មន្ត្រីរដ្ឋបាលរាជធានីភ្នំពេញ ឱ្យដឹងថា តំបន់ដែលងាយឆ្លងរាលដាលនៃជំងឺកូវីដ-១៩ គឺស្ថិតនៅតំបន់មួយចំនួនក្នុងក្រុង និងនៅជាយក្រុង ដោយសារតំបន់ទាំងនោះមានភាពស្មុគស្មាញច្រើន។
អភិបាលរងរាជធានីភ្នំពេញ លោក កើត ឆែ ប្រាប់ វីអូឌី នៅថ្ងៃទី២៨ ខែមិថុនា ឆ្នាំ២០២១នេះថា អំឡុងពេលជិតមួយខែនេះ ការឆ្លងរាលដាលនៃជំងឺកូវីដ-១៩ បានវាយលុកនៅតាមជាយក្រុងនិងតំបន់មួយចំនួនទៀតក្នុងរាជធានីភ្នំពេញ ជាពិសេសនៅតំបន់ដែលមានកម្មកររោងចក្ររស់នៅច្រើន។
លោកមានប្រសាសន៍ថា៖ «គ្រាន់តែសព្វថ្ងៃនេះ ឆ្លងនៅតំបន់ជាយក្រុង គឺឆ្លងនៅតំបន់បងប្អូនកម្មករ-កម្មការិនីរោងចក្រ។ គ្រាន់តែការឆ្លង យើងសង្កេតឃើញនៅតំបន់ស្មុគស្មាញ តំបន់រោងចក្រ មាននៅស្ទឹងមានជ័យ នៅខណ្ឌពោធិ៍សែនជ័យ»។
ទោះជាយ៉ាងណា លោក កើត ឆែ មិនបានបញ្ជាក់លម្អិតជុំវិញការឆ្លងរាលដាលនៃជំងឺកូវីដ-១៩ នៅតំបន់ស្មុគស្មាញនោះដូចម្តេចនោះទេ ដោយលោកគ្រាន់តែបញ្ជាក់ថា ក្រុមការងារជំនាញរបស់រដ្ឋបាលរាជធានីភ្នំពេញបានសហការជាមួយនឹងក្រសួងការងារ ក្រសួងសុខាភិបាល និងថៅកែរោងចក្រ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩នេះផងដែរ។
នៅរសៀលថ្ងៃចន្ទនេះដែរ រដ្ឋបាលរាជធានីភ្នំពេញបានសម្រេចផ្អាកដំណើរការជាបណ្តោះអាសន្នផ្សារបឹងកេងកង ស្ថិតនៅសង្កាត់បឹងកេងកងទី១ ខណ្ឌបឹងកេងកង ដែលមានករណីវិជ្ជមានជំងឺកូវីដ-១៩កើតឡើងថ្មីក្នុងចំណោមបុគ្គលិក កម្មករ និងអាជីវករ រយៈពេល១៤ថ្ងៃ ចាប់ពីម៉ោងសូន្យ ថ្ងៃទី២៩ ខែមិថុនា ឆ្នាំ២០២១ ដល់ថ្ងៃទី១២ ខែកក្កដា ឆ្នាំ២០២១។
រដ្ឋបាលរាជធានីភ្នំពេញ បន្តថា សន្តិសុខ បុគ្គលិក កម្មករ អាជីវករ អតិថិជន និងអ្នកពាក់ព័ន្ធ ត្រូវចូលរួមសហការជាមួយអាជ្ញាធរមូលដ្ឋាន មន្ត្រីជំនាញ និងមន្ត្រីសុខាភិបាល ដើម្បីទៅយកសំណាកវិភាគរកមេរោគ និងត្រូវធ្វើចត្តាឡីស័កឱ្យបានត្រឹមត្រូវតាមការណែនាំរបស់ក្រសួងសុខាភិបាល និងអនុវត្តទៅតាមការណែនាំរបស់អាជ្ញាធរ។
សេចក្តីសម្រេចនោះបន្ថែមថា ក្នុងករណីសន្តិសុខ បុគ្គលិក កម្មករ អាជីវករ អតិថិជន និងអ្នកពាក់ព័ន្ធ ដែលមិនព្រមសហការទៅយកសំណាកវិភាគរកមេរោគកូវីដ-១៩ ឬមិនអនុវត្តវិធានចត្តាឡីស័ក នឹងត្រូវប្រឈមមុខទៅនឹងការពិន័យអន្តរការណ៍ ក្នុងកម្រិតទឹកប្រាក់ចន្លោះពី១លានរៀល ដល់១០លានរៀល ទៅតាមប្រកាសអន្តរក្រសួងរបស់ក្រសួងសេដ្ឋកិច្ចនិងហិរញ្ញវត្ថុ និងក្រសួងសុខាភិបាល។
