មន្ត្រីជាន់ខ្ពស់ក្រសួងបរិស្ថាន បានជំរុញឱ្យមានការចូលរួមការពារសត្វខ្ទីងនៅកម្ពុជាបន្ថែមទៀត ត្បិតសត្វប្រភេទនេះជាពពួកសត្វកម្រ និងស្របពេលមានសត្វខ្ទីងញីមួយក្បាលទៀតបានបាត់បង់ជីវិតដោយសារជាប់អន្ទាក់ព្រានព្រៃកាលពីពេលថ្មីៗនេះ។
តាមការបង្ហោះនៅលើបណ្ដាញសង្គមហ្វេសប៊ុករបស់ Solo Landscapes កាលពីថ្ងៃទី១៧ ខែមិថុនា ឆ្នាំ២០២១នេះ មានសត្វខ្ទីងមួយក្បាល ស្ថិតនៅដែនជម្រកសត្វព្រៃភ្នំឱរ៉ាល់ ខេត្តកំពង់ស្ពឺ មានសភាពស្គមស្គាំងនិងបាក់ជើងម្ខាងដើរមិនរួច។ សត្វខ្ទីងនេះបានស្លាប់បាត់បង់ជីវិត នៅព្រឹកថ្ងៃទី១៨ ខែមិថុនានេះ ទោះបីមានការសង្គ្រោះពីខាងអង្គការ Wildlife Alliance ដែលបានទៅជួយផ្ទាល់ក៏ដោយ។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានប្រាប់ វីអូឌី នៅថ្ងៃទី២២ ខែមិថុនា ថាគេមិនអាចជួយសង្គ្រោះសត្វខ្ទីងញីនោះបានទាន់ពេលវេលាទេ ដោយសារតែវាមានរបួសធ្ងន់ធ្ងរពេកដែលបណ្ដាលមកពីការជាប់អន្ទាក់របស់ព្រានព្រៃ។
លោកបន្តថា សត្វខ្ទីងនេះគឺជាប្រភេទសត្វកម្រនិងជិតផុតពូជនៅលើសកលលោក ដែលទាមទារឱ្យមានការយកចិត្តទុកដាក់និងអភិរក្សឱ្យបានហ្មត់ចត់ និងចាត់វិធានការច្បាប់ឱ្យបានតឹងរ៉ឹងជាទីបំផុតចំពោះអ្នកដែលបានគំរាមកំហែងដល់អាយុជីវិតសត្វព្រៃនៅកម្ពុជា។
លោកបន្តទៀតថា៖ «ចំពោះវិធានការរបស់យើងផ្អែកតាមការអនុវត្តច្បាប់ ដោយសារប្រភេទសត្វខ្ទីងជាប្រភេទសត្វជិតផុតពូជ បើក្នុងករណីដែលយើងចាប់បាននូវជនប្រព្រឹត្តបទល្មើសសម្លាប់សត្វខ្ទីង ឬក៏សម្លាប់សត្វដែលកម្រៗហ្នឹង គឺយើងចងក្រងសំណុំរឿងបញ្ជូនទៅតុលាការ»។
លោកបន្ថែមទៀតថា ខាងក្រសួងបរិស្ថានបានខិតខំប្រឹងប្រែងអភិរក្សសត្វគ្រប់ប្រភេទ មិនចំពោះតែសត្វខ្ទីងមួយនោះទេ គឺអភិរក្សសត្វគ្រប់ប្រភេទនៅកម្ពុជា។
មន្ត្រីអ្នកនាំពាក្យរូបនេះបន្តថា អន្ទាក់គឺជាឃាតករលាក់មុខដែលសម្លាប់សត្វព្រៃនៅកម្ពុជា ហើយនៅក្នុងមួយឆ្នាំៗមានអន្ទាក់រាប់សែនត្រូវបានដាក់ពង្រាយនៅក្នុងព្រៃ ប៉ុន្តែការងារដោះអន្ទាក់សត្វទាំងនោះនៅមានកម្រិត ដោយសារក្នុងមួយឆ្នាំ មន្ត្រីជំនាញដោះអន្ទាក់បានតែប្រមាណ៥ម៉ឺនប៉ុណ្ណោះ។
លោកបានបន្តទៀតថា ខាងក្រសួងក៏កំពុងគិតគូរលើការបង្កាត់ពូជប្រភេទសត្វព្រៃកម្រៗផ្សេងទៀត ដើម្បីបង្កើនចំនួនរបស់វាឡើងវិញផងដែរ។ បន្ថែមពីនេះ លោកថា ក្រសួងបរិស្ថានគិតគូរដល់សេដ្ឋកិច្ចមូលដ្ឋានរបស់ពលរដ្ឋរស់នៅជុំវិញតំបន់ការពារធម្មជាតិ ដោយផ្លាស់ប្ដូរមុខរបររបស់ពួកគាត់បែបប្រពៃណី ដូចជា ចូលព្រៃកាប់ឈើ បរបាញ់សត្វ ឬដាក់អន្ទាក់សត្វ ទៅជាការប្រកបមុខរបរដែលផ្សារភ្ជាប់វិស័យទេសចរណ៍ធម្មជាតិវិញ។
