លោកនាយករដ្ឋមន្ត្រី ហ៊ុន សែន បានគូសបញ្ជាក់ជាថ្មីថា ជំនួយរបស់ចិនមិនត្រឹមតែជួយដល់ការអភិវឌ្ឍរបស់កម្ពុជាប៉ុណ្ណោះទេ តែបានជួយពង្រឹងឯករាជ្យភាពរបស់កម្ពុជាផងដែរ។
ការថ្លែងបែបនេះបានធ្វើឡើងកាលពីយប់ថ្ងៃទី៦ ខែកក្កដា នៅក្នុងសន្និសីទកំពូលរវាងគណបក្សកុម្មុយនីស្តចិន និងគណបក្សនយោបាយលើពិភពលោក ដែលក្នុងនោះក៏មាន «គណបក្សប្រជាជនកម្ពុជា» របស់លោកនាយករដ្ឋមន្ត្រី ហ៊ុន សែន ផងដែរ។
តាមរយៈវេទិកានេះ លោកនាយករដ្ឋមន្រ្តី ហ៊ុន សែន បានសង្កត់ធ្ងន់ថា ប្រទេសតូចតាចនិងក្រីក្រត្រូវការចាំបាច់នូវឯករាជ្យនិងអធិបតេយ្យភាព ដោយមិនចង់ឱ្យអ្នកណាបង្គាប់បញ្ជានិងជ្រៀតជ្រែកចូលកិច្ចការផ្ទៃក្នុងរបស់ខ្លួនឡើយ។ ត្រង់ចំណុចនេះ លោកនាយករដ្ឋមន្ត្រីចង់បានន័យថា រាល់ជំនួយរបស់ចិនមិនដែលភ្ជាប់នូវលក្ខខណ្ឌឬបញ្ជាឱ្យកម្ពុជាធ្វើអ្វីតាមបំណងរបស់ចិនឡើយ។
លោកនាយករដ្ឋមន្ត្រីបានថ្លែងយ៉ាងដូច្នេះថា៖ «ក្នុងន័យនេះ ជំនួយរបស់មិត្តចិនគឺពិតជាជួយទៅដល់ការពង្រឹងនូវឯករាជ្យខាងនយោបាយ ដើរទន្ទឹមជាមួយការអភិវឌ្ឍសេដ្ឋកិច្ចសង្គម និងការកាត់បន្ថយភាពក្រីក្រ»។
នេះមិនមែនជាលើកទី១ទេដែលលោកនាយករដ្ឋមន្ត្រី ហ៊ុន សែន បានលើកសរសើរប្រទេសចិនចំៗបែបនេះ។ កាលពីថ្ងៃទី២ ខែកក្កដា លោកនាយករដ្ឋមន្ត្រី ហ៊ុន សែន ក៏បានប្រកាសដោយបើកចំហដែរថា កម្ពុជាចាំបាច់ត្រូវយកប្រទេសចិន ធ្វើជាខ្នងបង្អែកយុទ្ធសាស្ត្រក្នុងការផ្គត់ផ្គង់វ៉ាក់សាំងការពារជំងឺកូវីដ-១៩ ដោយមិនខ្វល់ពីការរិះគន់អ្វីទាំងអស់។
ទោះជាយ៉ាងនេះក្តី សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មិនឯកភាពទាំងស្រុងតាមការលើកឡើងរបស់នាយករដ្ឋមន្ត្រីកម្ពុជានោះទេ។ លោកសាស្ត្រាចារ្យយល់ថា ការលើកឡើងរបស់លោកនាយករដ្ឋមន្ត្រី គឺមានទាំងចំណុចវិជ្ជមាននិងអវិជ្ជមាន។
លោកមានប្រសាសន៍យ៉ាងដូច្នេះថា៖ «ខ្ញុំគិតថា ខ្ញុំមិនយល់ស្របទាំងស្រុងនោះទេ ដោយសារតែលក្ខខណ្ឌដែលលោកខាងលិចលើកឡើង ភាគច្រើនវាជួយជ្រោមជ្រែង ឬផ្តល់នូវលំហសេរីភាព ឬសិទ្ធិប្រជាពលរដ្ឋ ឬគេហៅថា ជួយគិតគូរពីសុខុមាលភាពនិងភាពរស់រាន ស្របតាមរដ្ឋធម្មនុញ្ញកម្ពុជានិងធម្មនុញ្ញអង្គការសហប្រជាជាតិ»។
ចំណែកលោកបណ្ឌិត ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា បានអំពាវនាវឱ្យរដ្ឋាភិបាលកម្ពុជាប្រុងប្រយ័ត្នក្នុងការទទួលជំនួយពីបរទេស ក្នុងបរិបទនៃការប្រកួតប្រជែងឥទ្ធិពលនិងភូមិសាស្ត្រនយោបាយរវាងមហាអំណាចធំពីរ សហរដ្ឋអាមេរិក និងចិន។
លោក ប៉ា ចន្ទរឿន មានប្រសាសន៍បន្ថែមថា៖ «ជាការពិត ការទទួលជំនួយពីបរទេស ត្រូវតែមានការប្រយ័ត្នប្រយែង ជាពិសេសជំនួយដែលទាក់ទងនឹងសន្តិសុខសុវត្ថិភាព និងជំនួយទាក់ទងវិស័យយោធា។ ហើយដោយសារតែប្រទេសយើង រដ្ឋធម្មនុញ្ញប្រទេសយើងសរសេរហើយ យើងប្រកាន់គោលនយោបាយអព្យាក្រឹត្យ ហេតុនេះហើយ បើសិនជាចេតនាឬក៏សកម្មភាពនៃការទទួលជំនួយរបស់កម្ពុជាពីមហាអំណាចមួយ ហើយបែរជាបដិសេធមិនទទួលជំនួយពីមហាអំណាចមួយទៀត អាហ្នឹងវាអាចបង្កើតឱ្យមានភាពល្អក់កករផ្នែកទំនាក់ទំនងជាមួយនឹងប្រទេសណាមួយនោះ»។
នៅក្នុងសន្និសីទអន្តរជាតិលើកទី២៦ ស្តីពី «អនាគតអាស៊ី» កាលពីថ្ងៃទី២០ ខែឧសភា នាយករដ្ឋមន្ត្រីកម្ពុជាបានចោទជាសំណួរថា «បើខ្ញុំមិនពឹងចិនទេ តើឱ្យខ្ញុំទៅពឹងអ្នកណា?»។ បើតាមលោកនាយករដ្ឋមន្ត្រី ហ៊ុន សែន ការពឹងផ្អែកលើចិននេះហើយ ទើបនាំឱ្យកម្ពុជាមានការអភិវឌ្ឍដូចសព្វថ្ងៃនេះ តួយ៉ាងដូចជា ហេដ្ឋារចនាសម្ពន្ធ ផ្លូវថ្នល់ ស្ពាន និងអគារពាណិជ្ជកម្មធំៗ ជាដើម៕
