អ្នកសិក្សាផ្នែកប្រវត្តិសាស្ត្រ និងយុវជនមួយចំនួន ទាមទារឱ្យក្រសួងវប្បធម៌ និងវិចិត្រសិល្បៈ ចុះទៅពិនិត្យសំណង់ប្រាសាទមួយនៅប្រទេសថៃដោយផ្ទាល់ បន្ទាប់ពីពលរដ្ឋខ្មែរបង្ហាញការមិនពេញចិត្ត ព្រោះតែសំណង់ប្រាសាទនោះសង់ឡើងស្រដៀងទៅនឹងប្រាសាទអង្គរវត្តរបស់ខ្មែរ។
និស្សិតកំពុងសិក្សានៅសាកលវិទ្យាល័យកម្ពុជា លោក លាក់ សារ៉ាយ នៅថ្ងៃសុក្រនេះ បានបង្ហាញការមិនគាំទ្រចំពោះការសាងសង់ប្រាសាទមួយនេះ ដោយថា ទង្វើនោះនឹងធ្វើឱ្យប៉ះពាល់ដល់កេរ្តិ៍ឈ្មោះដ៏ល្បីល្បាញរបស់ប្រាសាទអង្គរវត្តរបស់កម្ពុជា។
ម្យ៉ាងទៀត លោកថា ការសាងសង់ប្រាសាទរបស់ថៃនេះ វាខុសពីការសាងសង់ប្រាសាទដែលមានរចនាបថខ្មែរនៅប្រទេសចិន និងប្រទេសអេស្ប៉ាញ ដោយសារ ប្រទេសថៃសាងសង់ដោយមិនមានការអនុញ្ញាតពីប្រទេសកម្ពុជា។
លោកបន្តថា៖ «អេស្ប៉ាញ និងចិន គេសាងសង់មកជាតំណាងទេ គឺគេជួយផ្សព្វផ្សាយឱ្យខ្មែរ! ណាមួយនៅតាមជញ្ជាំងប្រាសាទដែលគេសាងសង់ ក៏គេដាក់ដែរថា ប្រាសាទដើមគឺនៅខ្មែរយើង ហើយក៏មានកិច្ចព្រមព្រៀងនៅក្នុងការដែលសាងសង់ហ្នឹងដែរ។ ប៉ុន្តែនៅថៃនេះ គឺការសាងសង់អត់មានការពិភាក្សាឬក៏អនុញ្ញាតពីខ្មែរយើងទាល់តែសោះ»។
លោកស្នើទៅក្រសួងវប្បធម៌ និងវិចិត្រសិល្បៈ ចុះសិក្សាស្រាវជ្រាវឱ្យបានល្អិតល្អន់ ហើយបំភ្លឺឱ្យបានច្បាស់លាស់ ដើម្បីឱ្យប្រជាជនខ្មែរមានភាពជឿជាក់ទុកចិត្ត។
លោកបន្តថា៖ «ក្រសួងវប្បធម៌ និងវិចិត្រសិល្បៈ គួរតែរកដំណោះស្រាយ ក៏ដូចជាពិភាក្សានិងចរចាជាមួយភាគីខាងថៃរកដំណោះស្រាយឱ្យប្រជាជនខ្មែរហ្នឹងពេញចិត្តជាងហ្នឹង ព្រោះថា អ្វីដែលពួកគាត់បកស្រាយចេញមក គឺពួកខ្ញុំអត់អាចទទួលយកបានទេ»។
ទោះបីជាយ៉ាងណា និស្សិតនៅវិទ្យាស្ថានភាសាបរទេស នៃសាកលវិទ្យាល័យភូមិន្ទភ្នំពេញ លោក សរ ពុទ្ធិឬទ្ធិ វ័យ២១ឆ្នាំ បង្ហាញការខកចិត្តដែលប្រទេសដទៃសាងសង់ប្រាសាទចម្លងតាមប្រាសាទអង្គរវត្តដែលជាសម្បតិ្តបេតិកភណ្ឌពិភពលោកដ៏មានតម្លៃរបស់ខ្លួន។
