ប្រទេសកូរ៉េខាងត្បូង បានរាយការណ៍ពីករណីឆ្លងជំងឺកូវីដ-១៩ថ្មី ជាង១ ២០០ករណី ក្នុងរយៈពេល២៤ម៉ោងចុងក្រោយនេះ ដែលជាចំនួនមួយខ្ពស់បំផុត គិតចាប់តាំងពីចុងខែធ្នូកន្លងទៅ។ នេះបើតាមការឱ្យដឹងពីនាយករដ្ឋមន្រ្តីកូរ៉េខាងត្បូង លោក Kim Boo-kyum នៅក្នុងកិច្ចប្រជុំទាក់ទងទៅនឹងស្ថានភាពនៃជំងឺកូវីដ-១៩ នៅថ្ងៃពុធនេះ។
ទីភ្នាក់ងារសារព័ត៌មាន Reuters បានស្រង់ប្រសាសន៍លោក Kim Boo-kyum មកផ្សព្វផ្សាយថា វិធានគម្លាតសង្គមនឹងត្រូវពង្រីកសម្រាប់រយៈពេលមួយសប្ដាហ៍បន្ថែមទៀត ខណៈដែលមន្រ្តីពាក់ព័ន្ធនានានឹងពិចារណាថាតើត្រូវរឹតបន្តឹងច្បាប់ដែលមានស្រាប់ឬយ៉ាងណា ស្របពេលដែលប្រទេសនេះកំពុងប្រយុទ្ធនឹងរលកទី៤ នៃជំងឺរាតត្បាតដែលបង្កដោយវីរុសបំប្លែងខ្លួនថ្មីប្រភេទ Delta ដែលបច្ចុប្បន្នមានការរីករាលដាលខ្លាំង។
លោកបន្តថា វីរុសនេះបានរីករាលដាលយ៉ាងឆាប់រហ័សក្នុងចំណោមមនុស្សដែលមិនទាន់ទទួលបានការចាក់វ៉ាក់សាំងចាប់ពីអាយុ២០ ដល់៣០ឆ្នាំ ខណៈលោកបានណែនាំឱ្យប្រជាជនធ្វើតេស្តរកវីរុសនេះ ដើម្បីកាត់បន្ថយការឆ្លងរីករាលដាលធ្ងន់ធ្ងរ។
គួរបញ្ជាក់ថា ប្រមាណ៣០ភាគរយនៃប្រជាជនសរុបចំនួន៥២លាននាក់របស់ប្រទេសនេះ បានទទួលវ៉ាក់សាំងការពារជំងឺកូវីដ-១៩ យ៉ាងហោចណាស់មួយដូស។
តួលេខឆ្លងប្រចាំថ្ងៃខ្ពស់បំផុតក្នុងប្រទេសកូរ៉េខាងត្បូង មានចំនួន១ ២៤០ករណី ដែលត្រូវបានរាយការណ៍នៅថ្ងៃទី២៥ ខែធ្នូ នៅពេលដែលប្រទេសនេះកំពុងរងការវាយប្រហារដោយរលកទី៣នៃជំងឺរាតត្បាត។
ប្រទេសកូរ៉េខាងត្បូង មានអ្នកឆ្លងជំងឺកូវីដ-១៩ សរុបចំនួន១៦២ ៧៥៣នាក់ និងអ្នកស្លាប់ចំនួន២ ០៣៣នាក់ ក្នុងអំឡុងពេលមានជំងឺរាតត្បាតនេះ៕