ពលរដ្ឋនិងសង្គមស៊ីវិលមួយចំនួនបានបង្ហាញការហួសចិត្តនិងភ្ញាក់ផ្អើលចំពោះព័ត៌មាននៃការទិញក្តារមឈូសពីប្រទេសថៃ សម្រាប់ដាក់សពអ្នកស្លាប់ដោយជំងឺកូវីដ-១៩ នៅកម្ពុជា។
កាលពីសប្តាហ៍មុន ក្នុងកិច្ចប្រជុំតាមអនឡាញពិសេសមួយ លោកនាយករដ្ឋមន្រ្តី ហ៊ុន សែន បានបញ្ជាទៅមេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិទប់ស្កាត់ និងបង្រ្កាបបទល្មើសធនធានធម្មជាតិ លោក សៅ សុខា ឱ្យយកឈើដែលរឹបអូសបានមករៀបចំធ្វើក្តារមឈូសសម្រាប់ទុកដាក់សពអ្នកស្លាប់ដោយសារជំងឺកូវីដ-១៩ បន្ទាប់ពីលោកមើលឃើញថា ចំនួនអ្នកឆ្លងនិងស្លាប់ចេះតែកើនឡើងឥតឈប់ឈរ ស្របពេលពលរដ្ឋមួយចំនួនមិនសូវមានស្មារតីប្រុងប្រយ័ត្ននៅឡើយ។
នាឱកាសនោះ លោក ហ៊ុន សែន ក៏បានបញ្ជាឱ្យក្រសួងសេដ្ឋកិច្ចបញ្ចេញថវិកាទិញក្តារមឈូសទុកសម្រាប់អ្នកស្លាប់ដោយសារជំងឺនេះផងដែរ។
អភិបាលរងខេត្តបន្ទាយមានជ័យ លោក ង៉ោ ម៉េងជ្រួញ ទទួលស្គាល់ថា ពិតជាមានការបញ្ជាទិញក្តារមឈូសពីប្រទេសថៃមែន ប៉ុន្តែតម្លៃនិងចំនួនក្តារមឈូសដែលបញ្ជាទិញនោះចំនួនប៉ុន្មាន លោកមិនបានដឹងទេ ព្រោះលោកគ្រាន់តែជាអ្នកសម្រួលច្រកចេញ-ចូលតែប៉ុណ្ណោះ។
លោកថ្លែងថា៖ «សួរទៅអ្នកដឹកនាំទិញ ព្រោះអ្នកទិញផ្សេង ខ្ញុំគ្រាន់តែសម្រួលច្រកដើម្បីចេញ-ចូលទេ»។
កាលពីថ្ងៃម្សិលមិញ អភិបាលរងខេត្តបន្ទាយមានជ័យ លោក លី សារី ប្រាប់ វីអូឌី ថាសម្រាប់ខេត្តជាប់ព្រំដែនមួយនេះ នឹងទទួលបានក្តារមឈូសចំនួន១០០ក្នុងចំណោមក្តារមឈូសជាច្រើនទៀតដែលរដ្ឋាភិបាលបញ្ជាទិញពីប្រទេសថៃ។
ពលរដ្ឋម្នាក់រស់នៅខេត្តបន្ទាយមានជ័យ លោក គីម សុវណ្ណ ប្រាប់ វីអូឌី នៅថ្ងៃពុធនេះថា លោកមិនយល់ស្របចំពោះការបញ្ជាទិញក្តារមឈូសពីប្រទេសថៃនោះទេ ដោយថា នៅកម្ពុជាសម្បូរឈើច្រើនដែលអាចយកទៅប្រើប្រាស់បាន។
លោកបន្តថា៖ «រដ្ឋាភិបាលគួរតែមានវិធានការផ្សេង ក្រៅតែពីការបញ្ជាទិញក្តារមឈូស ដោយគួរជួយជនក្រីក្រល្អជាងទិញក្តារមឈូស សម្រាប់ពលរដ្ឋដែលអត់រាល់ថ្ងៃ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បានបង្ហាញការព្រួយបារម្ភជាខ្លាំង ចំពោះបញ្ហាការរីករាលដាលនៃជំងឺកូវីដ-១៩នៅកម្ពុជា។
លោកក៏មានការងឿងឆ្ងល់ដែរថា តើនៅកម្ពុជាអត់មានលទ្ធភាពក្នុងការផ្គត់ផ្គង់ក្តារមឈូសទេ បានជាមានការបញ្ជាទិញពីប្រទេសជិតខាងបែបនេះ?
លោកបន្តថា ប្រសិនបើកម្ពុជាមានលទ្ធភាពក្នុងការដោះស្រាយបញ្ហានេះ រដ្ឋាភិបាលមិនគួរចំណាយថវិកាជាច្រើនដើម្បីបញ្ជាទិញក្តារមឈូសពីខាងក្រៅប្រទេសនោះទេ។
លោកបន្តថា៖ «លោកចង់ឃើញវិធានការឱ្យមានប្រសិទ្ធភាពក្នុងការដោះស្រាយ ការកាត់បន្ថយការរីករាលដាលនៃជំងឺកូវីដ-១៩នៅកម្ពុជា ប្រសិនបើវានៅតែបន្ត វាអាចនាំផលប៉ះពាល់ខ្លាំងណាស់ ជាពិសេសជីវភាពរស់នៅរបស់ប្រជាពលរដ្ឋដែលគាត់មានការលំបាកក្នុងការជំពាក់លុយធនាគារជាដើម»។
អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ លោក អេង ហ៊ី មានប្រសាសន៍ថា លោកកំពុងពិនិត្យមើល និងរៀបចំទិន្នន័យ ឬការវាយតម្លៃផ្សេងៗពាក់ព័ន្ធឈើដែលអាចយកទៅធ្វើក្តារមឈូសបាន។
លោកបញ្ជាក់ថា ឈើដែលគ្រោងយកទៅធ្វើក្តារមឈូសសម្រាប់អ្នកជំងឺស្លាប់ដោយកូវីដ-១៩ គឺជាឈើដែលបង្ក្រាបបាននៅក្នុងឆ្នាំ២០២០ និងឆ្នាំ២០២១ ដែលមានចំនួនប្រមាណ៥ ០០០ម៉ែត្រគូប។
យ៉ាងណា ចំពោះឈើដែលគ្រោងធ្វើក្តារមឈូសទាំងនេះ លោកមិនទាន់អាចវាយតម្លៃបានថាតើនឹងអាចធ្វើបានចំនួនប៉ុន្មាន ហើយគ្រប់គ្រាន់ឬអត់នោះឡើយ។
លោកបញ្ជាក់ថា៖ «ខ្ញុំមិនអាចវាយតម្លៃបានទេ គ្រាន់តែខាងគណៈកម្មការជាតិ គ្រាន់តែប្រមូលទិន្នន័យឈើ គោរពជូនទៅសម្តេច។ ហើយការសម្រេចធ្វើប៉ុន្មានៗ គឺសុំគោលការណ៍ដឹកនាំពីសម្តេចមកវិញ»។
បើតាមក្រសួងសុខាភិបាល គិតត្រឹមព្រឹកថ្ងៃទី៧ ខែកក្កដា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៥៧ ១០៣នាក់ ក្នុងនោះ អ្នកជំងឺព្យាបាលជាសះស្បើយសរុបចំនួន៤៨ ៩៧៤នាក់ និងមានករណីស្លាប់ចំនួន៧៩៨នាក់ ៕