គណបក្សកែទម្រង់កម្ពុជា ដែលអតីតមន្ត្រីជាន់ខ្ពស់គណបក្សសង្រ្គោះជាតិទើបនឹងបង្កើតថ្មី គ្រោងនឹងធ្វើសមាជគណបក្ស នៅថ្ងៃទី២៣ ខែតុលា ខាងមុខនេះ ដើម្បីប្រកាសពីសមាសភាពថ្នាក់ដឹកនាំគណបក្សរបស់ខ្លួន។
អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន ដែលជាស្ថាបនិកគណបក្សថ្មោងថ្មីនេះ បានប្រាប់ វីអូឌី នៅថ្ងៃទី៣០ ខែមិថុនា ថាបើគ្មានអ្វីប្រែប្រួលទេ គណបក្សលោកនឹងធ្វើសមាជគណបក្សនៅថ្ងៃទី២៣ ខែតុលា ឆ្នាំ២០២១នេះ ដើម្បីប្រកាសពីសមាសភាពថ្នាក់ដឹកនាំគណបក្ស លក្ខន្តិកៈ និងគោលនយោបាយរបស់គណបក្ស។ ប៉ុន្តែគិតត្រឹមថ្ងៃទី៣០ ខែមិថុនានេះ លោកនៅមិនទាន់បង្ហើបឱ្យដឹងពីសមាសភាពថ្នាក់ដឹកនាំសំខាន់ៗនៃគណបក្សថ្មីនេះនៅឡើយទេ។
កន្លងមក គេបានដឹងថា លោក អ៊ូ ច័ន្ទរ័ត្ន ធ្លាប់បានបោះដៃរកលោក សុន ឆ័យ តំណាងរាស្ត្រអតីតគណបក្សសង្គ្រោះជាតិដែលទើបទទួលបានសិទ្ធិធ្វើនយោបាយឡើងវិញកាលពីខែកញ្ញា ឆ្នាំ២០២០ និងលោក ប៉ុល ហំម អតីតអនុប្រធានគណបក្សសង្គ្រោះជាតិ ដែលបានប្រកាសមកចូលរួមជាមួយគណបក្សនេះ បន្ទាប់ពីបានស្នើសុំសិទ្ធិធ្វើនយោបាយឡើងវិញ កាលពីថ្ងៃទី២០ ខែឧសភា ឆ្នាំ២០២១។
ក្រសួងមហាផ្ទៃ បានអនុញ្ញាតឱ្យលោក អ៊ូ ច័ន្ទរ័ត្ន អតីតតំណាងរាស្រ្តគណបក្សសង្រ្គោះជាតិ បង្កើតគណបក្សកែទម្រង់កម្ពុជា កាលពីថ្ងៃទី១៦ ខែមីនា ឆ្នាំ២០២១។
បើតាមលោក អ៊ូ ច័ន្ទរ័ត្ន ការកំណត់យកថ្ងៃទី២៣ ខែតុលា ឆ្នាំ២០២១ ដើម្បីធ្វើសមាជគណបក្សនេះ មិនមែនជារឿងចៃដន្យនោះទេ ត្បិតគណបក្សចង់ភ្ជាប់ព្រឹត្តិការណ៍សមាជគណបក្សរបស់ខ្លួនទៅនឹងថ្ងៃប្រវត្តិសាស្ត្រនៃកិច្ចព្រមព្រៀងសន្តិភាពទីក្រុងប៉ារីស ២៣តុលា ឆ្នាំ១៩៩១ ដែលត្រូវនឹងខួប៣០ឆ្នាំគត់ គិតមកដល់ឆ្នាំ២០២១នេះ៕