ជាថ្មីម្តងទៀត ក្រុមមេធាវីការពារក្តីអតីតប្រធានគណបក្សសង្រ្គោះជាតិ លោក កឹម សុខា បានចេញមកអំពាវនាវកុំឱ្យគណបក្សនយោបាយដែលទើបបង្កើតថ្មីយកឈ្មោះកូនក្តីរបស់ខ្លួនទៅប្រើប្រាស់ដើម្បីស្វែងរកការគាំទ្របន្តទៀត។
ការអំពាវនាវនេះបានធ្វើឡើងបន្ទាប់ពីក្រុមមេធាវីការពារក្តីលោក កឹម សុខា បានទទួលព័ត៌មានមកថា គណបក្សនយោបាយថ្មីមួយឈ្មោះ «គណបក្សបេះដូងជាតិ» កំពុងដើរបញ្ចុះបញ្ចូលអតីតសកម្មជនគណបក្សសង្គ្រោះជាតិនៅតាមមូលដ្ឋាន ដូចជា នៅខេត្តកំពង់ចាម ខេត្តត្បូងឃ្មុំ ខេត្តបន្ទាយមានជ័យ និងខេត្តមួយចំនួនទៀត ដោយប្រើឈ្មោះរបស់លោក កឹម សុខា ថាជាអ្នកនៅពីក្រោយនៃការបង្កើតគណបក្សថ្មីរបស់ខ្លួន ដោយសំដៅទាក់ទាញចំណាប់អារម្មណ៍និងការគាំទ្រទៅលើគណបក្សថ្មីរបស់ពួកគេ។
ប៉ុន្តែសហមេធាវីការពារក្តីលោក កឹម សុខា គឺលោក ចាន់ ចេន បានសរសេរនៅលើគណនីហ្វេសប៊ុករបស់លោកកាលពីថ្ងៃទី២៩ ខែមិថុនា ថា ដើម្បីកុំឱ្យអ្នកគាំទ្រនិងប្រជាពលរដ្ឋខ្មែរមានការភ័ន្តច្រឡំនិងចាញ់បោកការអូសទាញរបស់អ្នកនយោបាយទាំងអស់នោះ លោកមេធាវីបានបញ្ជាក់សារជាថ្មីថា លោក កឹម សុខា មិនគាំទ្រក្រុមណាមួយឱ្យបង្កើតបក្សថ្មី ហើយលោកក៏មិនដែលនៅពីក្រោយខ្នងក្រុមណាមួយឡើយ ទោះជាពេលមុនឬពេលនេះក៏ដោយ។
លោកមេធាវីបានសរសេរយ៉ាងដូច្នេះថា៖ «ដើម្បីសម្រេចបានមហិច្ឆតារបស់ក្រុមខ្លួន អស់លោកទាំងនោះបាននិយាយបញ្ចុះបញ្ចូលអ្នកគាំទ្រអតីតសង្គ្រោះជាតិ ថាបក្សរបស់ក្រុមខ្លួននេះគឺឯកឧត្តម កឹម សុខា ឱ្យបង្កើត ឯកឧត្តម កឹម សុខា នៅពីក្រោយខ្នង ឯកឧត្តម កឹម សុខា បានបើកភ្លើងខៀវហើយ»។
វីអូឌី មិនអាចសុំការឆ្លើយបំភ្លឺពីលោក សៀម ភ្លុក ស្ថាបនិក «គណបក្សបេះដូងជាតិ» ដែលរងការចោទប្រកាន់ថាបានប្រើប្រាស់ឈ្មោះរបស់លោក កឹម សុខា ដើម្បីទាក់ទាញការគាំទ្រពីសកម្មជនមូលដ្ឋាននេះបាននៅឡើយទេ។ គណបក្សបេះដូងជាតិ របស់លោក សៀម ភ្លុក ដែលអ្នកបង្កើតជាអតីតសមាជិកគណបក្សសង្គ្រោះជាតិដែរនោះ ទើបទទួលស្គាល់ពីក្រសួងមហាផ្ទៃ កាលពីថ្ងៃទី២១ ខែមិថុនា ឆ្នាំ២០២១។
លោក ផែង ហេង សហមេធាវីការពារក្តីលោក កឹម សុខា បានថ្លែងថា ការយកឈ្មោះរបស់លោក កឹម សុខា ទៅប្រើប្រាស់ដោយអ្នកនយោបាយណាមួយនោះ វានឹងធ្វើឱ្យប៉ះពាល់សិទ្ធិឯកជនរបស់លោក កឹម សុខា និងធ្វើឱ្យប៉ះពាល់ដល់បញ្ហាផ្លូវច្បាប់ក្នុងដំណើរការតុលាការរបស់កូនក្តីលោក។ បើតាមលោកមេធាវីរូបនេះ គណបក្សនយោបាយដែលប្រើប្រាស់ឈ្មោះរបស់លោក កឹម សុខា ក៏អាចប្រឈមនឹងហានិភ័យក្នុងការរំលាយដូចគ្នាទៅនឹងអតីតគណបក្សសង្គ្រោះជាតិ កាលពីខែវិច្ឆិកា ឆ្នាំ២០១៧ផងដែរ។
