មន្ត្រីជាន់ខ្ពស់នៃអគ្គស្នងការនគរបាលជាតិទទួលបន្ទុកគ្រឿងញៀន បានអះអាងថា នៅត្រីមាសទី១ ដើមឆ្នាំ២០២១នេះ ការបង្ក្រាបគ្រឿងញៀនមានការកើនឡើងខ្ពស់ បើប្រៀបធៀបរយៈពេលដូចគ្នាកាលពីឆ្នាំ២០២០ បើទោះកម្ពុជាកំពុងជួបវិបត្តិកូវីដ-១៩ក៏ដោយ។
អគ្គស្នងការរងនៃអគ្គស្នងការនគរបាលជាតិទទួលបន្ទុកផ្នែកប្រឆាំងគ្រឿងញៀន លោក ម៉ក់ ជីតូ ប្រាប់ វីអូឌី នៅថ្ងៃទី៨ ខែកក្កដានេះថា ការបង្ក្រាបគ្រឿងញៀនក្នុងឆមាសទី១ ឆ្នាំ២០២១នេះ មានការកើនឡើងខ្លាំង ដោយបង្រ្កាបបានរហូតដល់៣ ៣៩១ករណី និងចាប់ជនល្មើសបានដល់៧ ២៤៦នាក់ រឹបអូសគ្រឿងញៀនបាន៧៥៩គីឡូក្រាម។ ចំនួននេះ លោកថា មានការកើនឡើងជិត១០ភាគរយ (៨,៣០%) បើប្រៀបធៀបទៅនឹងរយៈពេលដូចគ្នាកាលពីឆ្នាំ២០២០ ដែលមានត្រឹមតែ៣ ១៣១ករណី។
លោកថា៖ «ពួកឧក្រិដ្ឋជនហ្នឹង វាប្រឹងប្រែងឆ្លៀតណាស់ ដោយសារឃើញយើងរវល់កំពុងតែខិតខំប្រឆាំងជាមួយកូវីដ-១៩ហ្នឹង។ វាឆ្លៀតប្រឹងប្រែងធ្វើសកម្មភាព លួចលាក់ធ្វើសកម្មភាពហ្នឹង ភាគច្រើនវាធ្វើក្នុងបរិមាណច្រើនៗទៀត»។
លោកបញ្ជាក់ថា មូលហេតុនៃការបង្ក្រាបមានការកើនឡើង ដោយសារការអនុវត្តតាមយុទ្ធសាស្ត្ររបស់រដ្ឋាភិបាល ពិសេសគោលនយោបាយភូមិឃុំមានសុវត្ថិភាព។
លោកបន្តថា៖ «ផែនការទី១ យើងអនុវត្តតាមគោលនយោបាយភូមិឃុំមានសុវត្ថិភាព ក្នុងនោះមានចំណុចមួយពាក់ព័ន្ធការបង្រ្កាបគ្រឿងញៀន ហើយទី២ យើងអនុវត្តតាមផែនការយុទ្ធនាការរបស់រដ្ឋាភិបាល ដោយយុទ្ធនាការនេះមានសម្តេចក្រឡាហោម ស ខេង ជាប្រធាន»។
លោក ម៉ក់ ជីតូ បន្តទៀតថា បញ្ហាគ្រឿងញៀនមិនមែនមានតែចំពោះកម្ពុជាទេ វាជារឿងបញ្ហាសកល ដោយត្រូវមានការចូលរួមទប់ស្កាត់ទាំងអស់គ្នា។ លោកថា ការចុះបង្រ្កាបជារួមលើបញ្ហាគ្រឿងញៀននេះនៅមិនទាន់បានល្អប្រសើរនៅឡើយ ប៉ុន្តែអាជ្ញាធរមានការខិតខំប្រឹងប្រែងទាំងអស់គ្នា ដោយគោរពតាមការលើកឡើងរបស់រដ្ឋមន្ត្រីក្រសួងមហាផ្ទៃលោក ស ខេង នូវពាក្យស្លោកមួយថា«៣កុំ ១រាយការណ៍»។
