អ្នកនាំពាក្យក្រសួងការពារជាតិកម្ពុជា បានប្រកាសថា រដ្ឋាភិបាលកម្ពុជានឹងទទួលខុសត្រូវលើការបង់ថ្លៃសិក្សារបស់និស្សិតយោធាកម្ពុជា៦រូប រហូតដល់បញ្ចប់ការសិក្សានៅសហរដ្ឋអាមេរិក។
យោងតាមសេចក្តីប្រកាសព័ត៌មានរបស់អ្នកនាំពាក្យក្រសួងការពារជាតិ កាលពីយប់មិញនេះ បានសរសេរថា៖ «ដោយមើលឃើញអំពីការលំបាករបស់សិស្សបណ្ឌិតសភាយោធាកម្ពុជាទាំងអស់ [៦នាក] ដែលបណ្តាលមកពីការបញ្ឈប់នូវកាតព្វកិច្ចនៃការបង់ថ្លៃសិក្សាពីសំណាក់ភាគីអាមេរិក និងក្នុងស្មារតីទទួលខុសត្រូវចំពោះអនាគតនិងផលប្រយោជន៍របស់សិស្សបណ្ឌិតសភាយោធាកម្ពុជា រដ្ឋាភិបាលកម្ពុជានឹងទទួលបន្តបង់ថ្លៃសិក្សាសម្រាប់សិស្សបណ្ឌិតសភាយោធាកម្ពុជាទាំង៦រូប រហូតដល់បញ្ចប់ការសិក្សារបស់ខ្លួនជាស្ថាពរ។ សេចក្តីប្រកាសបន្តថា ក្រសួងការពារជាតិកម្ពុជា នឹងទំនាក់ទំនងជាមួយស្ថាប័នពាក់ព័ន្ធរបស់សហរដ្ឋអាមេរិកនៅក្នុងចំណាត់ការនេះ»។
យោងតាមការផ្សាយរបស់វិទ្យុសំឡេងសហរដ្ឋអាមេរិក វីអូអេ កាលពីថ្ងៃទី១ ខែកក្កដា បានឱ្យដឹងថា និស្សិតកម្ពុជាចំនួន៦រូបដែលកំពុងសិក្សានៅបណ្ឌិតសភាយោធាចំនួនបួនក្នុងសហរដ្ឋអាមេរិក ត្រូវបានប្រាប់ឱ្យផ្អាកការសិក្សាមុនពេលកំណត់នៅពេលបញ្ចប់ឆ្នាំសិក្សាឆ្នាំនេះ ដោយសារតែកម្ពុជាបានបាត់បង់នូវភាពស្របច្បាប់ក្នុងការទទួលជំនួយពីសហរដ្ឋអាមេរិក។ និស្សិតទាំង៦រូបនេះកំពុងសិក្សានៅបណ្ឌិតសភាយោធាជើងគោក West Point ចំនួន២រូប បណ្ឌិតសភាទ័ពអាកាសចំនួន២រូប កងទ័ពជើងទឹកចំនួន១រូប និងឆ្មាំសមុទ្រចំនួន១រូប។
លោក អារ៉ែន វ៉ាតជេស (Arend C. Zwartjes) អ្នកនាំពាក្យស្ថានទូតសហរដ្ឋអាមេរិកប្រចាំនៅរាជធានីភ្នំពេញ បានប្រាប់ វីអូឌី តាមរយៈសារអ៊ីម៉ែល កាលពីថ្ងៃទី១ ខែកក្កដា ថាការសម្រេចនេះបានធ្វើឡើងបន្ទាប់ពីប្រទេសកម្ពុជាបានបាត់បង់ភាពស្របច្បាប់ក្នុងការទទួលបានកម្មវិធីសិក្សាផ្នែកយោធានៅសហរដ្ឋអាមេរិក។ ប៉ុន្តែសហរដ្ឋអាមេរិកបានលើកទឹកចិត្តឱ្យរដ្ឋាភិបាលកម្ពុជាជួយបង់ថ្លៃសិក្សាដល់និស្សិតរបស់ខ្លួនជាមួយនឹងថ្លៃសិក្សាដែលនៅសល់។
ទាក់ទងនឹងថ្លៃចំណាយលើការបង់ថ្លៃសិក្សាដែលនៅសល់នេះ វីអូឌី បានទាក់ទងសុំការឆ្លើយតបពីអ្នកនាំពាក្យស្ថានទូតអាមេរិកប្រចាំនៅកម្ពុជាជាថ្មីម្តងទៀត នៅថ្ងៃទី៣ ខែកក្កដានេះ ប៉ុន្តែពួកគេស្ថិតនៅក្នុងការសម្រាកវិស្សមកាលមិនទាន់អាចឆ្លើយតបភ្លាមៗបានទេ។ យ៉ាងណាក្តី តាមប្រភពនានាបានឱ្យដឹងថា រដ្ឋាភិបាលកម្ពុជាអាចចំណាយថវិកាប្រមាណជាង១ ១០០ ០០០ដុល្លារអាមេរិក លើថ្លៃសិក្សារបស់និស្សិតយោធាកម្ពុជាទាំង៦រូបរហូតដល់បញ្ចប់ការសិក្សា៕
