អាជីវករលក់ដូរម៉ូតូមួយចំនួននៅរាជធានីភ្នំពេញ ត្អូញត្អែរពីបញ្ហាជីវភាព ខណៈអាជ្ញាធរចេញវិធានការមិនឱ្យពួកគេដាក់លក់ម៉ូតូនៅលើដីចំណីផ្លូវសាធារណៈ ក្រោមហេតុផលរៀបចំសណ្ដាប់ធ្នាប់ ស្របពេលដែលកម្ពុជាកំពុងជួបវិបត្តិជំងឺកូវីដ-១៩។
ការត្អូញត្អែរនេះធ្វើឡើងបន្ទាប់ពីរដ្ឋបាលរាជធានីភ្នំពេញ កាលពីថ្ងៃទី២៩ ខែមិថុនា ឆ្នាំ២០២១ បានចេញសេចក្ដីសម្រេចមួយ ដោយមិនឱ្យអាជីវករប្រើប្រាស់ចំណីផ្លូវសម្រាប់លក់ដូរម៉ូតូនិងរថយន្តទៀតទេ។ រដ្ឋបាលរាជធានីភ្នំពេញ បានទុករយៈពេល២ខែឱ្យអាជីវកម្ម ដែលអាជ្ញាធរថា លក់ដូរគ្មានសណ្តាប់ធ្នាប់ទាំងនោះ រើចេញទៅជាយក្រុងវិញ។
អាជីវករមួយរូបដែលប្រកបរបរលក់ម៉ូតូនៅហាង ទ្រី មុំ តាមបណ្ដោយផ្លូវគិរីរម្យ បានលើកឡើងកាលពីថ្ងៃទី០១ ខែកក្កដានេះថា ការសម្រេចរបស់អាជ្ញាធរនេះបានបង្កឱ្យពួកគាត់ជួបបញ្ហាប្រឈមនិងអាចបាត់បង់ចំណូលកាន់តែច្រើន ខណៈកម្ពុជាកំពុងមានការឆ្លងរាលដាលនៃជំងឺកូវីដ-១៩។
លោកបាននិយាយថា៖ «បើយើងគិតស្ថានភាពឥលូវ មិនគួរទេ! ទី១ ស្ថានភាពកំពុងមានវិបត្តិសេដ្ឋកិច្ច ការលក់ដូរគាំង ទី២ ថ្លៃផ្ទះ គេមិនចុះទេ យ៉ាងច្រើនចុះតិចតួចបំផុតទេ ព្រោះយើងចុះកុងត្រា ទី៣ ឧបមាយើងលក់ក្នុងផ្ទះ សួរថា ដាក់ម៉ូតូបាន១០គ្រឿង តែ៣គ្រឿងណែនបាត់ទៅហើយ តើយើងរៀបម៉ូតូកន្លែងណា»។
លោកបានសំណូមពរដូច្នេះថា៖ «ធ្វើយ៉ាងម៉េចអនុវត្តច្បាប់ឱ្យវាស្មើភាពគ្នា កុំធ្វើតាមតំបន់ […] ឱ្យធ្វើជាគោលការណ៍ទៅ សំខាន់អនុវត្តឱ្យនៅក្រោមច្បាប់តែមួយទៅ»។
អាជីវករលក់ម៉ូតូមួយរូបទៀតវ័យ៤០ឆ្នាំ បាននិយាយក្នុងលក្ខខណ្ឌមិនបញ្ចេញឈ្មោះនិងស្លាកយីហោហាងរបស់ខ្លួនថា លោកបានប្រកបរបរលក់ម៉ូតូនៅលើបណ្តោយមហាវិថីព្រះសីហនុ ម្តុំអតីតរោងភាពយន្តគិរីរម្យនេះ ប្រមាណជាង១០ឆ្នាំមកហើយ។ លោកយល់ថា ចំណាត់ការរបស់អាជ្ញាធរនៅពេលនេះបានបង្កផលប៉ះពាល់ទៅលើចំណូលជីវភាពប្រចាំថ្ងៃរបស់ពួកគាត់កាន់តែខ្លាំង។
លោកបានលើកឡើងថា៖ «គាត់ចាត់មកបែបហ្នឹងល្អ តែប៉ះពាល់យើងខ្លាំង ដោយសារយើងនៅនេះ យើងលក់តូចតាច យើងមិនមែនបែបជាហាងធំទេ រកបានត្រឹមតែរស់និងចិញ្ចឹមជីវិតក្រុមគ្រួសារទេ មានកូនចៅពីរបីនាក់ […] ដល់តែពេលគាត់បិទ ឱ្យលក់ក្នុងផ្ទះអ៊ីចឹង ប៉ះពាល់ដែរ! ប៉ះពាល់ខ្លាំង យើងបីបួនដប់ថ្ងៃ លក់បានមួយគ្រឿង ឥលូវបែរជាគ្មានមនុស្សមួយ»។
អាជីវករដដែលបានសំណូមពរដល់អាជ្ញាធរបន្ធូរបន្ថយវិធានការនេះ ដើម្បីសម្រួលដល់ជីវភាពប្រចាំថ្ងៃរបស់ពួកគាត់។
វីអូឌី មិនអាចសុំការឆ្លើយតបជុំវិញករណីនេះពីលោក មាន ចាន់យ៉ាដា អភិបាលរងរាជធានីភ្នំពេញ និងលោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ បានទេ នៅថ្ងៃសុក្រនេះ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង គាំទ្រចំពោះចំណាត់ការរបស់អាជ្ញាធរ ដោយថា វិធានការនេះនឹងអាចជួយសម្រួលដល់ការស្ទះចរាចរណ៍នៅរាជធានីភ្នំពេញបានមួយកម្រិត ហើយករណីនេះក៏មិនប៉ះពាល់ធ្ងន់ធ្ងរដល់អាជីវករដែរ ព្រោះពួកគាត់នៅតែអាចបន្តលក់បាន។ តែយ៉ាងណា លោកជំរុញឱ្យអាជ្ញាធរគួរតែអនុវត្តច្បាប់ឱ្យមានភាពស្មើគ្នា។
លោកថា៖ «ប៉ុន្តែបើការអនុវត្តមិនស្មើភាពគ្នា បានជាបញ្ហា! ឧបមាថា ស្រាប់តែគាត់ដាក់ថា១០ផ្ទះ ហើយ៧ផ្ទះដាក់ចូលក្នុង ហើយ៣ផ្ទះមិនដាក់ចូលក្នុង អាហ្នឹងហើយជាបញ្ហាដែលអាចធ្វើឱ្យមានការប៉ះពាល់ដល់ការរកស៊ីរបស់គាត់។ បើសិនដាក់ចូលទាំងអស់គ្នាហើយ គឺលែងប៉ះពាល់ហើយ»៕