ពាក់ព័ន្ធនឹងបញ្ហាគ្រឿងញៀននៅតែកើនឡើងនៅក្នុងសង្គមនិងរាលដាលដល់ជនបទផងនោះ ត្រូវបានក្រុមអ្នកតាមដានសង្គមយល់ថា ជាវិនាសកម្មនិងភាពអន្តរាយមួយទៅដល់គោលដៅក្នុងការអភិវឌ្ឍជាតិមាតុភូមិ ជាពិសេសយុវជនដែលជាសសរទ្រូងរបស់ជាតិដែលកំពុងត្រូវបានរងគ្រោះដោយសារគ្រឿងញៀនជាបន្តបន្ទាប់។
ចំពោះបញ្ហានេះ នាយករងអង្គការការពារសិទ្ធិមនុស្សលីកាដូ លោក អំ សំអាត យល់ឃើញថា បញ្ហាគ្រឿងញៀននេះ មានលក្ខណៈជាប្រព័ន្ធទៅហើយនៅក្នុងសកលលោក ជាពិសេសនៅប្រទេសដែលអនុវត្តច្បាប់នៅមានកម្រិត។ ករណីនេះ លោកថា កម្ពុជាត្រូវតែអនុវត្តច្បាប់ឱ្យបានតឹងរ៉ឹង ទោះបីជាមន្ត្រីណា ឬក៏អ្នកដែលមានឋានៈ ឬអំណាចប៉ុន្មានក៏ដោយ ត្រូវតែអនុវត្តច្បាប់ ទើបអាចទប់ស្កាត់បញ្ហាគ្រឿងញៀននៅកម្ពុជាបាន។
លោកថ្លែងថា៖ «យើងឃើញកន្លងមកហើយ ការដែលអ្នកពាក់ព័ន្ធជាមួយគ្រឿងញៀនហ្នឹង រហូតទៅដល់មានមន្ត្រីអនុវត្តច្បាប់គ្រឿងញៀនហ្នឹង ក៏មានការពាក់ព័ន្ធ ឧកញ៉ាមួយចំនួនក៏ពាក់ព័ន្ធ។ អ៊ីចឹងបញ្ហានេះហើយដែលជាបញ្ហាមួយធំសម្រាប់កម្ពុជាយើង អ៊ីចឹងការអនុវត្តច្បាប់ស្រុកយើង ទោះបីជាច្បាប់យើងមិនទាន់ដល់ស្តង់ដារក៏ដោយ ប៉ុន្តែត្រូវតែអនុវត្តច្បាប់ហ្នឹងឱ្យបានតឹងរ៉ឹង ទោះបីជាមន្ត្រីណាឬក៏អ្នកដែលមានឋានន្តរសក្តិណាក៏ដោយ ត្រូវតែអនុវត្តទៅតាមផ្លូវច្បាប់»។
យោងតាមរបាយការណ៍របស់នាយកដ្ឋានប្រឆាំងគ្រឿងញៀននៃក្រសួងមហាផ្ទៃ កាលពីខែមករា ឆ្នាំ២០២១ ឱ្យដឹងថា ក្នុងឆ្នាំ២០២០ សមត្ថកិច្ចជំនាញបង្ក្រាបបទល្មើសគ្រឿងញៀនសរុប១០ ៤៦១ករណី និងរឹបអូសបានវត្ថុតាងគ្រឿងញៀនចំនួនជាង៣តោន (៣ ១៨៩គីឡូក្រាម) និងសារធាតុគីមីផ្សំចំនួនជាង៥តោន (៥ ០២៥ គីឡូក្រាម)។
របាយការណ៍បន្តថា ប្រតិបត្តិការបង្ក្រាបនោះ សមត្ថកិច្ចចាប់ខ្លួនមនុស្សដែលពាក់ព័ន្ធគ្រឿងញៀនចំនួន២១ ៥៦៦នាក់ (ជនបរទេស ៣៨៩នាក់) ក្នុងនោះ អ្នកដែលពាក់ព័ន្ធនឹងការជួញដូរ កែច្នៃ រក្សាទុក និងដាំដុះ ចំនួន១២ ៧៣៩នាក់ និងអ្នកប្រើប្រាស់ចំនួន៨ ៨២៧នាក់៕