រដ្ឋបាលរាជធានីភ្នំពេញ បានបញ្ជាក់ថា ក្រៅពីការពិន័យអន្តរការណ៍ គណៈកម្មការផ្សារ នឹងមិនអនុញ្ញាតឱ្យបន្តអាជីវកម្មលក់ដូរ ឬចេញចូលមកបម្រើការងាររបស់ខ្លួនឡើយ នៅពេលដែលផ្សារនេះត្រូវបានបើកដំណើរការឡើងវិញ។
ចំណែករដ្ឋបាលខណ្ឌបឹងកេងកង បានចេញសេចក្តីជូនដំណឹងដល់អាជីវករផ្សារបឹងកេងកង និងប្រជាពលរដ្ឋដែលរស់នៅជុំវិញផ្សារ រួមទាំងអ្នកធ្លាប់ចេញចូលចាប់ពីថ្ងៃទី២១ ដល់ថ្ងៃទី២៦ ខែមិថុនា ឆ្នាំ២០២១ ត្រូវទៅយកសំណាកតេស្តវីរុសកូវីដ-១៩ នៅបរិវេណវិទ្យាល័យជាស៊ីមបឹងកេងកង ចាប់ពីថ្ងៃនេះតទៅ ដោយសារមានអាជីវករផ្សារជាច្រើននាក់បានឆ្លងជំងឺនេះ។
ទោះជាយ៉ាងណា វីអូឌី មិនអាចសុំការបញ្ជាក់ពីចំនួនអ្នកឆ្លងកូវីដ-១៩ ថាមានចំនួនប៉ុន្មាននាក់ពីអភិបាលខណ្ឌបឹងកេងកង លោក ស៊ីម ពិសិដ្ឋ បានទេ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព សង្កេតឃើញថា ក្រោយពីរដ្ឋាភិបាលបើកឱ្យមានការធ្វើចរាចរណ៍ទូទាំងប្រទេសឡើងវិញនោះ ការឆ្លងរាលដាលនៃជំងឺកូវីដ-១៩នៅកម្ពុជាមិនទាន់មានការថមថយនៅឡើយ ពោលគឺមានអ្នកស្លាប់និងអ្នកឆ្លងថ្មីកើនឡើងជាបន្តបន្ទាប់ ដោយសារតែប្រជាពលរដ្ឋមួយចំនួនភ្លេចខ្លួន និងមិនបានអនុវត្តតាមវិធានការរបស់ក្រសួងសុខាភិបាលឱ្យបានខ្ជាប់ខ្ជួននៅឡើយ។
ករណីនេះ លោកស្រីអំពាវនាវទៅអាជ្ញាធរនិងប្រជាពលរដ្ឋត្រូវសហការគ្នាក្នុងការទប់ស្កាត់ការឆ្លងរាលដាលជំងឺកូវីដ-១៩នេះឱ្យមានប្រសិទ្ធភាពខ្ពស់ បើពុំដូច្នេះទេ បញ្ហាប្រឈមនឹងធ្វើឱ្យប៉ះពាល់ដល់សេដ្ឋកិច្ចនិងជីវភាពរបស់ពលរដ្ឋ។
លោកស្រីមានប្រសាសន៍ថា៖ «បើសិនជាបញ្ហានេះនៅតែអូសបន្លាយពេលវេលាយូរ យើងនឹងមានការប៉ះពាល់ច្រើន។ យើងឃើញហើយ មានការសិក្សារួចទៅហើយទាំងផ្នែកសេដ្ឋកិច្ច ផ្នែកសង្គម ជាពិសេសស្ថានភាពសុខភាពផ្លូវចិត្ត ផ្លូវកាយរបស់ប្រជាពលរដ្ឋយើង គឺមានការប៉ះទង្គិចមែនទែន ជាពិសេសដូចជាកុមារ។ បច្ចុប្បន្ន យើងដឹងហើយ សាលានៅតែបន្តបិទ បើសិនជាយើងមិនចូលរួម ហើយធ្វើឱ្យមានការថមថយនៃជំងឺរាតត្បាតនេះទេ យើងនឹងទទួលរងនូវផលជះ»។
បើតាមក្រសួងសុខាភិបាល គិតត្រឹមព្រឹកថ្ងៃទី២៨ ខែមិថុនានេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៤៨ ៥៣២នាក់ ក្នុងនោះ អ្នកជំងឺព្យាបាលជាសះស្បើយសរុបមានចំនួន៤២ ៧៦៤នាក់ អ្នកស្លាប់៥៥៦នាក់ និងករណីនាំចូលពីក្រៅប្រទេសសរុប២ ៣១១នាក់៕
