាផងដែរ។
ដោយឡែក គម្រោងជួបជាមួយលោកនាយករដ្ឋមន្ត្រី ហ៊ុន សែន នៅថ្ងៃទី២៣ ខែមិថុនានេះ ត្រូវបានលុបចោលទៅវិញ បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសកាលពី៣ថ្ងៃមុនថា លោកត្រូវធ្វើចត្តាឡីស័ករហូតដល់ថ្ងៃទី៣ ខែកក្កដាខាងមុខ។
ទោះជាយ៉ាងនេះក្តី លោក ហ្វីល រ៉ូប៊ឺតសុន (Phil Robertson) បានជំរុញឱ្យរដ្ឋមន្ត្រីការបរទេសអង់គ្លេសរូបនេះលើកឡើងពីបញ្ហាសិទ្ធិមនុស្ស និងលំហលទ្ធិប្រជាធិបតេយ្យ និងទាមទារឱ្យអាជ្ញាធររដ្ឋាភិបាលទម្លាក់ចោលការចោទប្រកាន់ និងដោះលែងដោយឥតលក្ខខណ្ឌ ចំពោះសកម្មជនបរិស្ថាននិងអ្នកទោសនយោបាយប្រមាណជា៧០នាក់ដែលកំពុងជាប់ពន្ធនាគារ។
លោក ហ្វីល រ៉ូប៊ឺតសុន (Phil Robertson) បានរំឭកលោករដ្ឋមន្ត្រីការបរទេសអង់គ្លេសថា នៅមុនដំណើរទស្សនកិច្ចនេះ អាជ្ញាធររដ្ឋាភិបាលកម្ពុជាបានចោទប្រកាន់សកម្មជនបរិស្ថានមាតាធម្មជាតិ ៤នាក់ ពីបទ «ប្រមាថព្រះមហាក្សត្រ» និង «រួមគំនិតក្បត់»។ សកម្មជនបរិស្ថាន ៣នាក់ ត្រូវបញ្ជូនទៅឃុំខ្លួននៅក្នុងពន្ធនាគារព្រៃស ដើម្បីរង់ចាំការកាត់ទោស។
បន្ថែមលើនេះ លោក ហ្វីល រ៉ូប៊ឺតសុន (Phil Robertson) ក៏ស្នើឱ្យរដ្ឋមន្ត្រីការបរទេសអង់គ្លេសជួបជាមួយអតីតប្រធានគណបក្សប្រឆាំង លោក កឹម សុខា ប្រព័ន្ធផ្សព្វផ្សាយឯករាជ្យ និងអ្នកសារព័ត៌មាន ដែលកំពុងរងការធ្វើទុក្ខបុកម្នេញពីអាជ្ញាធររដ្ឋាភិបាល ដើម្បីការពារពួកគេពីការរាយការណ៍ព័ត៌មានដោយសេរី។
កាលពីថ្ងៃទី០១ ខែមិថុនា អនុរដ្ឋមន្ត្រីការបរទេសអាមេរិក លោកស្រី វិនឌី ហ្សឺម៉ាន ក៏បានអញ្ជើញមកបំពេញទស្សនកិច្ចនៅកម្ពុជាផងដែរ ដោយលោកស្រីបានលើកឡើងពីបញ្ហាសិទ្ធិមនុស្ស និងបានជួបលោក កឹម សុខា អតីតប្រធានគណបក្សសង្គ្រោះជាតិ។
I met with @KemSokha7 and discussed issues of shared importance, including ensuring a peaceful, prosperous, sovereign, & democratic future for Cambodia. The U.S. supports the Cambodian people, their aspirations for democracy, & their right to exercise their fundamental freedoms. pic.twitter.com/lT1J4ASwEO
— Wendy R. Sherman (@DeputySecState) June 1, 2021
តាមគម្រោង រដ្ឋមន្ត្រីការបរទេសអង់គ្លេសនឹងបញ្ចប់ដំណើរទស្សនកិច្ចនៅកម្ពុជានៅថ្ងៃទី២៤ ខែមិថុនា ដោយបន្តដំណើរទៅកាន់ប្រទេសសិង្ហបុរី៕
អត្ថបទទាក់ទង
សង្គមស៊ីវិលនិងមន្ត្រីទូតស្នើតុលាការទម្លាក់បទចោទលើសកម្មជនបរិស្ថានវ័យក្មេង៤រូប
អង្គការជាតិ-អន្តរជាតិ រួមនឹងតំណាងទូតជិត១០០ស្ថាប័ន បង្ហាញការព្រួយបារម្ភនិងទាមទារឱ្យរដ្ឋាភិបាលកម្ពុជា ទម្លាក់ចោលការចោទប្រកាន់ទៅលើសកម្មជនបរិស្ថានវ័យក្មេងចំនួន៤នាក់និងដោះលែងពួកគេឱ្យមានសេរីភាពវិញ។
