អង្គការសម្ព័ន្ធមិត្តសត្វព្រៃ (Wildlife Alliance Cambodia) នៅតែមានក្ដីបារម្ភចំពោះសុវត្ថិភាពសត្វព្រៃគ្រប់ប្រភេទ ខណៈអន្ទាក់នៅតែបន្តមានគ្រប់ទីកន្លែងនៅក្នុងព្រៃ បើទោះបីជាកន្លងមកមានការដកហូតអន្ទាក់បានយ៉ាងច្រើនជាហូរហែមកហើយក៏ដោយ។
ប្រធានថែទាំ និងសង្រ្គោះសត្វព្រៃ នៃអង្គការសម្ព័ន្ធមិត្តសត្វព្រៃ លោក និក ម៉ាក្ស បានប្រាប់ វីអូឌី នៅថ្ងៃចន្ទនេះថា លោកមានការបារម្ភចំពោះចំនួនអន្ទាក់សត្វព្រៃដ៏ច្រើនលើសលុបដែលជនល្មើសនៅបន្តដាក់នៅក្នុងព្រៃ ហើយអន្ទាក់ទាំងនោះ អាចបណ្ដាលឱ្យមានការបាត់បង់សត្វព្រៃទាំងស្រុងនាពេលអនាគត ប្រសិនបើអាជ្ញាធរពាក់ព័ន្ធមិនមានវិធានការទប់ស្កាត់ទេនោះ។
លោកមានប្រសាសន៍ថា៖ «យើងបារម្ភ [អំពី] អន្ទាក់ មកពីមានមូលហេតុច្រើន ប៉ុន្តែថ្ងៃក្រោយ សត្វព្រៃ [អាចនឹង] អស់រលីង ប្រសិនយើងអត់ការពារសត្វព្រៃពីអន្ទាក់។ [ទី] មួយ ព្រានព្រៃដាក់អន្ទាក់ច្រើនណាស់នៅក្នុងព្រៃ […] មួយទៀតអន្ទាក់អាចចាប់ជ្រូកព្រៃ! គេ [ព្រានព្រៃ] អាចចាប់សត្វទាំងអស់ [ដូចជា] កូនដំរី សត្វកម្រ ទន្សោង ខ្ទីង។ ថ្ងៃក្រោយ គេ [សត្វព្រៃទាំងនេះ] នឹងងាប់»។
លោកបានលើកឡើងថា អន្ទាក់ទាំងនេះមានតម្លៃថោកដែលអាចឱ្យព្រានព្រៃអាចបន្តដាក់អន្ទាក់សត្វព្រៃនៅគ្រប់ទីកន្លែង។
លោកបានបន្តថា៖ «ក្រុមល្បាតយើងនិងក្រុមល្បាតអង្គការទាំងអស់ [បាន] ចូលក្នុងព្រៃរកអន្ទាក់ ប៉ុន្តែ [ដោយសារ] អន្ទាក់ [មានតម្លៃ] ថោកៗ [ដូច្នេះ] ព្រានព្រៃចូលក្នុងព្រៃម្តងទៀត [ដើម្បី] ដាក់អន្ទាក់បន្ថែមទៀត និង គេ [ព្រានព្រៃ] អត់ដាក់អន្ទាក់តែមួយ [ឬ] ពីរបី [តែ] គេដាក់អន្ទាក់រាប់រយនៅក្នុងព្រៃគ្រប់កន្លែង»។
វីអូឌី មិនអាចសុំការអធិប្បាយពីអ្នកនាំពាក្យក្រសួងបរិស្ថាន លោក នេត្រ ភក្រ្ដា បានទេ នៅថ្ងៃនេះ។
កាលពីថ្ងៃទី១៨ ខែមិថុនា ឆ្នាំ២០២១ ថ្មីៗនេះ សត្វខ្ទីងមួយក្បាលក៏បានងាប់ ដោយសារវាមានរបួសធ្ងន់ធ្ងរបន្ទាប់ពីជាប់អន្ទាក់ព្រានព្រៃ។
យោងតាមរបាយការណ៍របស់អង្គការសម្ព័ន្ធមិត្តសត្វព្រៃ (Wildlife Alliance Cambodia) បានផ្សាយនៅលើទំព័រហ្វេសបុក កាលពីថ្ងៃទី០៨ ខែកក្កដា ឆ្នាំ២០២១ ថា អង្គការសម្ព័ន្ធមិត្តសត្វព្រៃ និងក្រុមមន្ត្រីឧទ្យានុរក្សរបស់ក្រសួងបរិស្ថាន បានដកអន្ទាក់ចេញប្រមាណ១០ ០០០អន្ទាក់ពីក្នុងព្រៃតំបន់ការពារ គិតត្រឹមរយៈពេល៥ខែដំបូងក្នុងឆ្នាំ២០២១នេះ៕
