មន្ត្រីឧទ្យានុរក្សនៅមជ្ឈមណ្ឌលសង្គ្រោះសត្វព្រៃភ្នំតាម៉ៅ ខេត្តតាកែវ បានបង្ហាញការសោកស្តាយចំពោះមតិរិះគន់ពីសាធារណជននៅលើបណ្តាញសង្គម ទៅលើការងារថែទាំសត្វព្រៃ ជាពិសេសការថែទាំទៅលើសត្វតោមួយក្បាលដែលទើបនឹងដកហូតពីជនជាតិចិនកាលពីពេលថ្មីៗនេះ។
មន្ត្រីឧទ្យានុរក្ស និងជាអ្នកថែទាំសត្វព្រៃនៅមជ្ឈមណ្ឌលសង្គ្រោះសត្វព្រៃភ្នំតាម៉ៅ លោក យ៉ាន វីរៈ ប្រាប់ វីអូឌី កាលពីថ្ងៃទី៣០ ខែមិថុនា ថាថ្មីៗនេះមានមតិមួយចំនួននៅលើបណ្ដាញសង្គមបង្ហាញពីការអាណិតអាសូរចំពោះសត្វតោមួយក្បាលដែលត្រូវបានបំបែកពីម្ចាស់ជាជនជាតិចិន ដោយអ្នកប្រើប្រាស់បណ្តាញសង្គមទាំងនោះមានការបារម្ភថា តោមួយក្បាលនេះទទួលបានការមើលថែមិនល្អពីសំណាក់មន្រ្តីឧទ្យានុរក្សនៅភ្នំតាម៉ៅ។
លោកយល់ថា ការលើកឡើងនេះហាក់បីដូចជារូបភាពមួយដែលមិនផ្តល់ទំនុកចិត្តលើមន្ត្រីឧទ្យានុរក្សក្នុងការថែទាំសត្វតោ និងសត្វព្រៃដទៃទៀត។
លោកបន្តថា៖ «អស់សង្ឃឹមណាស់! និយាយត្រង់ថា [ខ្ញុំ] លែងចង់នៅជាមួយវាទៀតហើយ [សត្វព្រៃដែលលោកថែរក្សា] ហើយពួកខ្ញុំធ្វើការនៅនេះគ្មានប្រាក់ខែឯណាទៅខ្ពស់ដូចជាគេធ្វើការងារ [កន្លែងផ្សេងទៀត] ប៉ុន្តែដោយសារការស្រឡាញ់ពេញចិត្តជាមួយពួកវា អ៊ីចឹងយើងនៅទៅ»។
ក្រុមមន្ត្រីឧទ្យានុរក្សបានទទួលសត្វតោមួយក្បាលដែលដកហូតពីម្ចាស់ជាជនជាតិចិន កាលពីថ្ងៃទី២៧ ខែមិថុនា កន្លងទៅ យកទៅកាន់មជ្ឈមណ្ឌលសង្គ្រោះសត្វព្រៃភ្នំតាម៉ៅ ដើម្បីធ្វើការបន្សាំវាជាមួយការរស់នៅនិងការមើលថែបែបលក្ខណៈជីវសាស្រ្ត។
លោក យ៉ាន វីរៈ ដែលបានចូលបម្រើការងារជាអ្នកមើលថែសត្វព្រៃនៅភ្នំតាម៉ៅ រយៈពេល៩ឆ្នាំមកហើយនោះ ក៏បានប្រតិកម្មតបចំពោះមតិរបស់អ្នកប្រើប្រាស់បណ្តាញសង្គមមួយចំនួនដែលចង់ឱ្យយកសត្វតោនេះឱ្យទៅម្ចាស់របស់វាវិញ ថាវាជាអាចជាការប្រឈមនឹងហានិភ័យទៅថ្ងៃក្រោយ បើឱ្យសត្វនោះទៅរស់នៅជាមួយម្ចាស់វិញ ព្រោះសត្វតោជាប្រភេទសត្វព្រៃដែលមានភាពកាចសាហាវ និងអាចបង្កគ្រោះថ្នាក់ នៅពេលដែលវាបញ្ចេញសារធាតុព្រៃរបស់វាចេញមក។
លោកបន្តថា៖ «ចុះឧទាហរណ៍វាធំជាងហ្នឹង ហើយពេលដែលវារួច ហើយទៅខាំអ្នកណាមួយ សួរថាពេលហ្នឹងអ្នកណាជាអ្នកដែលទទួលខុសត្រូវ [ដល់ពេលមានបញ្ហាកើតឡើង] មិនគិតថាខាងភ្នាក់ងារអភិរក្សមិនចេះមើល មិនចេះថែ? ហ្នឹងខុសទៀត ចាំតែខុស»។
សត្វតោឈ្មោលមួយក្បាលនេះមានឈ្មោះថា ហ៊ីម៉ា ត្រូវបានចិញ្ចឹមនៅក្នុងផ្ទះវីឡាមួយកន្លែងស្ថិតនៅសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ តាំងពីនៅតូច ហើយមកដល់ពេលនេះ វាមានអាយុ១ឆ្នាំកន្លះ និងស៊ីសាច់ឆ្អិនមួយថ្ងៃ ៦គីឡូ។
ចំណែកមន្ត្រីឧទ្យានុរក្សនិងជាអ្នកថែទាំសត្វព្រៃនៅមជ្ឈមណ្ឌលសង្គ្រោះសត្វព្រៃភ្នំតាម៉ៅមួយរូបទៀត លោក សំ វឿន មានប្រសាសន៍ថា ការមើលថែនិងចិញ្ចឹមសត្វព្រៃទាំងនេះជួបការលំបាកច្រើន ជាពិសេសគឺពេលដែលពួកវាឈឺនិងពេលវានៅតូច។