លោកថា៖ «ទីមួយ ប្រាសាទអង្គរវត្តជាកេរដំណែលវប្បធម៌មួយដ៏មានតម្លៃ ហើយទីពីរ ប្រាសាទហ្នឹងជាកេរមរតកយើង ហើយណាមួយជាដួងព្រលឹងនៃប្រទេសយើង។ ធម្មតាក្នុងនាមយើងជាខ្មែរ យើងតែងចង់បានអីមួយដែលមានលក្ខណៈប្លែកដាច់ពីគេ ដល់ពេលប្លែកដាច់ពីគេអ៊ីចឹង វាបង្កប់ទៅនឹងអត្តសញ្ញាណ។ អ៊ីចឹងនៅទីណាដែលមានជនបរទេសមានបំណងចម្លងតាមឬមួយបង្កើតរបស់មួយដែលជាសម្បត្តិបេតិកភណ្ឌ វាជារបស់មួយដែលយូរឆ្នាំ យើងខំប្រឹងបង្កើតវាថ្មី មានអារម្មណ៍ថារៀងខកចិត្ត»។
សាស្ត្រាចារ្យ និងជាបណ្ឌិតប្រវត្តិសាស្ត្រនៃសាកលវិទ្យាល័យភូមិន្ទភ្នំពេញ លោក វង្ស សុធារ៉ា មានប្រសាសន៍ថា ប្រាសាទអង្គរវត្ត ជាអត្តសញ្ញាណនិងជាព្រលឹងរបស់ជាតិ ហើយក៏ជាកម្លាំងចលករដែលធ្វើឱ្យប្រជាជាតិខ្មែររួបរួមសាមគ្គីគ្នា សម្រាប់ធ្វើការអភិវឌ្ឍប្រទេសជាតិទាំងមូល។
លោកបន្តថា ប្រសិនបើក្រសួងនិងស្ថាប័នពាក់ព័ន្ធមិនមានវិធានការ និងបណ្ដោយឱ្យប្រទេសដទៃចម្លងស្នាដៃរបស់ដូនតានោះ នឹងធ្វើឱ្យប៉ះពាល់អត្តសញ្ញាណនិងដួងព្រលឹងរបស់ជាតិ ហើយប្រជាពលរដ្ឋនឹងបាត់បង់ជំនឿទៅលើរដ្ឋាភិបាលនិងស្ថាប័នពាក់ព័ន្ធ។
លោកថា៖ «រដ្ឋនីមួយៗត្រូវមានអត្តសញ្ញាណរបស់ជាតិ ធ្វើជាស្នូលសម្រាប់ការរួបរួមរបស់ជាតិ សម្រាប់សាមគ្គីជាតិតាំងពីមុនមក ត្រូវបានយើងសម័យនេះបំផ្លាញដោយខ្លួនឯង ដោយយើងចេះតែបណ្ដោយឱ្យគេបំផ្លាញបន្តបន្ទាប់គ្នាអ៊ីចឹងទៅ។ អាហ្នឹងជាតិយើងវានឹងអាចសាបសូន្យទៅតាមហ្នឹងដែរ ដោយសារប្រជាជនអស់សង្ឃឹម ដោយសារប្រជាជនបាក់ទឹកចិត្ត ថាអ្វីដែលជាតំណាងរបស់យើងវាអត់ន័យអីទេ ពីព្រោះអីត្រូវបានគេញាំញីគ្រប់ពេលវេលាបាន ម្ដងគេធ្វើអញ្ចេះម្ដងគេធ្វើអញ្ចុះ យើងអត់មានថាអីផង»។
ករណីនេះ លោកបានជំរុញដល់ក្រសួងវប្បធម៌ និងវិចិត្រសិល្បៈ គួរចុះទៅធ្វើការត្រួតពិនិត្យដោយផ្ទាល់ទៅលើសំណង់ប្រាសាទមួយនេះនៅប្រទេសថៃ ដើម្បីបកស្រាយមកកាន់ប្រជាពលរដ្ឋឱ្យដឹងកាន់តែច្បាស់ ថាតើសំណង់ប្រាសាទនោះ បានចម្លងតាមរចនាបថប្រាសាទអង្គរវត្តដែរឬទេ។
លោកបន្តថា៖ «គួរតែមានការសិក្សាស្រាវជ្រាវនិងវាយតម្លៃឱ្យបានទូលំទូលាយ ធ្វើយ៉ាងណាឱ្យប្រជាជនខ្មែរបានស្ងប់ចិត្តផង ថាតើគេធ្វើហ្នឹងវាពិតជាបានប៉ះពាល់ព្រលឹងជាតិរបស់យើងឬក៏យ៉ាងម៉េច [ព្រោះ] ឃើញប្លង់នៃការសាងសង់ហ្នឹងច្បាស់ណាស់ គឺវាដូចប្រាសាទអង្គរវត្តយើង៩៨ភាគរយបាត់ទៅហើយ»។