លោកបន្តថា៖ «ទេសចរណ៍ធម្មជាតិ គឺជាផ្នែកមួយដ៏សំខាន់ក្នុងការអភិវឌ្ឍសេដ្ឋកិច្ចមូលដ្ឋាន តាមរយៈការចំណាយរបស់ភ្ញៀវទេសចរទៅសហគមន៍ ហើយប្រជាសហគមន៍គាត់មានមុខរបរនិងមានតួនាទីការងារមានចំណូលសម្រាប់ពួកគាត់។ បើសិនជាប្រជាពលរដ្ឋមិនមានជីវភាពធូរធារ មិនមានមុខរបរពិតប្រាកដទេ គឺស្ថានភាពបច្ចុប្បន្នអាចថាជាបញ្ហាមួយគំរាមកំហែងទៅកាន់ធម្មជាតិ ហើយជាការដាក់សម្ពាធទៅធម្មជាតិ ដែលពួកគាត់នៅតែបន្តអូសយកនូវផលប្រយោជន៍លើសកម្រិតពីធនធានធម្មជាតិ ដែលធ្វើឱ្យប៉ះពាល់ដល់ព្រៃឈើនិងសត្វព្រៃ»។
មន្ត្រីគម្រោងតស៊ូមតិនៃគម្រោងអ្នកការពារព្រៃឈើ នៃសមាគមបណ្តាញយុវជនកម្ពុជា លោក សាន់ ម៉ាឡា មើលឃើញថា ការគ្រប់គ្រងធនធានធម្មជាតិរបស់ក្រសួងបរិស្ថាននៅមានភាពទន់ខ្សោយខ្លាំងក្នុងការថែរក្សាការពារធនធានធម្មជាតិនៅក្នុងដែនការពាររបស់ខ្លួន។
លោកបន្តថា៖ «អភិបាលកិច្ចនៅក្នុងការគ្រប់គ្រងធនធានធម្មជាតិរបស់ក្រសួងបរិស្ថាន ហាក់បីដូចជាមានភាពទន់ខ្សោយខ្លាំង ដែលបណ្ដែតបណ្ដោយឱ្យមានការកាប់បំផ្លាញព្រៃឈើស្ទើរគ្រប់តំបន់ការពារទាំងអស់ដែលខ្លួនគ្រប់គ្រង ចំនួន៧,២លានហិកតា ដោយការកាប់បំផ្លាញព្រៃឈើទាំងអស់នេះបានជះផលអាក្រក់មកលើជីវភាពរស់នៅរបស់សហគមន៍មូលដ្ឋាន ជីវចម្រុះដូចជាសត្វព្រៃដទៃទៀតដែលកំពុងតែស្នាក់អាស្រ័យក្នុងព្រៃ»។
លោកបានលើកឡើងថា មូលហេតុនៃការបរបាញ់សត្វព្រៃ គឺបណ្ដាលមកពីមនុស្សមួយចំនួនយល់ឃើញថា សាច់របស់សត្វព្រៃមានរសជាតិឆ្ងាញ់និងជាថ្នាំពូកែស័ក្តិសិទ្ធិជាដើម។
លោកបានជំរុញដល់រដ្ឋាភិបាលពង្រឹងការអនុវត្តច្បាប់ និងត្រួតពិនិត្យមើលឡើងវិញពីប្រសិទ្ធភាពរបស់មន្ត្រីថ្នាក់ក្រោម ថាមានអំពើពុករលួយជាមួយនឹងឈ្មួញកណ្ដាលដែលទទួលទិញសាច់សត្វព្រៃខុសច្បាប់នេះដែរឬទេ។
បើតាមអ្នកនាំពាក្យក្រសួងបរិស្ថាន គេមិនទាន់ដឹងពីចំនួនសត្វខ្ទីងសរុបនៅក្នុងប្រទេសកម្ពុជានោះទេ តែចំពោះចំនួនសរុបនៅលើពិភពលោក គឺមានចំនួនជាង២ម៉ឺនក្បាល។ លោកថា តាមរយៈការដាក់បង្កប់ម៉ាស៊ីនថតស្វ័យប្រវត្តិនៅក្នុងព្រៃ គេបានឃើញមានវត្តមានសត្វខ្ទីង និងមានកូនតូចៗរស់នៅជាហ្វូង ហើយមានវត្តមាននៅក្នុងដែនជម្រកសត្វព្រៃជួរភ្នំក្រវាញ នៅភាគឦសាន្តនៃប្រទេស តំបន់ឧទ្យានជាតិវីរជ័យ ដែនជម្រកសត្វព្រៃកែវសីមា និងក្នុងដែនជម្រកសត្វព្រៃមួយចំនួនទៀតនៅខេត្តព្រះវិហារ៕