អ្នករាយការណ៍ពិសេសទទួលបន្ទុកផ្នែកសិទ្ធិមនុស្សនៃអង្គការសហប្រជាជាតិថ្មីប្រចាំនៅកម្ពុជា ប្តេជ្ញាធ្វើការងារជាមួយរដ្ឋាភិបាលកម្ពុជា ដើម្បីជំរុញការគោរពសិទ្ធិមនុស្សនិងលទ្ធិប្រជាធិបតេយ្យឱ្យកាន់តែប្រសើរឡើង ប៉ុន្តែអ្នកឃ្លាំមើលសង្គមមានជំនឿតិចតួចបំផុត។
ការប្រកាសជំហរនេះ ធ្វើឡើងបន្ទាប់ពីអ្នករាយការណ៍ពិសេស លោក វិទិត មុនតាប៊ន បានបញ្ចប់ជំនួបជាស៊េរីតាមរយៈវីដេអូខនហ្វ្រឹរេន ជាមួយបណ្តារដ្ឋមន្ត្រី និងមន្ត្រីសំខាន់ៗរបស់កម្ពុជា ចាប់ពីថ្ងៃទី២៣ ខែមិថុនា ដល់ថ្ងៃទី១ ខែកក្កដា ឆ្នាំ២០២១ ក្នុងនោះរួមមាន រដ្ឋមន្ត្រីក្រសួងមហាផ្ទៃ រដ្ឋមន្រ្តីក្រសួងសុខាភិបាល រដ្ឋមន្រ្តីក្រសួងការបរទេស រដ្ឋលេខាធិការអចិន្ត្រៃយ៍នៃក្រសួងសង្គមកិច្ច អតីតយុទ្ធជន និងយុវនីតិសម្បទា រដ្ឋលេខាធិការក្រសួងយុត្តិធម៌ និងប្រធានគណៈកម្មាធិការសិទ្ធិមនុស្សកម្ពុជា ជាដើម។
គោលបំណងនៃកិច្ចប្រជុំទាំងនេះ គឺដើម្បីណែនាំឱ្យស្គាល់អំពីវិធីសាស្រ្តនិងបញ្ហាជាអាទិភាពនៃអាណត្តិការងាររបស់លោក និងពិភាក្សាអំពីវិធីផ្សេងៗ ដើម្បីពង្រឹងកិច្ចសន្ទនានិងកិច្ចសហការរវាងភាគីទាំងពីរ រួមនឹងបញ្ហាសំខាន់ៗជាអាទិភាពផ្នែកសិទ្ធិមនុស្សមួយចំនួនទៀត ដូចជា លំហសិទ្ធិពលរដ្ឋនិងប្រជាធិបតេយ្យ ស្ថានភាពសិទ្ធិមនុស្ស ស្ថានភាពជំងឺកូវីដ-១៩ ស្ថានភាពពន្ធនាគារ ការបង្កើតច្បាប់ សិទ្ធិស្រ្តីនិងយេនឌ័រ និងសិទ្ធិសេដ្ឋកិច្ចនិងសង្គម ជាដើម។
អ្នករាយការណ៍ពិសេសទទួលបន្ទុកផ្នែកសិទ្ធិមនុស្សនៃអង្គការសហប្រជាជាតិថ្មីប្រចាំនៅកម្ពុជា លោក វិទិត មុនតាប៊ន បានលើកឡើងក្នុងសេចក្ដីថ្លែងការណ៍មួយនៅថ្ងៃសុក្រនេះថា ការលើកកម្ពស់សិទ្ធិទទួលបានយុត្តិធម៌ គឺជាគន្លឹះមួយសម្រាប់កិច្ចសន្ទនា។
លោកក៏បានបញ្ជាក់ពីការត្រៀមខ្លួនជាស្រេច ដើម្បីគាំទ្រដល់រដ្ឋាភិបាលកម្ពុជាក្នុងការអនុវត្តកាតព្វកិច្ចរបស់ខ្លួន ក្រោមលិខិតុបករណ៍សិទ្ធិមនុស្សអន្តរជាតិ រួមទាំងសន្ធិសញ្ញាទាំងឡាយដែលប្រទេសកម្ពុជាបានទទួលយកដោយស្ម័គ្រចិត្ត ក្រោមការត្រួតពិនិត្យរបាយការណ៍ជាសកលតាមកាលកំណត់។
ចំណែករដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ក៏បានចេញសេចក្ដីថ្លែងការណ៍មួយនៅថ្ងៃនេះដែរថា ក្នុងកិច្ចពិភាក្សាជាមួយអ្នករាយការណ៍ពិសេសថ្មីរបស់អង្គការសហប្រជាជាតិនោះ បានផ្តោតជាសំខាន់លើកិច្ចសហប្រតិបត្តិការអន្តរជាតិនិងតំបន់ ជំងឺកូវីដ-១៩ និងបញ្ហាសិទ្ធិពលរដ្ឋនិងប្រជាធិបតេយ្យ។ លោកបន្តថា រាល់វិធានការច្បាប់និងការគ្រប់គ្រងរដ្ឋបាល ត្រូវបានពង្រឹងនិងអនុវត្តនៅក្នុងព្រំដែននៃច្បាប់។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា ការប្រកាសជំហរនេះជាកាតព្វកិច្ចរបស់អ្នករាយការណ៍ពិសេស ប៉ុន្តែប្រសិទ្ធភាពបែបណានោះ អាស្រ័យលើរដ្ឋាភិបាលកម្ពុជាដែលជាអ្នកអនុវត្ត ដើម្បីឆ្លើយតបនឹងរដ្ឋធម្មនុញ្ញនិងលិខិតុបករណ៍សិទ្ធិមនុស្សអន្តរជាតិ រួមទាំងសន្ធិសញ្ញាទីក្រុងប៉ារីស។
