ពលរដ្ឋម្នាក់ដែលត្រូវក្រុមយោធាបាញ់ឱ្យរងរបួសក្នុងជម្លោះដីធ្លីនៅខេត្តកណ្តាល បន្តទាមទារឱ្យរដ្ឋាភិបាលជួយរកយុត្តិធម៌និងផ្តល់សំណងជំងឺចិត្តដល់គាត់ឱ្យបានឆាប់រហ័ស ខណៈរូបលោកបារម្ភពីការធ្លាក់ខ្លួនពិការអំឡុងពេលព្យាបាលនៅផ្ទះ ដោយសារគ្មានលទ្ធភាពព្យាបាលនៅមន្ទីរពេទ្យបន្តទៀត។
កាលពីថ្ងៃទី៣ ខែមិថុនា ឆ្នាំ២០២១ កងកម្លាំងយោធាជាច្រើននាក់ប្រដាប់ដោយអាវុធ បានបាញ់ដោយគ្រាប់កាំភ្លើងពិត បង្ក្រាបទៅលើប្រជាពលរដ្ឋប្រមាណ៦០នាក់ដែលកំពុងប្រមូលផ្តុំគ្នាតវ៉ារឿងជម្លោះដីធ្លីមួយកន្លែង ស្ថិតនៅចំណុចភូមិអង្គស្រែពោធិ៍ ឃុំទួលពេជ្រ ស្រុកអង្គស្នួល ខេត្តកណ្តាល បណ្ដាលឱ្យបុរសម្នាក់ឈ្មោះ មុំ ចន្ថា រងរបួសធ្លាយស្មាខាងឆ្វេង និងត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យកាល់ម៉ែត រាជធានីភ្នំពេញ។
ការផ្ទុះអាវុធរបស់ក្រុមយោធាទាំងនោះ បានធ្វើឡើងបន្ទាប់ពីក្រុមពលរដ្ឋបានលើកគ្នាទៅតវ៉ាហាមឃាត់មិនឱ្យយកគ្រឿងចក្រឈូសឆាយព័ទ្ធជាព្រំដី ប៉ះពាល់លើដីស្រែរបស់ពួកគេដែលធ្លាប់អាស្រ័យផលជាច្រើនឆ្នាំមកហើយ។
លោក មុំ ចន្ថា ជាជនរងគ្រោះត្រូវរបួសស្មាខាងឆ្វេងនោះ ប្រាប់ វីអូឌី នៅថ្ងៃពុធនេះថា អាការរបួសរបស់គាត់នៅតែមិនទាន់ធូរស្រាលនៅឡើយ ដោយគ្រូពេទ្យថា គាត់ត្រូវការព្យាបាលរយៈពេល៦ខែទៀតទើបអាចជាសះស្បើយដូចដើមវិញ។ លោកមានក្ដីបារម្ភ ខ្លាចធ្លាក់ខ្លួនពិការ ដោយសារគ្រួសាររបស់គាត់អស់លទ្ធភាពសម្រាប់ព្យាបាលបន្តទៀត ខណៈការបាញ់ដោយក្រុមយោធាពេលនោះ លោកត្រូវបានបាក់ឆ្អឹងមួយកំណាត់។
លោកបន្តថា៖ «ខ្ញុំអត់លទ្ធភាពមើលនៅពេទ្យទៀត មុខរបួសខ្ញុំនៅតែឈឺចុកចាប់ក្នុងឆ្អឹង ព្រោះបាក់ឆ្អឹងមួយ វានៅឈឺតែកន្លែងឆ្អឹងបាក់ហ្នឹងទេ ហើយមុខរបួសវាសះស្បើយ។ ឆ្អឹងដែលបាក់ គឺឆ្អឹងយើងលើកចុះឡើង ឥលូវលើកដៃចុះឡើងមិនទាន់រួចទេ។ ខ្ញុំនៅចាក់ថ្នាំ នៅលាងរបួសរាល់ថ្ងៃហ្នឹង ហើយបញ្ហាលំបាកខ្លាំងគឺអត់មានលុយព្យាបាល។ ហើយព្យាបាលរាល់ថ្ងៃ យើងជំពាក់គេខ្លះទៅ លុយអាជ្ញាធរខេត្តជួយខ្ញុំនោះអស់ហើយ ឥលូវខ្ញុំខ្ចីគេអស់៥០០ដុល្លារទៀត»។
វីអូឌី មិនអាចសុំការអត្ថាធិប្បាយពីអភិបាលខេត្តកណ្ដាល លោក គង់ សោភ័ណ្ឌ និងអ្នកនាំពាក្យក្រសួងការពារជាតិ លោក ឈុំ សុជាតិ បានទេ។
កាលពីថ្ងៃទី៤ ខែមិថុនា ឆ្នាំ២០២១ មន្ត្រីជាន់ខ្ពស់ក្រសួងការពារជាតិ អះអាងថា កំពុងស្រាវជ្រាវរកមុខមន្ត្រីយោធាដែលបាញ់ប្រហារទៅលើប្រជាពលរដ្ឋម្នាក់ឱ្យរងរបួស ដើម្បីយកទៅអនុវត្តទោសតាមច្បាប់។ ប៉ុន្តែចាប់តាំងពីថ្ងៃទី៤ ខែមិថុនា ឆ្នាំ២០២១ ដល់ថ្ងៃទី២៣ ខែមិថុនា ឆ្នាំ២០២១នេះ សមត្ថកិច្ចមិនទាន់បានបង្ហាញពីលទ្ធផលស្រាវជ្រាវ និងមិនទាន់ចាប់ខ្លួនមន្ត្រីយោធាដែលបាញ់លើប្រជាពលរដ្ឋណាម្នាក់មកដាក់ទោសទណ្ឌនៅឡើយ។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណា មានប្រសាសន៍ថា ប្រសិនបើរដ្ឋាភិបាលនិងអាជ្ញាធរពាក់ព័ន្ធនៅតែមិនចាប់ខ្លួនអ្នកប្រព្រឹត្តល្មើសមកដាក់ទោស និងមិនដោះស្រាយជូនប្រជាពលរដ្ឋនោះទេ នោះនឹងធ្វើឱ្យប្រជាពលដ្ឋបាត់បង់ជំនឿលើរដ្ឋាភិបាលបន្ថែមទៀត។
លោកបន្តថា៖ «ស្ថានប័នថ្នាក់ដឹកនាំ គួរតែមានការត្រួតពិនិត្យមើលពីបញ្ហាទាំងអស់ហ្នឹងឡើងវិញ ដោយជួយរកនូវដំណោះស្រាយនិងយុត្តិធម៌ជូនប្រជាពលរដ្ឋឱ្យបានឆាប់រហ័ស ចៀសវាងការអូសបន្លាយអាចធ្វើឱ្យប៉ះពាល់ដល់ជីវភាពនិងការរស់នៅរបស់ប្រជាពលរដ្ឋ»។
កាលពីថ្ងៃទី១៣ ខែកុម្ភៈ ឆ្នាំ២០១៩ រដ្ឋមន្ត្រីក្រសួងមហាផ្ទៃ លោក ស ខេង បានជំរុញឱ្យរដ្ឋបាលខេត្តទាំងអស់ពង្រឹងការអនុវត្តច្បាប់ឱ្យបានត្រឹមត្រូវ ពិសេសការចុះអនុវត្តសាលដីការបស់តុលាការ ដោយថា ការប្រើប្រាស់កម្លាំងយោធាណាមួយ គឺជារឿងខុសច្បាប់ទាំងស្រុង៕