លោកបន្តទៀតថា៖ «ធម្មតា [ការរិះគន់] វាប៉ះពាល់មកលើពួកខ្ញុំខ្លះដែរហើយ វាមិនអត់ទេ ព្រោះពួកខ្ញុំខំថែទាំមើលយកចិត្តទុកដាក់ គ្រាន់តែថា ការរិះគន់របស់ពួកគាត់វាមិនត្រឹមត្រូវ ប៉ុន្តែខ្ញុំក៏មិនប្រកាន់ពួកគាត់ដែរ ខ្ញុំមិនហាមឃាត់បងប្អូនមិនឱ្យរិះគន់ទេ រិះគន់ចុះ! តែយើងមុននឹងរិះគន់ យើងមើលសិន មិនមែនឮគេថា ថាតាមគេទេ យើងមកមើលផ្ទាល់សិនមក»។
ជុំវិញករណីដែលអាជ្ញាធរដកហូតសត្វតោពីម្ចាស់របស់វាមករក្សាទុកនៅភ្នំតាម៉ៅ មន្ត្រីឧទ្យានុរក្សរូបនេះយល់ថាជារឿងដែលត្រឹមត្រូវ ដោយសារការចិញ្ចឹមសត្វព្រៃនៅក្នុងផ្ទះជារឿងដែលខុសច្បាប់។
លោកបន្តថា៖ «ធម្មតា មនុស្សយើងម្នាក់ៗ សត្វដែលយើងធ្លាប់ចិញ្ចឹម វាចេះតែស្រឡាញ់ ចេះតែអាណិត ចេះតែស្រណោះហើយ ប៉ុន្តែនៅក្នុងប្រទេសរបស់យើងគឺមានច្បាប់ មានច្បាប់ការថែទាំសត្វព្រៃដែលយើង[ចិញ្ចឹម]អត់មានច្បាប់ត្រឹមត្រូវ អាហ្នឹងគេត្រូវការដកហូតហើយ»។
លោក ឆោម ពន្លឺ វ័យ១៨ឆ្នាំ ជាភ្ញៀវទេសចរដែលទៅកម្សាន្តនៅសួនសត្វភ្នំតាម៉ៅ បានបង្ហាញការគាំទ្រចំពោះចំណាត់ការរបស់អាជ្ញាធរដែលដកហូតសត្វតោមួយក្បាលនោះយកមកថែរក្សាទុកនៅភ្នំតាម៉ៅ ដោយហេតុថា នៅទីនោះ វាមានលក្ខខណ្ឌសមស្របសម្រាប់ការរស់នៅរបស់សត្វព្រៃ ជាពិសេសគឺអម្បូរសត្វតោដែលជាសត្វកំណាចនោះតែម្ដង។
លោកបន្តទៀតថា៖ «វាជាប្រភេទសត្វព្រៃ សារជាតិវាព្រៃ ដល់ពេលយើងយកវាមកចិញ្ចឹមជាប្រភេទសត្វស្រុក ខ្ញុំគិតថាទាល់តែយើងអ្នកដែលរក្សាវា មើលថែចិញ្ចឹមហ្នឹង មានបទពិសោធន៍ក្នុងការចិញ្ចឹមវាដែរ។ បើយើងចេះតែចិញ្ចឹមវាបែបលក្ខណៈតែតាមអារម្មណ៍របស់យើង ក៏វាពិបាកដែរ»។
ប្រធានផ្នែកកម្មវិធីស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គីមហុង ក៏បានគាំទ្រចំពោះការដកហូតយកសត្វតោនេះទៅថែរក្សានិងឱ្យវារស់នៅជាលក្ខណៈធម្មជាតិនេះដែរ។
លោកថា៖ «ការដកហូតសត្វតោយកទៅសង្គ្រោះនេះ គឺជារឿងមួយដែលអនុវត្តទៅតាមនីតិវិធីច្បាប់ ដែលពលរដ្ឋគ្រប់រូបចាំបាច់ត្រូវតែធ្វើការអនុវត្តយ៉ាងម៉ឺងម៉ាត់។ ហើយតោដែលជាប្រភេទសត្វព្រៃកម្រនេះគួរតែរស់នៅក្នុងព្រៃ ហើយវាមិនមែនជាប្រភេទសត្វចិញ្ចឹមដែលត្រូវយកមកដាក់ចិញ្ចឹមនោះទេ»។
លោកក៏បានអំពាវនាវដល់សាធារណជន គួរបញ្ឈប់ការលើកទឹកចិត្តឱ្យចិញ្ចឹមសត្វព្រៃនៅក្នុងផ្ទះ និងគួរអនុវត្តវិធានការច្បាប់ឬការដាក់ពិន័យចំពោះអ្នកដែលចិញ្ចឹមនិងជួញដូរសត្វព្រៃខុសច្បាប់ផងដែរ។
គួរបញ្ជាក់ផងដែរថា មកទល់នឹងពេលនេះ នៅក្នុងមជ្ឈមណ្ឌលសង្គ្រោះសត្វព្រៃភ្នំតាម៉ៅ មានសត្វតោចំនួន៥ក្បាល បូករួមទាំងតោមួយក្បាលដែលទើបតែដកហូតពីជនជាតិចិននេះ។ សត្វតោទាំងនោះមានអាយុចន្លោះពី២ឆ្នាំកន្លះ ទៅ៣ឆ្នាំ និងមានទម្ងន់ចាប់ពី១៧០គីឡូក្រាម ដល់២០០គីឡូក្រាម៕