លោកស្រីថា៖ «អ៊ីចឹងជាធម្មតា ទាំងអ្នករាយការណ៍ពិសេសក្ដី ឬក៏សហគមន៍អន្តរជាតិក្ដី ឬអង្គការសង្គមស៊ីវិលដែលយើងកន្លងមកព្យាយាមអំពាវនាវឱ្យមានការស្ដារឡើងវិញការគោរពគោលការណ៍នីតិរដ្ឋអីជាដើម គឺយើងបានធ្វើកិច្ចការងារទាំងអស់ហ្នឹងនៅក្នុងអាណត្តិរបស់យើង ប៉ុន្តែសំខាន់បំផុត គឺអាជ្ញាធរខ្លួនឯងដែលត្រូវធ្វើយ៉ាងម៉េចបង្ហាញអំពី មិនមែនត្រឹមតែឆន្ទៈទេ ប៉ុន្តែគឺជាសកម្មភាពពិតប្រាកដដែលខ្លួនបានអនុលោមទៅតាមកាតព្វកិច្ចរបស់ខ្លួនដែលត្រូវធានាដល់សិទ្ធិសេរីភាពរបស់ពលរដ្ឋហ្នឹង»។
ប៉ុន្តែអ្នកស្រាវជ្រាវសង្គម លោកបណ្ឌិត សេង សារី បង្ហាញក្ដីសង្ឃឹមតិចតួចបំផុត ការដែលអ្នករាយការណ៍ពិសេសថ្មីនិងរដ្ឋាភិបាលកម្ពុជាថា នឹងអាចស្ដារលទ្ធិប្រជាធិបតេយ្យនៅកម្ពុជាឡើងវិញបាននោះ។
លោកថា៖ «មូលហេតុដែលខ្ញុំសង្ឃឹមតិចតួចនេះ ដោយសារប្រទេសមហាអំណាចបានប្រើប្រាស់គ្រប់យន្តការហើយ រហូតដល់យន្តការធម៌ក្ដៅហើយ ជាការដកប្រព័ន្ធអនុគ្រោះពន្ធ ការដាក់ទណ្ឌកម្មមន្ត្រីជាន់ខ្ពស់រដ្ឋាភិបាល ហើយចុងក្រោយនេះ អាមេរិកក៏ដកអាហារូបករណ៍និស្សិត ជាដើម។ អ៊ីចឹងហើយខ្ញុំមិនសង្ឃឹមថា តំណាងអង្គការសហប្រជាជាតិមានឥទ្ធិពលធ្វើឱ្យរដ្ឋាភិបាលផ្លាស់ប្ដូរចិត្តទេ»។
កាលពីថ្ងៃទី២ ខែមីនា ឆ្នាំ២០២១ សហភាពអឺរ៉ុប និងបណ្តាប្រទេសប្រកាន់ប្រជាធិបតេយ្យមួយចំនួនបានចេញសេចក្តីថ្លែងការណ៍មួយ ដោយទទូចជាថ្មីទៀតឱ្យរដ្ឋាភិបាលកម្ពុជាផ្តើមដំណើរការផ្សះផ្សាជាតិឡើងវិញ តាមរយៈការសន្ទនាស្មោះត្រង់ដោយមានការចូលរួមពីគ្រប់ភាគី។
សហភាពអឺរ៉ុប លើកឡើងក្នុងសេចក្តីថ្លែងការណ៍ដដែលថា ប្រជាពលរដ្ឋកម្ពុជាទាំងអស់គួរទទួលបាននូវការធានាថា ពួកគេមានសិទ្ធិទទួលបានការកាត់ក្តីដ៏ត្រឹមត្រូវ ស្របទៅតាមអនុសញ្ញាស្តីពីសិទិ្ធពលរដ្ឋនិងសិទ្ធិនយោបាយដែលចែងក្នុងរដ្ឋធម្មនុញ្ញរបស់កម្ពុជា។
បញ្ហានេះ សហភាពអឺរ៉ុប គូសបញ្ជាក់ថា អាជ្ញាធរកម្ពុជាត្រូវគោរពនីតិរដ្ឋនិងការជំនុំជម្រះដ៏ត្រឹមត្រូវ និងធានាថា សិទ្ធិចូលរួមនយោបាយនិងសេរីភាពជាមូលដ្ឋានគ្រឹះត្រូវបានគោរពយ៉ាងពេញលេញ រាប់បញ្ចូលទាំងសេរីភាពនៃការបញ្ចេញមតិ ការបង្កើតអង្គការសមាគម និងការប្រមូលផ្តុំដោយសន្តិវិធី។
គួរជម្រាបជូនថា បន្ទាប់ពីកិច្ចប្រជុំនេះ លោក វិទិត មុនតាប៊ន នឹងសរសេររបាយការណ៍លើកដំបូងរបស់ខ្លួនដាក់ក្នុងសម័យប្រជុំលើកទី៤៨ នៃក្រុមប្រឹក្សាសិទ្ធិមនុស្សអង្គការសហប្រជាជាតិនៅពេលខាងមុខនេះ៕
អត្ថបទទាក់ទង