អ្នកនាំពាក្យក្រសួងវប្បធម៌ និងវិចិត្រសិល្បៈ លោក ឡុង ប៉ុណ្ណាស៊ីរីវត្ថ សុំមិនធ្វើអត្ថាធិប្បាយ ដោយឱ្យអ្នកសារព័ត៌មានយកតាមសេចក្ដីប្រកាសរបស់ក្រសួង។
កាលពីថ្ងៃទី៧ ខែកក្កដា ឆ្នាំ២០២១ ក្រសួងវប្បធម៌ និងវិចិត្រសិល្បៈកម្ពុជា បានប្រកាសជាសាធារណៈពីការអះអាងរបស់ព្រះចៅអធិការវត្តដែលសាងសង់សំណង់ប្រាសាទនោះ ថាមិនមែនជាការលួចចម្លងប្លង់តាមប្រាសាទអង្គរវត្តឡើយ ប៉ុន្តែវាជាគំនូសប្លង់ដែលស្ថាបត្យករថៃបង្កើតឡើងដោយខ្លួនឯង។
ក្រសួងបន្តថា ប្រាសាទដែលគេកំពុងសាងសង់នេះត្រូវបានគេឱ្យឈ្មោះថា «ប្រាសាទសីហនគរ» បានប្រារព្ធពិធីបុកគ្រឹះលើកដំបូងរបស់ខ្លួននៅថ្ងៃទី៥ ខែមេសា ឆ្នាំ២០២១ ក្នុងបរិវេណវត្តភូម៉ានហ្វា ផាយ៉ាឆាងរ៉ង ភូមិបានណងបួរ៉ាយ ឃុំបានសិង្គ ស្រុកនាងរ៉ង ខេត្តបុរីរម្យ ដោយកំណត់ថា នឹងបញ្ចប់ការសាងសង់នៅរវាង៧ទៅ៨ឆ្នាំទៀត។
យ៉ាងណាក៏ដោយ កាលពីចុងឆ្នាំ២០២០ សណ្ឋាគារមួយឈ្មោះ Le palais Hotel មានទីតាំងនៅកោះផាង៉ាន ខេត្តសុរ៉ាត់ថានី ប្រទេសថៃ បានក៏បានចម្លងរចនាបថប្រាសាទអង្គរវត្ត អង្គរធំ ប្រាសាទបន្ទាយស្រី និងប្រាសាទបាយ័នរបស់កម្ពុជាទាំងស្រុងផងដែរ។
ប្រាសាទអង្គរវត្ត ក្លាយជានិមិត្តរូបនៃប្រទេសកម្ពុជាតែមួយគត់ដែលរំលេចលើទង់ជាតិរបស់ប្រទេស ជារូបភាពតំណាងប្រទេសជាតិខ្មែរ ហើយក៏បានដាក់បញ្ចូលជាសម្បត្តិបេតិកភណ្ឌពិភពលោក កាលពីថ្ងៃទី១៤ ខែធ្នូ ឆ្នាំ១៩៩២ និងត្រូវចាត់ទុកថា ជាកន្លែងបុរាណដ៏សំខាន់មួយនៅអាស៊ី។
ប្រាសាទអង្គរវត្ត ស្ថិតនៅក្នុងទឹកដីនៃខេត្តសៀមរាបនៃប្រទេសកម្ពុជា ដែលមានកម្ពស់៦៥ម៉ែត្រ មានក្រឡាផ្ទៃ២០០ហិកតា រាងចតុកោណ ដោយមានកំពែងព័ទ្ធជុំវិញ។ ប្រាសាទអង្គរវត្ត បានកសាងឡើងដោយព្រះបាទសូរ្យវរ្ម័នទី២ នៅដើមសតវត្សទី១២ ហើយក៏ជាទីតាំងមួយដែលកងទ័ពខ្មែរទទួលបានជ័យជម្នះលើកងទ័ពសៀមក្នុងសម័យរាជាណាចក្រអយុធ្យា សតវត្សទី១៧ ផងដែរ៕