រដ្ឋសភាកម្ពុជា នៅថ្ងៃនេះ បានបោះឆ្នោតជ្រើសតាំងលោក ប្រាជ្ញ ចន្ទ ឱ្យធ្វើជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ក្នុងសំឡេងជាឯកច្ឆន្ទ ៨២លើ៨២សំឡេង។
លោក ប្រាជ្ញ ចន្ទ ដែលទទួលបានការបោះឆ្នោតឱ្យធ្វើជាប្រធាន គ.ជ.ប ថ្មីនេះ បានបង្ហាញខ្លួននៅចំពោះមុខរដ្ឋសភា តែមិនបានថ្លែងអ្វីមួយម៉ាត់ឡើយ ខណៈរដ្ឋសភាដឹកនាំដោយលោក ហេង សំរិន បានបោះឆ្នោតយល់ព្រមផ្តល់សេចក្តីទុកចិត្តឱ្យលោក ប្រាជ្ញ ចន្ទ ធ្វើជាប្រធានគណៈកម្មាធិការជាតិរៀបចំការបោះឆ្នោតថ្មី ជំនួសលោក ស៊ិក ប៊ុនហុក។
បើតាមនីតិវិធី ក្រោយពីរដ្ឋសភាបានបោះឆ្នោតគាំទ្ររួចហើយ លោក ប្រាជ្ញ ចន្ទ នឹងត្រូវស្បថចូលកាន់តំណែងជាផ្លូវការតែម្ដង។
គណបក្សប្រជាជនកម្ពុជា បានសម្រេចឱ្យលោក ប្រាជ្ញ ចន្ទ ធ្វើជាប្រធានគណៈកម្មាធិការជាតិរៀបចំការបោះឆ្នោតថ្មី ក្នុងចំណោមបេក្ខជនពីររូប គឺលោក ការ លាន អតីតអភិបាលរងខេត្តព្រះវិហារ។ មុនក្លាយជាប្រធាន គ.ជ.ប នេះ លោក ប្រាជ្ញ ចន្ទ ធ្លាប់ធ្វើជាអភិបាលខេត្តបាត់ដំបងនិងខេត្តត្បូងឃ្មុំ និងក្រោយមកគឺជាសមាជិករដ្ឋសភាគណបក្សប្រជាជនកម្ពុជា និងជាប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភានីតិកាលទី៦នេះ។
កាលពីថ្ងៃទី៤ ខែមិថុនា គណៈកម្មាធិការអចិន្រ្តៃយ៍រដ្ឋសភាបានអនុម័តយល់ព្រមលើសំណើលាឈប់ពីតួនាទីនិងតំណែងប្រធាន គ.ជ.ប របស់លោក ស៊ិក ប៊ុនហុក ក្រោមហេតុផលសុខភាព។
លោក ស៊ិក ប៊ុនហុក បានកាន់តំណែងជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប) កាលពីខែមេសា ឆ្នាំ២០១៥ បន្តពីលោក អ៊ឹម សួស្តី ដែលបានកាន់តំណែងនេះតាំងពីឆ្នាំ២០០២មក៕