លោកមេធាវីថ្លែងយ៉ាងដូច្នេះថា៖ «ទី១ គឺប៉ះពាល់សិទ្ធិរបស់ឯកឧត្តម កឹម សុខា ដែលគាត់ជាក់ស្តែងមិនបានប្រើឱ្យទៅបង្កើតផង។ បញ្ហាទី២ គឺធ្វើឱ្យប៉ះពាល់ទៅលើសាលដីកាឬដីកាសម្រេចរបស់តុលាការ និងពាក់ព័ន្ធផ្លូវច្បាប់»។
នេះមិនមែនជាលើកទី១ទេដែលក្រុមមេធាវីការពារក្តីអតីតមេបក្សប្រឆាំង បានចេញមកច្រានចោលចំពោះអ្នកនយោបាយដែលបានប្រើឈ្មោះរបស់លោក កឹម សុខា ដើម្បីទាក់ទាញអ្នកគាំទ្រ ខណៈលោក កឹម សុខា កំពុងស្ថិតនៅក្នុងបម្រាមធ្វើនយោបាយនៅឡើយ។
កាលពីខែកុម្ភៈ ឆ្នាំ២០២១ ក្រុមមេធាវីការពារក្តីលោក កឹម សុខា បានចេញសេចក្តីថ្លែងការណ៍ជាសាធារណៈម្តងរួចមកហើយ ដោយហាមអ្នកនយោបាយដែលចង់បង្កើតបក្សថ្មីឬចលនានយោបាយណាមួយសម្រាប់ចូលរួមការបោះឆ្នោតនាពេលខាងមុខ យកឈ្មោះលោក កឹម សុខា ទៅភ្ជាប់ឬពាក់ព័ន្ធនឹងគណបក្សនយោបាយរបស់ខ្លួន។
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សសង្គ្រោះជាតិ ដែលទើបចេញទៅបង្កើតគណបក្សថ្មីមួយឈ្មោះ «គណបក្សកែទម្រង់កម្ពុជា» យល់ឃើញថា ការព្រួយបារម្ភពីការប្រើប្រាស់ឈ្មោះរបស់លោក កឹម សុខា ដែលនាំឱ្យប៉ះពាល់ដល់កិត្តិយសរបស់លោកនោះ ជារឿងត្រឹមត្រូវ ប៉ុន្តែលោកយល់ឃើញថា ការប្រើប្រាស់ឈ្មោះរបស់លោក កឹម សុខា គឺជាកិត្តិយសរបស់លោក កឹម សុខា ទៅវិញទេ។
លោក អ៊ូ ច័ន្ទរ័ត្ន មានប្រសាសន៍យ៉ាងដូច្នេះថា៖ «មែនទែន ប្រសិនជាមនុស្សគេស្រឡាញ់លោកគ្រប់គ្នា គេយកឈ្មោះលោកទៅប្រើគ្រប់គ្នា គឺជាការលើកកម្ពស់ លើកកិត្តិយសលោកទៅវិញទេ។ ហើយបើមនុស្សទាំងអស់ហ្នឹងប្រើឈ្មោះរបស់លោកមែន ហើយលោកអាចចេញមកធ្វើនយោបាយកើតមែន នោះសុទ្ធតែជាមនុស្សដែលគាំទ្រលោកហើយ។ ប្រសិនបើលោកចេញមកវិញ ត្រូវតែចូលរួមជាមួយលោកហើយ ព្រោះយកឈ្មោះគាត់ប្រើ ប៉ុន្តែបើមិនយកឈ្មោះលោកប្រើទេ អាហ្នឹងអាចរក្សាកិត្តិយសបែបហ្នឹងជូនលោក»។
ចាប់តាំងពីក្រោយការរំលាយគណបក្សសង្គ្រោះជាតិមក យ៉ាងហោចណាស់មានគណបក្សនយោបាយចំនួន៥ ដោយអ្នកបង្កើតជាអតីតមន្ត្រីជាន់ខ្ពស់បក្សប្រឆាំងមួយនេះ រួមមាន គណបក្សឆន្ទៈខ្មែរ គណបក្សខ្មែររួបរួមជាតិ គណបក្សខ្មែរអភិរក្ស គណបក្សកែទម្រង់កម្ពុជា និងគណបក្សបេះដូងជាតិ។ ប៉ុន្តែប្រធានគណបក្សឆន្ទៈខ្មែរ បានអះអាងថា ខ្លួនមិនមែនជាគណបក្សដែលបែកចេញពីអតីតគណបក្សសង្គ្រោះជាតិនោះទេ៕
